ଦୁବାଇ, ୧୨।୩(ପି.ଟି.)- ବୁଧବାର ପ୍ରକାଶିତ ଅନ୍ତର୍ଜାତୀୟ କ୍ରିକେଟ କାଉନ୍ସିଲ୍ (ଆଇସିସି) ଟି୨୦ ର଼୍ୟାଙ୍କିଙ୍ଗ୍ରେ ଭାରତ ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛି। ଭାରତର ପଏଣ୍ଟ ୨୬୮ରେ ପହଞ୍ଚତ୍ଥିବାବେଳେ ୭ ପଏଣ୍ଟ ଆଗରେ ରହି ଇଂଲଣ୍ଡ ଶୀର୍ଷସ୍ଥାନ ବଜାୟ ରଖିଛି। ର଼୍ୟାଙ୍କିଙ୍ଗ୍ର ଦୁଇ ଶୀର୍ଷ ସ୍ଥାନୀୟ ଦଳ ଭାରତ ଓ ଇଂଲଣ୍ଡ ମଧ୍ୟରେ ୫ ମ୍ୟାଚ ବିଶିଷ୍ଟ ଟି୨୦ ସିରିଜ ଆସନ୍ତା ଶୁକ୍ରବାରଠାରୁ ଆରମ୍ଭ ହେବ। ନିକଟରେ ନ୍ୟୁଜିଲାଣ୍ଡଠାରୁ ୨-୩ରେ ସିରିଜ ହାରିଥିବା ଅଷ୍ଟ୍ରେଲିଆ ତୃତୀୟ ସ୍ଥାନକୁ ଖସି ଆସିଛି। ଭାରତ ଓ ଅଷ୍ଟ୍ରେଲିଆ ମଧ୍ୟରେ ମାତ୍ର ୧ ପଏଣ୍ଟର ବ୍ୟବଧାନ ରହିଛି। ୨୬୦ ପଏଣ୍ଟ ସହିତ ପାକିସ୍ତାନ ୪ର୍ଥ ଓ ୨୫୩ ପଏଣ୍ଟ ପାଇ ନ୍ୟୁଜିଲାଣ୍ଡ ୫ମ ସ୍ଥାନରେ ରହିଛି।
ଟି୨୦ ବ୍ୟାଟିଂ ତାଲିକାରେ ଭାରତର ଲୋକେଶ ରାହୁଲ ଗୋଟିଏ ସ୍ଥାନ ତଳକୁ ଖସି ୩ୟରେ ପହଞ୍ଚତ୍ଥିବାବେଳେ ଅଧିନାୟକ ବିରାଟ କୋହଲି କିନ୍ତୁ ୬ଷ୍ଠ ସ୍ଥାନରେ ଅପରିବର୍ତ୍ତିତ ରହିଛନ୍ତି। ଇଂଲଣ୍ଡର ଦାଓ୍ବିଦ ମଲନ ୯୧୫ ଓ ଅଷ୍ଟ୍ରେଲିଆର ଆରୋନ ଫିଞ୍ଚ୍ ୮୩୦ ପଏଣ୍ଟ ସହିତ ପ୍ରଥମ ଦୁଇସ୍ଥାନ ଅଧିକାର କରିଛନ୍ତି। ରାହୁଲ ୮୧୬ ପଏଣ୍ଟ ପାଇଛନ୍ତି। କୋହଲିଙ୍କ ପଏଣ୍ଟ ସଂଖ୍ୟା ୬୯୭ ରହିଛି। ନ୍ୟୁଜିଲାଣ୍ଡ ବିପକ୍ଷ ଶେଷ ୩ଟି ଟି୨୦ରେ ବିସ୍ଫୋରକ ପ୍ରଦର୍ଶନ ପାଇଁ ଫିଞ୍ଚ୍ ୨ଟି ସ୍ଥାନ ଉପରକୁ ଉଠିଛନ୍ତି। ଏହି ତିନୋଟି ମ୍ୟାଚରେ ସେ ଯଥାକ୍ରମେ ୬୯, ୭୯ ଓ ୩୬ ରନ କରିଥିଲେ। ନ୍ୟୁଜିଲାଣ୍ଡର ମାର୍ଟିନ ଗୁପ୍ଟିଲ ୩ଟି ସ୍ଥାନ ଉପରକୁ ଉଠି ୮ମରେ ପହଞ୍ଚତ୍ଛନ୍ତି। ଅଷ୍ଟ୍ରେଲିଆ ବିପକ୍ଷ ଟି୨୦ ସିରିଜରେ ସେ ୨ଟି ଅର୍ଦ୍ଧଶତକ ସହ ୨୧୮ ରନ କରିଥିଲେ।
ଅଷ୍ଟ୍ରେଲିଆର ଆଷ୍ଟନ ଅଗର ଓ ନ୍ୟୁଜିଲାଣ୍ଡର ଇଶ୍ ସୋଧି ଯଥାକ୍ରମେ ୧୩ ଏବଂ ୮ଟି ଉଇକେଟ ନେଇଥିବାରୁ ବୋଲିଂ ର଼୍ୟାଙ୍କିଙ୍ଗ୍ରେ ବଡ଼ ଫାଇଦା ପାଇଛନ୍ତି। ଅଗର ୪ ସ୍ଥାନ ଉପରକୁ ଉଠି ୪ର୍ଥ ଏବଂ ସୋଧି ୩ ସ୍ଥାନ ଲମ୍ଫମାରି ୮ମ ସ୍ଥାନକୁ ଉନ୍ନୀତ ହୋଇଛନ୍ତି। ତେବେ ଟିମ୍ ସୌଥି ୩ ସ୍ଥାନ ତଳକୁ ଖସି ୯ମ ଓ ଆଡାମ ଜାମ୍ପା ଗୋଟିଏ ସ୍ଥାନ ହରାଇ ୬ଷ୍ଠକୁ ଖସିଛନ୍ତି। ଓ୍ବେଷ୍ଟଇଣ୍ଡିଜ ବିପକ୍ଷ ସିରିଜରେ ୬ ଉଇକେଟ ନେଇଥିବା ଶ୍ରୀଲଙ୍କାର ବାମହାତୀ ସ୍ପିନର ଲକ୍ଷଣ ସନ୍ଦକନ ୯ଟି ସ୍ଥାନ ଉପରକୁ ଉଠି ୧୦ମ ସ୍ଥାନ ଅଧିକାର କରିଛନ୍ତି।
