ନୂଆଦିଲ୍ଲୀ,୧୭ ।୧୨: ଦେଶରେ ବେଳକୁ ବେଳ ବଢି ଚାଲିଛି ଓମିକ୍ରନ୍ ସଂକ୍ରମଣ । ଏହା ସାଧାରଣ ଜନତାଙ୍କଠାରୁ ଆରମ୍ଭ କରି ବିଶେଷଜ୍ଞ, ସ୍ୱାସ୍ଥ୍ୟକର୍ମୀ ସମସ୍ତଙ୍କ ପାଇଁ ଚିନ୍ତାର କାରଣ ପାଲଟି ଗଲାଣି । ଯଦି ଓମିକ୍ରନ୍ର ଗୋଷ୍ଠୀ ସଂକ୍ରମଣ ହୁଏ ତେବେ ସମସ୍ତଙ୍କର ଜିନୋମ ସିକ୍ୟୁଏନସିଂ କରିବା ସମ୍ଭବ ହେବ ନାହିଁ ବୋଲି ବିଶେଷଜ୍ଞ କହିଛନ୍ତି । ପୁଣେ ସ୍ଥିତ ନ୍ୟାଶନାଲ ଇନଷ୍ଟିଚ୍ୟୁଟ ଅଫ୍ ଭାୟରୋଲୋଜି(ଏନ୍ଆଇଭି)ର କାର୍ଯ୍ୟରତ ବିଶେଷଜ୍ଞ ଏହା କହିଛନ୍ତି । ସେମାନେ କହିଛନ୍ତି ପୂର୍ବରୁ ଦିନକୁ ୩୦-୪୦ଟି ସାମ୍ପଲ ଜିନୋମ ସିକ୍ୟୁଏନସିଂ ପାଇଁ ଆସୁଥିବା ବେଳେ ଏବେ ଦିନକୁ ପ୍ରାୟ ୧୨୦-୧୩୦ଟି ସାମ୍ପଲର ଜିନୋମ ସିକ୍ୟୁଏନସିଂ କରାଯାଉଛି । ଦିନ ତ ଦିନ ରାତି ରାତି ବି ଆମେ ଏଥିପାଇଁ ଉଜାଗର ରହିବାକୁ ପଡୁଛି । କେବଳ ମହାରାଷ୍ଟ୍ର ନୁହେଁ ପ୍ରାୟ ୧୨ଟି ରାଜ୍ୟରୁ ସାମ୍ପଲ ଏନ୍ଆଇଭିକୁ ପଠାଯାଉଥିବାରୁ ଏଭଳି ପରିସ୍ଥିତି ଉପୁଜିଥିବା ସେ କହିଛନ୍ତି । ଘଣ୍ଟା ଘଣ୍ଟା ଧରି ପିପିଇ କିଟ୍ ପିନ୍ଧି ଏକ ୨୦ ଡିଗ୍ରୀ ବାକ୍ସରୁ ସାମ୍ପଲ ବାହାର କରି ଏହାର ସିକ୍ୟୁଏନସିଂ ଆରମ୍ଭ କରାଯାଇଥାଏ । ଆଉ ଏଥିପାଇଁ ଟିକେ ସମୟ ବି ଲାଗିଥାଏ । ଏବେ ଦେଶରେ ଯେଉଁ ପରିମାଣରେ ଟେଷ୍ଟ ଆରମ୍ଭ କରାଯାଇଛି ମାତ୍ର ୩ ସପ୍ତାହ ମଧ୍ୟରେ ୫ ଗୁଣା ଅଧିକ କାମ ପଡିଯାଇଥିବା ବିଶେଷଜ୍ଞମାନେ କହିଛନ୍ତି ।
ସୂଚନାଯୋଗ୍ୟ, ଗତବର୍ଷ କରୋନା ମହାମାରୀର ଦ୍ୱିତୀୟ ଲହର ଆସିଥିବା ବେଳେ ଏହାର ମୁକାବିଲା କରିବା ଆମ ପାଇଁ କାଠିକର ପାଠ ହୋଇ ଯାଇଥିଲା । ଏହାପରେ ବି ଜନତା ବୋଧହୁଏ କରୋନାର ଗାଇଡ ଲାଇନ୍ ପାଳନ କରିବାକୁ ରାଜି ନ ହେଉ ଥିବାରୁ ପରିସ୍ଥିତି ବେଳକୁ ବେଳ ଖରାପ ହେବା ଆଶଙ୍କା କରାଯାଉଛି ।
