କୋଲକାତା,୨୪।୧୨: ସ୍ବପ୍ନର ସହର କୋଲକାତା। ଭିକ୍ଟୋରିଆ ମେମୋରିଆଲ, ହାଓ୍ବଡା ବ୍ରିଜ, ରସଗୋଲା, ଟ୍ରାମ ଏବଂ ହଳଦିଆ ଟାକ୍ସି ଆଦି ଏହାର ପରିଚୟ ବୋଲି କୁହାଯାଏ। ଏସବୁ ମଧ୍ୟରୁ ସହରବାସୀଙ୍କ ହୃଦୟର ନିକଟତର ଥିବା ‘ହଳଦିଆ ଟ୍ୟାକ୍ସି’ ଇତିହାସ ପାଲଟିବାକୁ ଯାଉଛି। କହିବାର ତାତ୍ପର୍ଯ୍ୟ ଖୁବ୍ଶୀଘ୍ର କୋଲକାତାର ରାସ୍ତାରେ ଆଉ ଏହି ଟ୍ୟାକ୍ସି ନଜର ଆସିବ ନାହିଁ। ଚଳିତ ବର୍ଷ ସେପ୍ଟେମ୍ବରରେ ପଶ୍ଚିମବଙ୍ଗ ସରକାର କୋଲକାତାର ଐତିହାସିକ ଟ୍ରାମ୍କୁ ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି। ୧୮୭୩ରେ କୋଲକାତାରେ ଏହି ଟ୍ରାମ୍ର ଆରମ୍ଭ ହୋଇଥିଲା। ଏହାର ଲୋକଙ୍କ ସହ ୧୫୦ ବର୍ଷର ସମ୍ପର୍କ ରହିଛି।
କୋଲକାତାବାସୀଙ୍କ ଜୀବନରେ ‘ହଳଦିଆ ଟ୍ୟାକ୍ସିର ସ୍ଥାନ ସ୍ବତନ୍ତ୍ର। ପରିବାର ନଚେତ ବନ୍ଧୁଙ୍କ ସହ ଯାତ୍ରା ହେଉ, ଏହି ଟ୍ୟାକ୍ସି ସହ ସ୍ମୃତି ଅନେକେ। ହେଲେ ଏବେ ରାସ୍ତାରୁ ଗାଡ଼ି କମ୍ ହୋଇଯିବ। ଏଣୁ ଲୋକେ ତାକୁ ଝୁରି ହେବା ସ୍ବାଭାବିକ।
ମାର୍ଚ୍ଚ, ୨୦୨୫ ମଧ୍ୟରେ ପ୍ରାୟ ୮୦% ହଳଦିଆ ଟ୍ୟାକ୍ସି କୋଲକାତା ରାସ୍ତାରୁ ହଟାଯିବ। ଏହା ପଛର କାରଣଟି ହେଲା ଗାଡ଼ିଗୁଡ଼ିକ ୧୫ ବର୍ଷର ସର୍ଭିସ ପିରିଏଡ୍ ପୂରଣ କରିଛି। ଏଥିଲାଗି ରାଜ୍ୟର ପରିବହନ ବିଭାଗ ପ୍ରଦୂଷଣ ନିୟନ୍ତ୍ରଣକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନେଇଛନ୍ତି। କେବଳ ଏତିକି ନୁହେଁ ଟ୍ୟାକ୍ସି ଗୁଡ଼ିକର ପ୍ରଡକ୍ସନ ବନ୍ଦ ହୋଇଥିବାରୁ ୨୦୨୭ ମଧ୍ୟରେ ଏସବୁ ଆମ୍ବାସାଡାର ଟ୍ୟାକ୍ସି ସହରରୁ ଗାଏବ ହୋଇଯିବ ବୋଲି କୁହାଯାଉଛି।
କହିରଖୁଛୁ, ୧୫ ବର୍ଷରୁ ଅଧିକ ପୁରୁଣା ଯାନବାହାନଗୁଡ଼ିକୁ ରାସ୍ତାରୁ ହଟାଇବାକୁ ୨୦୦୯ରେ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ଏହି କାରଣରୁ ୭୦୦୦ରୁ ଅଧିକ ହଳଦିଆ ଟ୍ୟାକ୍ସି କୋଲକାତା ରାସ୍ତାରେ ନଜର ଆସିବ ନାହିଁ।
କିଏ ନିର୍ମାଣ କରିଥିଲା ହଳଦିଆ ଟ୍ୟାକ୍ସି:
୧୯୫୮ରେ ହିନ୍ଦୁସ୍ତାନ ମୋଟର୍ସ କୋଲକାତାରୁ ପ୍ରାୟ ୨୦ କିମି ଦୂରରେ ଥିବା ନିଜର କାରଖାନାରେ ଏହି ଆମ୍ବାସାଡାର ନିର୍ମାଣ କରିଥିଲା। ଏହ କାର ୧୯୫୬ର ମୋରିସ ଅକ୍ସଫୋଡ ସିରିଜ ୩ ଉପରେ ଆଧାରିତ ଥିଲା। ନିଜର ଲୁକ୍କୁ ନେଇ ଏହା ଭାରତର ଲୋକପ୍ରିୟ କାର୍ରୁ ଗୋଟିଏ ପାଲଟିଥିଲା। ଏହା କେବଳ ଗୋଟିଏ ଷ୍ଟାଟସ୍ ସିମ୍ବଲ ନ ଥିଲା, ବରଂ ସରକାରୀ ଅଫିସରଙ୍କ ପ୍ରଥମ ପସନ୍ଦ ଥିଲା।
