ଦୁବାଇ,୩।୧୦(ପି.ଟି.): ଅନ୍ତର୍ଜାତୀୟ କ୍ରିକେଟ କାଉନସିଲ୍ (ଆଇସିସି) ମହିଳା ଟି୨୦ ଦଳୀୟ ର଼୍ୟାଙ୍କିଙ୍ଗ୍ରେ ଭାରତୀୟ ଦଳ ନ୍ୟୁଜିଲାଣ୍ଡକୁ ପଛରେ ପକାଇ ତୃତୀୟ ସ୍ଥାନକୁ ଉଠିଛି। ସେହିପରି ଦିନିକିଆ ଦଳୀୟ ର଼୍ୟାଙ୍କିଙ୍ଗ୍ରେ ଭାରତୀୟ ମହିଳା ଦଳ ପୂର୍ବପରି ଦ୍ୱିତୀୟ ସ୍ଥାନ ବଜାୟ ରଖିଛି। ଶୁକ୍ରବାର ପ୍ରକାଶିତ ଏହି ଟି୨୦ ତାଲିକାରେ ଅଷ୍ଟ୍ରେଲିଆ ଶୀର୍ଷ ସ୍ଥାନରେ ରହିଥିବା ବେଳେ ଇଂଲଣ୍ଡ ଦ୍ୱିତୀୟ ସ୍ଥାନରେ ରହିଛି। ଅଷ୍ଟ୍ରେଲିଆ ୨୯୧ ଓ ଇଂଲଣ୍ଡ ୨୮୦ ପଏଣ୍ଟ ହାସଲ କରିଛନ୍ତି। ଭାରତ ୨୭୦ ପଏଣ୍ଟ ହାସଲ କରିଛି। ଚଳିତ ବର୍ଷ ଟି୨୦ ବିଶ୍ୱକପ୍ରେ ଭାରତ ଫାଇନାଲରେ ପ୍ରବେଶ କରିଥିଲା। ତେବେ ନ୍ୟୁଜିଲାଣ୍ଡ ମାତ୍ର ଗୋଟିଏ ପଏଣ୍ଟ ପଛରେ ରହି ୨୬୯ ପଏଣ୍ଟ ସହ ଚତୁର୍ଥ ସ୍ଥାନରେ ରହିଛି।
ର଼୍ୟାଙ୍କିଙ୍ଗ୍ରେ ବ୍ରାଜିଲ୍ ସବୁଠାରୁ ଲମ୍ବା ଡିଆଁ ମାରିଛି। ୧୫ ରେଟି ପଏଣ୍ଟ ଲାଭ କରି ବ୍ରାଜିଲ ୧୧ଟି ସ୍ଥାନ ଉପରକୁ ଉଠି ୨୭ତମ ସ୍ଥାନ ଅଧକାର କରିଛି। ମାଲେସିଆ ୩୧ରୁ ୩୮ତମ ସ୍ଥାନକୁ ଖସିଛି। ସାମୋଆ ଦୁଇଟି ସ୍ଥାନ ଉପରକୁ ଉଠି ୧୬ତମ ସ୍ଥାନରେ ରହିଛି। ଇଣ୍ଡୋନେସିଆ ଦୁଇଟି ସ୍ଥାନ ଉପରକୁ ଉଠି ୨୦, ଆମେରିକା ୪ଟି ସ୍ଥାନ ଉପରକୁ ଉଠି ୩୧ତମ ସ୍ଥାନ ଅଧିକାର କରିଛନ୍ତି। ର଼୍ୟାଙ୍କିଙ୍ଗ୍ ତାଲିକାରୁ ଡେନ୍ମାର୍କ, ବେଲଜିୟମ, କାତାର ବାଦ୍ ପଡିଛନ୍ତି। ଏହି ଦେଶଗୁଡିକ ଆବଶ୍ୟକ ସଂଖ୍ୟାରେ ମ୍ୟାଚ୍ ଖେଳି ନ ଥିବାରୁ ତାଲିକାରୁ ବାଦ୍ ପଡିଛନ୍ତି।
ଦିନିକିଆ ର଼୍ୟାଙ୍କିଙ୍ଗ୍ରେ ଭାରତର ଦ୍ୱିତୀୟ ସ୍ଥାନ ବଜାୟ
ଅପରପକ୍ଷରେ ଦିନିକିଆ ର଼୍ୟାଙ୍କିଙ୍ଗ୍ରେ ଭାରତ ଦଳୀୟ ତାଲିକାରେ ଦ୍ୱିତୀୟ ଓ ଇଂଲଣ୍ଡ ତୃତୀୟ ସ୍ଥାନ ବଜାୟ ରଖିଛନ୍ତି। ତେବେ ଉଭୟଦେଶ ୪ ଲେଖାଏଁ ପଏଣ୍ଟ ହରାଇଛନ୍ତି। ୬ଥର ବିଶ୍ୱକପ୍ ଜିତିଥିବା ଓ ଆଇସିସି ମହିଳା ଚାମ୍ପିୟନଶିପ୍ର ଦୁଇଟି ସଂସ୍କରଣରେ ବଜୟୀ ହୋଇଥିବା ଅଷ୍ଟ୍ରେଲିଆ ରେଟିଂ ପିରିୟଡ୍ରେ ୨୧ରୁ ୨୦ଟି ଦିନିକିଆ ଜିତିଛି। ଫଳରେ ଅଷ୍ଟ୍ରେଲିଆ ୮ରୁ ୧୬୦ ପଏଣ୍ଟକୁ ଉନ୍ନତି କରିଛି। ଦକ୍ଷିଣ ଆଫ୍ରିକା (୧୦୭) , ନ୍ୟୁଜିଲାଣ୍ଡ (୯୪) ପଞ୍ଚମ, ଓ୍ବେଷ୍ଟଇଣ୍ଡିଜ୍ (୮୫), ପାକିସ୍ତାନ (୭୭), ବାଂଲାଦେଶ (୬୧) ଓ ଶ୍ରୀଲଙ୍କା (୪୭) ଯଥାକ୍ରମେ ଚତୁର୍ଥ, ପଞ୍ଚମ, ଷଷ୍ଠ, ସପ୍ତମ, ଅଷ୍ଟମ, ନବମ ଓ ୧୦ମ ସ୍ଥାନରେ ରହିଛନ୍ତି।
