ଜଳେଶ୍ୱର,୨୮।୬: ବାଲେଶ୍ୱର ଜିଲା ଜଳେଶ୍ୱର ବ୍ଲକ ଅଧୀନ ଗୋପୀମୋହନପୁର ପଞ୍ଚାୟତର ବାସୁଳିଆଗାଁରେ ଠାକୁରଙ୍କ ଭୋଗଖାଇ ଶତାଧିକ ଲୋକ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି । ଆକ୍ରାନ୍ତଙ୍କୁ ଚିକିତ୍ସା ପାଇଁ ଜିକେଭଟ୍ଟର ହସ୍ପିଟାଲରେ ଭର୍ତ୍ତି କରାଯାଇଛି।
ବାସୁଳିଆ ଗାଁରେ ୫୨ ଆଦିବାସୀ ପରିବାରର ୨୨୫ ଲୋକେ ବାସ କରନ୍ତି। ଶନିବାର ରାତିରେ ଗାଁରେ ମା’ ବାସୁଳୀଙ୍କର ପୂଜାର୍ଚ୍ଚନା ହୋଇଥିଲା । ସେଥିରେ ଚୁଡ଼ା ଓ ଫଳମୂଳ ଭୋଗ ଲାଗିଥିଲା। ରବିବାର ପୂର୍ବାହ୍ନରେ ଏସବୁ ଭୋଗ ଗାଁସାରା ବଣ୍ଟା ଯାଇଥିଲା। ଭୋଗ ଖାଇବା ପରେ ସନ୍ଧ୍ୟାରେ କିଛି ଲୋକଙ୍କ ପେଟ ବ୍ୟଥା ହେବା ସହ ଝାଡ଼ା, ବାନ୍ତି ହୋଇଥିଲା। ହେଲେ ଗାଁକୁ ରାସ୍ତା ନ ଥିବାରୁ ଆମ୍ବୁଲାନ୍ସ ଯାଇପାରି ନ ଥିଲା। ହେଲ୍ପଫର ୟୁ ଫାଉଣ୍ଡେଶନର ସଭ୍ୟମାନେ ତତ୍କ୍ଷଣାତ୍ ପହଞ୍ଚତ୍ ଆକ୍ରାନ୍ତଙ୍କୁ ଖଟିଆ ଓ ଦୋଳାରେ ବୋହି ମୁଖ୍ୟ ରାସ୍ତା ପର୍ଯ୍ୟନ୍ତ ଆସିଥିଲେ । ସେଠାରୁ ଆମ୍ବୁଲାନ୍ସରେ ଜିକେଭଟ୍ଟର ହସ୍ପିଟାଲକୁ ଅଣାଯାଇଥିଲା।
ବାଲେଶ୍ୱରରୁ ଏକ ଡାକ୍ତରୀ ଟିମ୍ ସହ ହାତୀଗଡ଼ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଭାରପ୍ରାପ୍ତ ଡା. ପ୍ରଭାସ ଚନ୍ଦ୍ର ନାୟକ, ଡା. ବିପ୍ଳବ କୁମାର ପ୍ରଧାନଙ୍କ ନେତୃତ୍ୱରେ ଜ୍ୟୋତିର୍ମୟ ଡଗର, ସନ୍ତୋଷ ମହାନ୍ତ, ପିଏଚ୍ଇଓ ଫକୀରମୋହନ ପ୍ରଧାନ, ଆଶା ସନ୍ଧ୍ୟାରାଣୀ ଜେନା ପ୍ରମୁଖ ଗାଁକୁ ଯାଇ ଚିକିତ୍ସା ଆରମ୍ଭ କରିଥିଲେ। ସୋମବାର ଗାଁରେ ୬୨ଜଣଙ୍କୁ ଚିକିତ୍ସା କରାଯାଇଥିଲା। ସେମାନଙ୍କ ମଧ୍ୟରୁ ୧୪ଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।
