ଜମନକିରା,୨୦।୧୦(ଡି.ଏନ୍.ଏ.): ସମ୍ବଲପୁର ଜିଲା ଜମନକିରା ଥାନା ବଡ଼ମାଳ ପଞ୍ଚାୟତ ରାଉତପଡ଼ା କଲୋନୀରେ ଘଟିଥିବା ଜଘନ୍ୟ ହତ୍ୟାକାଣ୍ଡର ଗୁରୁବାର ପର୍ଦ୍ଦାଫାଶ ହୋଇଛି। ଅଭିଯୁକ୍ତ ସ୍ବାମୀ ରଞ୍ଜନ ବାଡ଼ି(୩୦)ଙ୍କୁ ପୋଲିସ ଗିରଫ କରିଥିବା ବେଳେ ସ୍ତ୍ରୀଙ୍କୁ ହତ୍ୟା କରି ପୋତି ଦେଇଥିବା ସେ ସ୍ବୀକାର କରିଛନ୍ତି। ଏନେଇ ଜମନକିରା ଥାନା ପୋଲିସ ଏକ ହତ୍ୟା ମାମଲା ରୁଜୁ କରି ଘଟଣାର ଅଧିକ ତଦନ୍ତ ଜାରି ରଖିଛି।
ଘଟଣାସ୍ଥଳରେ ମାଜିଷ୍ଟ୍ରେଟ ଏବଂ ସାଇଣ୍ଟିଫିକ ଟିମ୍ ଉପସ୍ଥିତିରେ ପୋଲିସ ମାଟି ଖୋଳି ମୃତଦେହ ଉଦ୍ଧାର କରିଥିଲା। ପରେ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବୁର୍ଲା ଡାକ୍ତରଖାନାକୁ ପଠାଇଛି। ଅନ୍ୟପକ୍ଷେ ପୋଲିସ ରଞ୍ଜନଙ୍କ ୨ ଛୁଆଙ୍କୁ ତାଙ୍କ ବଡ ଭାଇଙ୍କ ଘରେ ଛାଡିଛି। ହେଲେ ଗ୍ରାମବାସୀ ସେମାନଙ୍କୁ ଅନାଥ ଆଶ୍ରମରେ ରଖିବା ପାଇଁ ପୋଲିସକୁ ଅନୁରୋଧ କରିଛନ୍ତିି।
ମିଳିଥିବା ସୂଚନା ମୁତାବକ, ଗତ ଦେଢ଼ ମାସ ତଳେ କରମା ପୂଜା ଦିନ ସ୍ବାମୀ ରଞ୍ଜନ ଏବଂ ସ୍ତ୍ରୀ ସାବିତ୍ରୀ ମୁଣ୍ଡାଙ୍କ(୨୫) ମଧ୍ୟରେ ପାଟିତୁଣ୍ଡ ହୋଇଥିଲା। ହେଲେ ରାତି ପ୍ରାୟ ୧୦ଟା ସମୟରେ କରମା ପୂଜା ଅବସରରେ ନାଚ ଗୀତ ଚାଲିଥିବା ବେଳେ ଉଭୟଙ୍କ ମଧ୍ୟରେ ମାରପିଟ୍ ହୋଇଥିଲା। ହେଲେ ସ୍ବାମୀ ରଞ୍ଜନଙ୍କ ଆକ୍ରମଣରେ ସ୍ତ୍ରୀ ସାବିତ୍ରୀଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ରଞ୍ଜନ ସ୍ତ୍ରୀଙ୍କ ମୃତଦେହ ଏକ ଚାଦରରେ ଘୋଡାଇ ଦେଇ ୨ ଛୁଆଙ୍କୁ ଧରି ନାଚଗୀତ ଦେଖିବାକୁ ଯାଇଥିଲେ। ହେଲେ କିଛି ସମୟ ସାଂସ୍କୃତିକ କାର୍ଯ୍ୟକ୍ରମ ଦେଖିବା ପରେ ରଞ୍ଜନ ୨ ଛୁଆଙ୍କୁ ଘରକୁ ଆଣି ଶୁଆଇ ଦେଇଥିଲେ। ପରେ ସେ ଘର ପାଖରେ ଥିବା ଏକ ଜରାଜୀର୍ଣ୍ଣ ସ୍ଥାନରେ ମାଟି ଖୋଳି ସ୍ତ୍ରୀର ମୃତଦେହକୁ ପୋତି ଦେଇ ସେ ମଧ୍ୟ ଶୋଇ ପଡ଼ିଥିଲେ।
ସକାଳେ ଛୁଆ ଓ ପଡ଼ିଶା ଲୋକେ ମା’ ସାବିତ୍ରୀଙ୍କୁ ନ ପାଇ ରଞ୍ଜନଙ୍କୁ ପଚାରିଲେ। ହେଲେ ରଞ୍ଜନ କୁଆଡେ ସାବିତ୍ରୀ ଚାଲିଯାଇଥିବା କହିଥିଲେ। ଘଟଣା ଅନୁଯାୟୀ ୯ବର୍ଷ ତଳେ ଅଭିଯୁକ୍ତ ସ୍ବାମୀ ରଞ୍ଜନ ବାହାରକୁ କାମ କରିବାକୁ ଯାଇଥିବା ବେଳେ ଜମନକିରା ଥାନା ଛେମୁଣ୍ଡା ଗାଁର ସାବିତ୍ରୀଙ୍କୁ ଭଲ ପାଇ ଘରକୁ ନେଇ ଆସିଥିଲା। ବର୍ତ୍ତମାନ ତାଙ୍କର ଗୋଟିଏ ୭ ବର୍ଷ ଓ ୫ ବର୍ଷର ୨ ଛୁଆ ଅଛନ୍ତି।
ଅନ୍ୟପକ୍ଷେ ସାବିତ୍ରୀ କେଉଁଆଡେ ଚାଳିଯାଇଥିବା ଖବର ପାଇ ବାପ ଘରେ ଲୋକେ ଖୋଜାଖୋଜି କରିଥିଲେ। ହେଲେ କୌଣସି ସନ୍ଧାନ ପାଇ ନ ଥିଲେ। ଏନେଇ ପରିବାର ଲୋକେ ଜମନକିରା ଥାନାରେ ଏକ ଲିଖିତ ଅଭିଯୋଗ କରିଥିଲେ। ପୋଲିସ ଅଭିଯୋଗକୁ ଭିତ୍ତି କରି ବୁଧବାର କଲୋନୀରେ ପହଞ୍ଚିଥିଲା। ହେଲେ ରଞ୍ଜନ ଫେରାର ହୋଇଯାଇଥିଲେ। ପରେ ଗାଁର କିଛି ଭଦ୍ରବ୍ୟକ୍ତି ଏବଂ ଦୁଇ ଜଣ ୱାର୍ଡ ସଭ୍ୟଙ୍କ ସହାୟତାରେ ପୋଲିସ ସାଦା ପୋଷାକରେ ପୁଣି ଚଢ଼ାଉ କରି ଅଭିଯୁକ୍ତଙ୍କୁ କାବୁ କରିଥିଲା। ପରେ ପୋଲିସ ରଞ୍ଜନଙ୍କୁ ଥାନାକୁ ଆଣି ପଚରାଉଚରା କରିଥିଲା। ପୋଲିସ ତଦନ୍ତ ପରେ ରଞ୍ଜନ ସ୍ତ୍ରୀ ସାବିତ୍ରୀଙ୍କୁ ହତ୍ୟା କରି ମାଟି ତଳେ ପୋତି ଦେଇଥିବା ସ୍ବୀକାର କରିଥିଲେ। ପୋଲିସ ଅଭିଯୁକ୍ତ ରଞ୍ଜନଙ୍କୁ ଧରି ଘଟଣାସ୍ଥଳରେ ପହଞ୍ଚି ମାଜିଷ୍ଟ୍ରେଟଙ୍କ ଉପସ୍ଥିତିରେ ମାଟି ଖୋଳି ମୃତଦେହ ଉଦ୍ଧାର କରିଥିଲା।
