ନୂଆଦିଲ୍ଲୀ,୮।୩: ଭାରତୀୟ ଏୟାରଲାଇନ୍ ଫ୍ଲାଇଟ୍ ଆଇସି-୮୧୪କୁ ୧୯୯୯ରେ ଅପହରଣ କରି ନେଇଥିଲେ ଆତଙ୍କବାଦୀ ସଂଗଠନ ଜୈଶ-ଇ-ମହମ୍ମଦ(ଜେଇଏମ୍)ର ୫ ସଦସ୍ୟ। ଅପହରଣକାରୀଙ୍କ ମଧ୍ୟରେ ଥିବା ମିସ୍ତ୍ରି ଜାହୁର ଇବ୍ରାହିମ ଆକା ଜାମାଲିଙ୍କୁ କରାଚିରେ ଗୁଳି କରି ଜଣେ ବନ୍ଧୁକଧାରୀ ହତ୍ୟା କରିଛନ୍ତି। ତାଙ୍କ ମୃତ୍ୟୁ ଯୋଗୁ ପାକିସ୍ତାନରେ ଲୁଚିଥିବା ଫ୍ଲାଇଟ୍ ଆଇସି-୮୧୪ ଅପହରଣକାରୀଙ୍କ ସଂଖ୍ୟା ଦୁଇକୁ ଖସି ଆସିଛି।
ଆତଙ୍କବାଦୀ ନିରୋଧୀ ବିଶେଷଜ୍ଞଙ୍କ ଅନୁଯାୟୀ, ଜାହୁର ମିସ୍ତ୍ରିଙ୍କ ଅନ୍ତିମ ସଂସ୍କାରରେ ଜେଇଏମ୍ର ସିନିୟର ଲିଡର ଯୋଗଦେଇଥିଲେ। ଅପହରଣକାରୀଙ୍କ ମଧ୍ୟରୁ ଏବେ କେବଳ ଇବ୍ରାହିମ ଆଝାର ଓ ଶାହିଦ ଆଖତର ପାକିସ୍ତାନରେ ଲୁଚିଛନ୍ତି। ସେମାନେ ପାକିସ୍ତାନର ଖାଇବର ଫାକତୁନଖ୍ବା ଅଞ୍ଚଳରେ ସୁରକ୍ଷାରେ ରହୁଛନ୍ତି। ହାଇଜ୍ୟାକରଙ୍କ ମଧ୍ୟରୁ ଜଣଙ୍କର ମୃତ୍ୟୁ ସ୍ବାଭାବିକ ଥିଲା। ଅନ୍ୟ ଜଣେ ୨୦୦୧, ଡିସେମ୍ବର ୧୩ରେ ସଂସଦ ଆକ୍ରମଣ ବେଳେ ଭାରତୀୟ ସୁରକ୍ଷା ବଳ ଗୁଳିରେ ପ୍ରାଣ ହରାଇଥିଲେ।
୧୯୯୯ ଡିସେମ୍ବର ୩୧ ତାରିଖରେ ଫ୍ଲାଇଟ୍ ଆଇସି-୮୧୪କୁ ଜେଇଏମ୍ ସଦସ୍ୟ ଅପହରଣ କରି ଆଫଗାନିସ୍ତାନର କାନ୍ଧର ନେଇଯାଇଥିଲେ। ଯାତ୍ରୀଙ୍କ ଜୀବନ ବଞ୍ଚାଇବା ପାଇଁ ଭାରତ ସରକାରଙ୍କୁ ମାସୁଦ ଆଝାର ଏବଂ ଓମାର ସଇଦ ଶେଖଙ୍କୁ ଛାଡ଼ିବାକୁ ପଡ଼ିଥିଲା।
