ପାରଳାଖେମୁଣ୍ଡି,୧୭।୮(ଗିରିଧାରୀ ପରିଛା) : ଝିଅର ଚିକିତ୍ସାକୁ ନେଇ ପତ୍ନୀଙ୍କ ସହ ବଚସାରୁ ତାଙ୍କୁ ହତ୍ୟା କରିବା ମାମଲାରେ ସ୍ୱାମୀଙ୍କୁ ଆଜୀବନ କାରାଦଣ୍ଡ ହୋଇଛି । ଗଜପତି ଜିଲା ସେସନ୍ସ ଜଜ୍ ଜଗଦୀଶ ପ୍ରସାଦ ମହାନ୍ତି ସେରଙ୍ଗ ଥାନା ଅନ୍ତର୍ଗତ କୁଡିଙ୍ଗଡ଼ା ଗ୍ରାମର ଇଲାମ ଦଳବେହେରା (୬୨)ଙ୍କୁ ଦୋଷୀ ସାବ୍ୟସ୍ତ କରି ଏହି ଦଣ୍ଡାଦେଶ ଦେଇଛନ୍ତି । ଏଥିସହ ୧୫ ହଜାର ଟଙ୍କା ଜୋରିମାନା ହୋଇଛି । ଜରିମାନା ଅନାଦାୟ ହେଲେ ଅତିରିକ୍ତ ୬ ମାସ କାରାଦଣ୍ଡ ଭୋଗିବାକୁ ପଡ଼ିବ।
ଘଟଣାଟି ୨୩ ଅକ୍ଟୋବର ୨୦୨୨ର । ସେଦିନ ସକାଳ ପ୍ରାୟ ୯ଟା ସମୟରେ ଇଲାମଙ୍କ ୨୦ ବର୍ଷୀୟା ଝିଅ ଜିନନ୍ତି ଦଳବେହେରାଙ୍କୁ ଚିକିତ୍ସା ପାଇଁ ନିକଟସ୍ଥ ଡାକ୍ତରଖାନାକୁ ନେବାକୁ ତାଙ୍କ ମାଆ ବୁଢ଼ୀ ଦଳବେହେରା ସ୍ୱାମୀଙ୍କୁ କହିଥିଲେ । ଏହାକୁ ନେଇ ଦମ୍ପତିଙ୍କ ମଧ୍ୟରେ ବଚସା ହୋଇଥିଲା।
ଅଭିଯୋଗ ଅନୁସାରେ, ବଚସା ପରେ ଇଲାମ ପତ୍ନୀଙ୍କୁ ମାଡ଼ ମାରି ଘରୁ ରାସ୍ତା ପର୍ଯ୍ୟନ୍ତ ନେଇଯାଇଥିଲେ । ପରେ ତାଙ୍କ ପାଖରେ ଥିବା ଧାରୁଆ ଅସ୍ତ୍ରରେ ପତ୍ନୀଙ୍କ ଉପରେ ଆକ୍ରମଣ କରିଥିଲେ । ଗୁରୁତର ଆହତ ହୋଇ ଘଟଣାସ୍ଥଳରେ ବୁଢ଼ୀ ଦଳବେହେରାଙ୍କ ମୃତ୍ୟୁ ଘଟିଥିଲା। ଘଟଣା ପରେ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏନେଇ ମୃତକଙ୍କ ଝିଅ ଜିନନ୍ତି ଦଳବେହେରା ସେରଙ୍ଗ ଥାନାରେ ଅଭିଯୋଗ କରିଥିଲେ। ପୋଲିସ ମାମଲା ନଂ. ୮୫/୨୦୨୨ ରୁଜୁ କରି ତଦନ୍ତ ଆରମ୍ଭ କରିଥିଲା। ତତ୍କାଳୀନ ଇନ୍ସପେକ୍ଟର ଅଶୋକ କୁମାର ହାନ୍ସଦା ମାମଲାର ତଦନ୍ତ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲେ।
ମାମଲାର ଶୁଣାଣି ସମୟରେ ୧୨ ଜଣ ସାକ୍ଷୀଙ୍କ ବୟାନ ଓ ୨୫ଟି ଦସ୍ତାବିଜ କୋର୍ଟରେ ଉପସ୍ଥାପିତ ହୋଇଥିଲା। ଏସବୁ ପ୍ରମାଣକୁ ଆଧାର କରି ଜିଲା ସେସନ୍ସ ଜଜ୍ ଅଭିଯୁକ୍ତ ଇଲାମ ଦଳବେହେରାଙ୍କୁ ଭାରତୀୟ ପିଙ୍ଗଳ କୋଡ୍ର ଧାରା ୩୦୨ ଅନୁସାରେ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡ ଶୁଣାଇଛନ୍ତି ।
