ଦୁବାଇ,୪।୩(ପି.ଟି.): ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଟି୨୦ ର଼୍ୟାଙ୍କିଙ୍ଗ୍ରେ ଭାରତୀୟ ବ୍ୟାଟ୍ସମ୍ୟାନ ଲୋକେଶ ରାହୁଲ ଦ୍ୱିତୀୟ ସ୍ଥାନ ବଜାୟ ରଖିଥିବା ବେଳେ ଅଧିନାୟକ ବିରାଟ କୋହଲି ଗୋଟିଏ ସ୍ଥାନ ଉପରକୁ ଉଠି ଷଷ୍ଠ ସ୍ଥାନ ଅଧିକାର କରିଛନ୍ତି। ବୁଧବାର ପ୍ରକାଶିତ ର଼୍ୟାଙ୍କିଙ୍ଗ୍ରେ ରାହୁଲ ୮୧୬ ପଏଣ୍ଟ ହାସଲ କରି ଦ୍ୱିତୀୟ ସ୍ଥାନରେ ରହିଥିବା ବେଳେ ଇଂଲଣ୍ଡର ଡେଭିଡ୍ ମଲାନ ୯୧୫ ପଏଣ୍ଟ ହାସଲ କରି ବ୍ୟାଟିଂ ତାଲିକାର ଶୀର୍ଷ ସ୍ଥାନରେ ରହିଛନ୍ତି। ତେବେ କୋହଲି ୬୯୭ ପଏଣ୍ଟ ହାସଲ କରିଛନ୍ତି। ପାକିସ୍ତାନ ଅଧିନାୟକ ବାବର ଆଜମ ଗୋଟିଏ ସ୍ଥାନ ଉପରକୁ ଉଠି ତୃତୀୟରେ ରହିଛନ୍ତି। ଅଷ୍ଟ୍ରେଲିଆ ଅଧିନାୟକ ଆରୋନ ଫିଞ୍ଚ୍ ଚତୁର୍ଥ ସ୍ଥାନକୁ ଖସିଛନ୍ତି। ଦକ୍ଷିଣ ଆଫ୍ରିକାର ଭାନ ଡେର ଡୁସେନ ଗୋଟିଏ ସ୍ଥାନ ଉପରକୁ ଉଠି ପଞ୍ଚମରେ ରହିଛନ୍ତି।
ପ୍ରଥମ ଦୁଇଟି ଟି୨୦ ମ୍ୟାଚ୍ ପରେ ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ ଖେଳାଳିମାନେ ର଼୍ୟାଙ୍କିଙ୍ଗ୍ରେ ଆଖିଦୃଶିଆ ଉନ୍ନତି କରିଛନ୍ତି। ନ୍ୟୁଜିଲାଣ୍ଡ ବାମହାତୀ ବ୍ୟାଟ୍ସମ୍ୟାନ ଡେଭନ କନ୍ଓ୍ବେ ଦମ୍ଦାର ପ୍ରଦର୍ଶନ କରି ୪୬ଟି ସ୍ଥାନ ଉପରକୁ ଉଠି ୧୭ତମ ସ୍ଥାନରେ ରହିଛନ୍ତି। ଅଭିଜ୍ଞ ମାର୍ଟିନ ଗୁପ୍ଟିଲ ୩ଟି ସ୍ଥାନ ଉପରକୁ ଉଠି ୧୧ତମ ସ୍ଥାନରେ ରହିଛନ୍ତି।
ଅଷ୍ଟ୍ରେଲିଆର ମାର୍କସ ଷ୍ଟୋଇନିସ୍ ୭୭ଟି ସ୍ଥାନ ଉପରକୁ ଉଠି ୧୧୦ତମ ସ୍ଥାନ ଅଧିକାର କରିଛନ୍ତି। ସେହିପରି ମାଥ୍ୟୁ ଓ୍ବେଡ୍ ୧୧୮ ତମ ସ୍ଥାନକୁ ଉନ୍ନତି କରିଛନ୍ତି। ବୋଲିଂ ର଼୍ୟାଙ୍କିଙ୍ଗ୍ରେ ଶ୍ରେଷ୍ଠ ୫ଟି ସ୍ଥାନରେ କୌଣସି ପରିବର୍ତ୍ତନ ହୋଇନାହିଁ। ଆଫଗାନ ସ୍ପିନର ରସିଦ୍ ଖାଁ ୭୩୬ ପଏଣ୍ଟ ପାଇ ଶୀର୍ଷରେ ରହିଛନ୍ତି। ଦକ୍ଷିଣ ଆଫ୍ରିକାର ତାବରେଜ ସାମ୍ସି, ଆଫଗାନିସ୍ତାନର ମୁଜିବ ଉର ରହମାନ, ଇଂଲଣ୍ଡର ଆଦିଲ ରସିଦ ଓ ଅଷ୍ଟ୍ରେଲିଆର ଆଡାମ ଜାମ୍ପା ପ୍ରଥମ ୫ଟି ସ୍ଥାନ ଅଧିକାର କରିଛନ୍ତି। ବୋଲିଂ ତାଲିକାର ଟପ୍-୧୦ରେ କୌଣସି ଭାରତୀୟ ସ୍ଥାନ ପାଇନାହାନ୍ତି। ନ୍ୟୁଜିଲାଣ୍ଡ ଅଭିଜ୍ଞ ଦ୍ରୁତ ବୋଲର ଟିମ୍ ସୌଦି ଗୋଟିଏ ସ୍ଥାନ ଉପରକୁ ଉଠି ଷଷ୍ଠରେ ରହିଛନ୍ତି। ସେହିପରି ମିଚେଲ ସାଣ୍ଟନର ୨ଟି ସ୍ଥାନ ଉପରକୁ ଉଠି ସପ୍ତମ, ଇସ୍ ସୋଧି ୩ଟି ସ୍ଥାନ ଉପରକୁ ଉଠି ୧୧ ଓ ଟ୍ରେଣ୍ଟ ବୋଲ୍ଟ ୨୪ଟି ସ୍ଥାନ ଉପରକୁ ଉଠି ୪୯ତମ ସ୍ଥାନରେ ରହିଛନ୍ତି। ଅଷ୍ଟ୍ରେଲିଆର ଝେ ରିଚାର୍ଡସନ ଟପ୍ ୧୧୫ରେ ପ୍ରବେଶ କରିଛନ୍ତି।
