ଭୁବନେଶ୍ୱର,୧୧।୭ (ବ୍ୟୁରୋ): ରାଜଧାନୀ ଭୁବନେଶ୍ୱରରେ ବୁଲା ଗାଈଗୋରୁଙ୍କ ପ୍ରାର୍ଦୁଭାବ କମାଇବା ପାଇଁ ବିଏମ୍ସି ପଦକ୍ଷେପ ନେଉଛି। ଏଣିକି ବୁଲାଗୋରୁ ହୁଅନ୍ତୁ ଅବା ଗୃହପାଳିତ ପ୍ରାଣୀ ସେମାନେ ରାସ୍ତାରେ ବୁଲିପାରିବେ ନାହିଁ। ରାସ୍ତାରେ ବୁଲିଲେ ସେମାନଙ୍କୁ ବିଏମ୍ସି ସ୍କ୍ବାଡ୍ ଉଠାଇନେବ। ସେହିପରି ଯେଉଁ ମାଲିକମାନେ ସେମାନଙ୍କ ଗୋରୁକୁ ରାସ୍ତାକୁ ଛାଡ଼ିବେ ସେମାନଙ୍କୁ ଜରିମାନା ଦେବାକୁ ପଡ଼ିବ ବୋଲି ବିଏମ୍ସି ପକ୍ଷରୁ ଯୋଜନା ହୋଇଛି। ରାଜଧାନୀ ତଥା ଉପକଣ୍ଠ ଅଞ୍ଚଳ ରାସ୍ତାରେ ଦଳ ଦଳ ହୋଇ ଗୋରୁପଲଙ୍କ ଯୋଗୁ ଅନେକ ସମୟରେ ଟ୍ରାଫିକ୍ ସମସ୍ୟା ଉପୁଜିବା ସହ ଦୁର୍ଘଟଣା ଘଟୁଛି। ତେଣୁ ବିଏମ୍ସି ପକ୍ଷରୁ ଖୁବ୍ଶୀଘ୍ର ଏ ନେଇ କାର୍ଯ୍ୟ କରାଯିବ ବୋଲି ସୂଚନା ଦିଆଯାଇଛି। ବିଏମ୍ସିର ସ୍ବତନ୍ତ୍ର ସ୍କ୍ବାଡ୍ ରାସ୍ତାରେ ବୁଲୁଥିବା ଗୋରୁଙ୍କୁ ଧରି କାଞ୍ଜିଆହୁଦାରେ ରଖିବ। ଏହି ସମୟରେ ମାଲିକ ସେମାନଙ୍କ ଗୋରୁ ନେବାକୁ ଆସିଲେ ବାଛୁରୀଙ୍କୁ ଦିନ ପିଛା ୧ହଜାର ଟଙ୍କା ଏବଂ ଗାଈ ପାଇଁ ଦିନକୁ ଦେଢ଼ ହଜାର ଟଙ୍କା ଜରିମାନା ଦେବାକୁ ପଡ଼ିବ। ଯଦି ୨/୩ ଦିନ ଭିତରେ ସମ୍ପୃକ୍ତ ଗୋରୁଙ୍କ ମାଲିକ ସେମାନଙ୍କୁ ନେବାକୁ ନ ଆସନ୍ତି ତେବେ ବିଏମ୍ସିର ଗୋଶାଳା ଜାମୁକୋଳିକୁ ପଠାଇ ଦିଆଯିବ। ବିଏମ୍ସି ସେମାନଙ୍କର ରକ୍ଷଣାବେକ୍ଷଣ କରିବ ବୋଲି ବିଏମ୍ସି ଡେପୁଟି କମିଶନର (ଓ୍ବେଲଫେୟାର୍) ରମେଶ ଚନ୍ଦ୍ର ଜେନା ରବିବାର ସୂଚନା ଦେଇଛନ୍ତି। ସହରରେ ଅନେକ ବ୍ୟକ୍ତି ଗୋରୁ ରଖୁଥିଲେ ବି ସେମାନଙ୍କର ଠିକ୍ ଭାବେ ଯତ୍ନ ନେଉ ନାହାନ୍ତି। ଅନେକଙ୍କର ଗୁହାଳ ନ ଥିବାରୁ ଗୋରୁଙ୍କୁ ରାସ୍ତା କଡ଼ରେ ଛାଡ଼ି ଦେଉଛନ୍ତି। ତେଣୁ ସେମାନଙ୍କ ପାଇଁ ବିଏମ୍ସି ଏକ ସ୍ବତନ୍ତ୍ର ସ୍କ୍ବାଡ୍ ଗଠନ କରିବ। ଏହି ସ୍କ୍ବାଡ୍ ଗୋରୁ ରଖୁଥିବା ଲୋକଙ୍କ ଘରକୁ ଯାଇ ଗୁହାଳ ଅଛି କି ନାହିଁ ତଦାରଖ କରିବେ। ଏଥିସହ ଗୋପାଳନ କରିବା ପାଇଁ ଆନୁସଙ୍ଗିକ ବ୍ୟବସ୍ଥା ଦେଖିବେ। ଖୁବ୍ ଶୀଘ୍ର ଏହି ଯୋଜନା କାର୍ଯ୍ୟକାରୀ ହେବ ବୋଲି ଡେପୁଟି କମିଶନର କହିଛନ୍ତି।
ବିଏମ୍ସି ପକ୍ଷରୁ ଖୁବ୍ଶୀଘ୍ର ଆଉ ଦୁଇଟି ଗୋଶାଳା ନିର୍ମାଣ କରାଯିବ। ଏଥିପାଇଁ ଖୋର୍ଦ୍ଧା ଜିଲାପାଳଙ୍କୁ ୧୨ ଏକର ଏବଂ ୯ ଏକର ପରିମିତ ଦୁଇଟି ଜାଗା ମଗାଯାଇଛି। ଜାଗା ମିଳିବା ପରେ ନିର୍ମାଣ କାର୍ଯ୍ୟ ଆରମ୍ଭ ହେବ ବୋଲି ସୂଚନା ଦିଆଯାଇଛି। ବୁଲା ଗୋରୁଙ୍କ ପାଇଁ ଜାମୁକୋଳିଠାରେ ଗୋଟିଏ ଗୋଶାଳା ରହିଛି। ସେଠାରେ ଏବେ ୧୭୫ ଗୋରୁ ରହିଛନ୍ତି। ସହରରେ ୨ହଜାରରୁ ଊର୍ଦ୍ଧ୍ୱ ବୁଲା ଗୋରୁ ଥିବାବେଳେ ଗୋଟିଏ ଗୋଶାଳାରେ ସମସ୍ତଙ୍କୁ ରଖିବା ସମ୍ଭବ ହେଉନାହିଁ। ତେଣୁ ଆଉ ଦୁଇଟି ଗୋଶାଳା ନିର୍ମାଣ ଲାଗି ଯୋଜନା ପ୍ରସ୍ତୁତ ହେଉଛି। ଏ ସମ୍ପର୍କରେ ବିଏମସି କମିଶନର ବିଜୟ ଅମୃତା କୁଲାଙ୍ଗେ କହିଛନ୍ତି, ଅନେକ ସମୟରେ ବୁଲା ଗୋରୁଙ୍କ ପାଇଁ ଦୁର୍ଘଟଣା ଘଟୁଛି। ତେଣୁ ଏହାକୁ ଏଡ଼ାଇବା ପାଇଁ ଏଭଳି ପଦକ୍ଷେପ ନିଆଯାଉଛି। ଖୁବ୍ ଶୀଘ୍ର ଏନେଇ ସମସ୍ତ ପ୍ରକ୍ରିୟା ସହ ଗୋଶାଳା ନିର୍ମାଣ କରାଯିବ। ବାହାରେ ଗୋରୁମାନେ ପଲିଥିନ୍ଠାରୁ ଆରମ୍ଭ କରି ପ୍ଲାଷ୍ଟିକ୍, ଅଇଁଠା ଆଦି ଖାଉଛନ୍ତି। ମାତ୍ର ସେଠାରେ ସେମାନଙ୍କୁ ଭଲ ଖାଇବା ଦିଆଯିବା ସହ ଉପଯୁକ୍ତ ଯତ୍ନ ନିଆଯିବ। ପ୍ରାୟ ୪/୫ ହଜାର ଗୋରୁ ରହିବା ଭଳି ବ୍ୟବସ୍ଥା କରାଯିବ ବୋଲି କମିଶନର ସୂଚନା ଦେଇଛନ୍ତି।
