ପୁଣେ,୯।୧: ଆଇସିଆଇସିଆଇ ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚର ଏବଂ ତାଙ୍କ ବ୍ୟବସାୟୀ ସ୍ବାମୀ ଦୀପକ କୋଚରଙ୍କୁ ବମ୍ବେ ହାଇକୋର୍ଟ ଜାମିନ ପ୍ରଦାନ କରିଛନ୍ତି। ଆଇସିଆଇସିଆଇ ଋଣ ସ୍କାମ ମାମଲାର ଶୁଣାଣି ବେଳେ କୋର୍ଟ କହିଛନ୍ତି, ଗିରଫ ଆଇନ ଅନୁଯାୟୀ ନୁହେଁ। ଏହି ଦମ୍ପତିଙ୍କୁ ଗିରଫ କରିବା ସିଆରପିଏସ୍ର ଧାରା ୪୧ଏର ଆଦେଶ ଅନୁଯାୟୀ ହୋଇନାହିଁ।
ଆଇସିସିଆଇ ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚର ଏବଂ ଦୀପକ କୋଚରଙ୍କୁ ପ୍ରତ୍ୟେକଙ୍କୁ ନଗଦ ୧ ଲକ୍ଷ ଟଙ୍କା ଜାମିନରେ ମୁକ୍ତ କରିବାକୁ କୋର୍ଟ ଅନୁମତି ଦେଇଛନ୍ତି। ତାଙ୍କ ଜାମିନକୁ ସିବିଆଇ ବିରୋଧ କରିଛି।
ଆଇସିଆଇସିଆଇ ବ୍ୟାଙ୍କ-ଭିଡିଓକନ ଋଣ ଠକେଇ ମାମଲାରେ ସିବିଆଇ କୋଚର ଦମ୍ପତିଙ୍କୁ ଗିରଫ କରିଥିଲା। ଏହା ପରେ ଭିଡିଓକନ ପ୍ରମୋଟର୍ ଭେନୁଗୋପାଲ ଧୁତ ମଧ୍ୟ ସମାନ ମାମଲାରେ ଗିରଫ ହୋଇଥିଲେ। ଏହି ତିନିଜଣ ବର୍ତ୍ତମାନ ନ୍ୟାୟିକ ହେପାଜତରେ ଅଛନ୍ତି।
ଅଭିଯୋଗ ଅନୁଯାୟୀ, ଆଇସିଆଇସିଆଇ ବ୍ୟାଙ୍କର ପୂର୍ବତନ ସିଇଓ ଚନ୍ଦା କୋଚର ବ୍ୟାଙ୍କର ନିୟମ ଉଲ୍ଲଂଘନ କରି ଭିଡିଓକନ ଗ୍ରୁପକୁ ୩,୨୫୦ କୋଟି ଟଙ୍କା ଋଣ ଦେଇଛନ୍ତି। ଭିଡିଓକନ ଗ୍ରୁପ ଆଇସିଆଇସିଆଇ ବ୍ୟାଙ୍କରୁ ଋଣ ପାଇବା ପରେ ଧୁତ ୨୦୧୨ରେ ନୁପୱାର୍ ରିନ୍ୟୁଆଲ ପିଭି ଲିମିଟେଡ (ଏନଆରପିଏଲ୍) ରେ କୋଟି କୋଟି ଟଙ୍କା ବିନିଯୋଗ କରିଥିବା ଅଭିଯୋଗ ହୋଇଛି। ଆଇସିସିଆଇରୁ ଋଣ ପାଇବା ପରେ ଚନ୍ଦା କୋଚରଙ୍କ ସ୍ବାମୀ ଦୀପକ କୋଚର ଏବଂ ଦୁଇ ସମ୍ପର୍କୀୟଙ୍କ ସହ ଧୁତ ଏହି ଫାର୍ମ ଆରମ୍ଭ କରିଥିଲେ। ଜଣେ ଅଜ୍ଞାତ ସୂଚନାଦାତାଙ୍କ ଅଭିଯୋଗ ପରେ ମାମଲା ସାମ୍ନାକୁ ଆସିଥିଲା।
