ଦୁବାଇ,୧୦।୩(ପି.ଟି.): ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ମହିଳା ଟି୨୦ ର଼୍ୟାଙ୍କିଙ୍ଗ୍ରେ ଭାରତୀୟ ବ୍ୟାଟିଂ ସେନସେଶନ ଶେଫାଳୀ ବର୍ମା ଗୋଟିଏ ସ୍ଥାନ ଉପରକୁ ଉଠି ଦ୍ୱିତୀୟ ସ୍ଥାନ ଅଧିକାର କରିଛନ୍ତି। ଅନ୍ୟପଟେ ଉପଅଧିନାୟିକା ସ୍ମୃତି ମାନ୍ଧନା ୭ ସ୍ଥାନରେ ପୂର୍ବପରି ସ୍ଥିର ରହିଛନ୍ତି। ଶେଫାଳୀ ୭୪୪ ରେଟିଂ ପଏଣ୍ଟ ପାଇଥିବା ବେଳେ ଅଷ୍ଟ୍ରେଲିଆର ବେଥ୍ ମୁନି ୭୪୮ ପଏଣ୍ଟ ପାଇ ଶୀର୍ଷରେ ରହିଛନ୍ତି। ମାନ୍ଧନା ୬୯୩ ପଏଣ୍ଟ ପାଇଛନ୍ତି। ସେହିପରି ଜେମିମା ରୋଡ୍ରିଗ୍ବେଜ ୬୪୩ ପଏଣ୍ଟ ପାଇ ୯ମ ସ୍ଥାନରେ ସ୍ଥିର ରହିଛନ୍ତି। ଏଥିସହ ଟପ୍- ୧୦ରେ ଦଶଜଣ ଭାରତୀୟ ମହିଳା ସ୍ଥାନ ପାଇଛନ୍ତି। ନ୍ୟୁଜିଲାଣ୍ଡର ସୋଫି ଡେଭିନ୍ ତୃତୀୟ, ଅଷ୍ଟ୍ରେଲିଆର ମେଗ୍ ଲାନିଂ ଚତୁର୍ଥ ଓ ଅଲିସା ହିଲି ଗୋଟିଏ ସ୍ଥାନ ଉପରକୁ ଉଠି ୫ମ ସ୍ଥାନରେ ରହିଛନ୍ତି।
ବୋଲିଂ ତାଲିକାରେ ଅଲରାଉଣ୍ଡର ଦୀପ୍ତି ଶର୍ମା ଷଷ୍ଠ, ସ୍ପିନର ରାଧା ଯାଦବ ଅଷ୍ଟମ ଓ ପୁନମ ଯାଦବ ୯ମ ସ୍ଥାନରେ ରହି ଟପ୍-୧୦ରେ ସ୍ଥାନ ପାଇଛନ୍ତି। ଇଂଲଣ୍ଡ ସୋଫି ଇକ୍ଲେଷ୍ଟୋନ ୭୯୯ ପଏଣ୍ଟ ପାଇ ଶୀର୍ଷରେ ରହିଥିବା ବେଳେ ଦକ୍ଷିଣ ଆଫ୍ରିକାର ଶମନିମ ଇସ୍ମାଇଲ ୭୬୪ ପଏଣ୍ଟ ପାଇ ଦ୍ୱିତୀୟ ସ୍ଥାନରେ ରହିଛି। ଇଂଲଣ୍ଡର ସାରା ଗ୍ଲେନ ୭୫୫, ଅଷ୍ଟ୍ରେଲିଆର ମେଗାନ ସ୍କଟ ୭୫୩ ଓ ଜେଶ୍ ଜୋନାସିନ ୭୩୦ ପଏଣ୍ଟ ପାଇ ଶ୍ରେଷ୍ଠ-୫ରେ ସ୍ଥାନିତ ହୋଇଛନ୍ତି।
ସେହିପରି ଅଲରାଉଣ୍ଡର ତାଲିକାରେ ଏକମାତ୍ର ଭାରତୀୟ ଭାବେ ଦୀପ୍ତି ସ୍ଥାନ ପାଇଛନ୍ତି। ସେ ୩୦୨ ପଏଣ୍ଟ ପାଇ ଚତୁର୍ଥ ସ୍ଥାନରେ ରହିଛନ୍ତି। ଗତ ଗୋଟିଏ ବର୍ଷ ହେବ ଭାରତ ଗୋଟିଏ ହେଲେ ବି ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳିନାହିଁ। ଏହାପୂର୍ବରୁ ୨୦୨୦ ମାର୍ଚ୍ଚ ୮ରେ ଭାରତ ଟି୨୦ ବିଶ୍ୱକପ୍ ଫାଇନାଲରେ ଅଷ୍ଟ୍ରେଲିଆକୁ ଶେଷଥର ପାଇଁ ଭେଟିଥିଲା। ଭାରତ ଏବେ ଭ୍ରମଣକାରୀ ଦକ୍ଷିଣ ଆଫ୍ରିକା ବିପକ୍ଷରେ ମାର୍ଚ୍ଚ ୨୦ରେ ଏକ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ ଖେଳିବାର କାର୍ଯ୍ୟକ୍ରମ ରହିଛି।
