ଦୁବାଇ, ୨୪ା୩ (ପି.ଟି.)-ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ମହିଳା ଟି୨୦ ର଼୍ୟାଙ୍କିଙ୍ଗ ତାଲିକା ପ୍ରକାଶ ପାଇଛି। ଏଥିରେ ଭାରତର ସ୍ବଳ୍ପ ବୟସ୍କା ବିସ୍ଫୋରକ ବ୍ୟାଟ୍ସଓମ୍ୟାନ ଶେଫାଳି ବର୍ମା ଶୀର୍ଷ ସ୍ଥାନକୁ ଫେରିଛନ୍ତି। ଦକ୍ଷିଣ ଆଫ୍ରିକା ବିପକ୍ଷ ଚଳିତ ଘରୋଇ ସିରିଜରେ ଚମତ୍କାର ପ୍ରଦର୍ଶନ ଯୋଗୁ ଶେଫାଳିଙ୍କ ପଦୋନ୍ନତି ଘଟିଛି। ଏହି ୧୭ ବର୍ଷୀୟା ବ୍ୟାଟର ଗତବର୍ଷ ଅଷ୍ଟ୍ରେଲିଆରେ ଅନୁଷ୍ଠିତ ଟି୨୦ ବିଶ୍ୱକପ୍ରେ ଭାରତକୁ ନକ୍ଆଉଟ ପର୍ଯ୍ୟାୟରେ ପହଞ୍ଚାଇବାରେ ପ୍ରମୁଖ ଭୂମିକା ଗ୍ରହଣ କରିବା ପରେ ପ୍ରଥମ ଥର ନମ୍ବର ଓ୍ବାନ ସ୍ଥାନ ଅଧିକାର କରିଥିଲେ। ଦକ୍ଷିଣ ଆଫ୍ରିକା ବିପକ୍ଷରେ ୨୩ ଓ ୪୭ ରନ ସଂଗ୍ରହ କରିବା ପରେ ସେ ଅଷ୍ଟ୍ରେଲିଆର ବେଥ ମୁନିଙ୍କୁ ହଟାଇ ପୁଣି ନମ୍ବର ଓ୍ବାନକୁ ଫେରିଛନ୍ତି। ର଼୍ୟାଙ୍କିଙ୍ଗ ତାଲିକାରେ ପଦୋନ୍ନତି ପାଇଥିବା ଅନ୍ୟ ଜଣେ ଖେଳାଳି ହେଲେ ଦକ୍ଷିଣ ଆଫ୍ରିକା ଓପନର ଲିଜେଲିି ଲି’। ଏହି ବିସ୍ଫୋରକ ଓପନର ଗତ ସପ୍ତାହରେ ଅନ୍ତର୍ଜାତୀୟ ଦିନିକିଆ ର଼୍ୟାଙ୍କିଙ୍ଗର ପ୍ରଥମ ସ୍ଥାନ ହରାଇଥିଲେ। ଇଂଲଣ୍ଡର ଟାମି ବିମଣ୍ଟ ଏହି ସ୍ଥାନ ଅଧିକାର କରିନେଇଥିଲେ। ଭାରତ ବିପକ୍ଷରେ ମ୍ୟାଚ ବିଜୟୀ ୭୦ ରନ ପାଇଁ ସେ ୩ ସ୍ଥାନ ଉପରକୁ ଉଠିପାରିଛନ୍ତି। ଅର୍ଥାତ ୧୧ତମ ସ୍ଥାନରେ ପହଞ୍ଚତ୍ଛନ୍ତି। ବ୍ୟାଟିଂ ତାଲିକାରେ ଉପରକୁ ଉଠିଥିବା ଦକ୍ଷିଣ ଆଫ୍ରିକାର ଅନ୍ୟ ଖେଳାଳିମାନଙ୍କ ମଧ୍ୟରେ ଅଛନ୍ତି ଲାଉରା ବଲଭାଡର୍ଟ। ସେ ୫ ସ୍ଥାନ ପଦୋନ୍ନତି ପାଇଁ ୨୪ତମ ସ୍ଥାନରେ ପହଞ୍ଚତ୍ଛନ୍ତି। ଭାରତୀୟ ଦଳର ଦୀପ୍ତି ଶର୍ମା ୪ ସ୍ଥାନ ଉପରକୁ ଉଠି ୪୦ତମ ସ୍ଥାନରେ ପହଞ୍ଚତ୍ଛନ୍ତି। ବାମହାତୀ ସ୍ପିନର ରାଜେଶ୍ୱରୀ ଗାଏକ୍ୱାଡ ୩୪ତମ ସ୍ଥାନରୁ ୨୫ତମ ସ୍ଥାନକୁ ପଦୋନ୍ନତି ପାଇଛନ୍ତି। ଅନ୍ତର୍ଜାତୀୟ ଦିନିକିଆ ର଼୍ୟାଙ୍କିଙ୍ଗରେ ମଧ୍ୟ କିଛି ଉଲ୍ଲେଖନୀୟ ପରିବର୍ତ୍ତନ ଦେଖାଯାଇଛି। ଅପରାଜିତ ୭୯ ରନ ପାଇଁ ଭାରତ ଅଧିନାୟିକା ତଥା ପୂର୍ବତନ ନମ୍ବର ଓ୍ବାନ ବ୍ୟାଟର ମିଥାଲି ରାଜ ଗୋଟିଏ ସ୍ଥାନ ଉପରକୁ ଉଠି ୮ମ ସ୍ଥାନ ଅଧିକାର କରିଛନ୍ତି। ପ୍ରିୟା ପୁନିଆ ୫ ସ୍ଥାନ ପଦୋନ୍ନତି ପାଇ ୫୩ତମ ସ୍ଥାନରେ ରହିଛନ୍ତି। ବୋଲରଙ୍କ ମଧ୍ୟରେ ଗାଏକ୍ୱାଡ ୮ ସ୍ଥାନ ପଦୋନ୍ନତି ସହ ୩୮ତମ ସ୍ଥାନରେ ପହଞ୍ଚତ୍ଛନ୍ତି। ୪-୧ରେ ସିରିଜ ବିଜୟ ଦ୍ୱାରା ଦକ୍ଷିଣ ଆଫ୍ରିକା ଇଂଲଣ୍ଡକୁ ଅତିକ୍ରମ କରି ଅନ୍ତର୍ଜାତୀୟ ଦିନିକିଆ ଟିମ୍ ର଼୍ୟାଙ୍କିଙ୍ଗରେ ଦ୍ୱିତୀୟ ସ୍ଥାନରେ ପହଞ୍ଚତ୍ଛି। ଅନ୍ୟପକ୍ଷରେ ଭାରତ ପୂର୍ବଭଳି ଚତୁର୍ଥ ସ୍ଥାନ ବଜାୟ ରଖିଛି।
