କୋକସରା,୨୯ା୬(ଡି.ଏନ୍.ଏ.): କଳାହାଣ୍ଡି ଜିଲା କୋକସରା ବ୍ଲକ ବଡ଼ପୋଡ଼ାଗୁଡ଼ା ପଞ୍ଚାୟତର ବାବେକୋହରା ଓ କଛାରପଡ଼ା ଗ୍ରାମର ଶତାଧିକ ଜବ୍କାର୍ଡ ହିତାଧିକାରୀଙ୍କ ଅଜାଣତରେ ରଦ୍ଦ କରିଥିବା ଅଭିଯୋଗ ନେଇ ବୁଧବାର ଦୁଇ ଗ୍ରାମବାସୀ କୋକସରା ବିଡିଓଙ୍କ ଦ୍ୱାରସ୍ଥ ହୋଇଛନ୍ତି।
ଅଭିଯୋଗ ଅନୁସାରେ, ପଞ୍ଚାୟତ ଓ ବ୍ଲକ କର୍ମଚାରୀମାନେ ହିତାଧିକାରୀଙ୍କୁ ନ ଜଣାଇ ଶତାଧିକ ଲୋକଙ୍କ ଜବ୍କାର୍ଡକୁ ଡିଲିଟ୍ କରିଦେଇଛନ୍ତି । ଯାହା ଫଳରେ ସରକାରଙ୍କ ମନରେଗା ଯୋଜନାରେ ଏହି ଶ୍ରମିକମାନେ କାମ କରିବାରୁ ବଞ୍ଚିତ ହୋଇଛନ୍ତି। ଅନ୍ୟପଟେ ସରକାରୀ କର୍ମଚାରୀଙ୍କ ନଁାରେ ଜବ୍କାର୍ଡ ରହିଥିବା ମଧ୍ୟ ଅଭିଯୋଗ କରିଛନ୍ତି। ଯେଉଁମାନେ ପ୍ରକୃତ ଶ୍ରମିକ ବର୍ଷତମାମ କାମ କରି ପରିବାର ପ୍ରତିପୋଷଣ କରନ୍ତି ସେମାନଙ୍କ ଜବ୍କାର୍ଡକୁ ଜାଣିଶୁଣି ଡିଲିଟ୍ କରାଯାଇଛି। ଏଣୁ ଏହାର ଉଚିତ୍ ତଦନ୍ତ କରି ଗରିବ ଶ୍ରେଣୀର ଲୋକଙ୍କ ଜବ୍କାର୍ଡକୁ ପୁନଃ ଚାଲୁ କରିବା ସହ କାମ ନ କରିବା ଲୋକଙ୍କ ନାମରେ ଥିବା ଜବ୍କାର୍ଡକୁ ରଦ୍ଦ କରିବାକୁ ଦାବି କରିଛନ୍ତି। ବୁଧବାର ଓ୍ବାର୍ଡସଭ୍ୟ କୃଷ୍ଣ ଚନ୍ଦ୍ର ରାଉତ, କୈବଲ୍ୟ ନାଏକ, ଯୁବରାଜ ନାଏକ କୋକସରା ବିଡିଓ ମନୀଷା ଦାସଙ୍କୁ ହିତାଧିକାରୀ ମୀନକେତନ ମାଝି, କ୍ଷୀର ମାଝି, ବଳସିଂ ପୂଝାରୀ, କୈଲାସ ନାଏକ, ଅଭି ରାଉତ, ମକରନ୍ଦ ମାଝି, ହରିପାଳ ଗଉଡ଼, ହେମରାଜ ନାଏକ, ବସନ୍ତ କୁମାର ନାଏକଙ୍କ ସମେତ ଦୁଇ ଗ୍ରାମର ଶତାଧିକ ହିତାଧିକାରୀଙ୍କ ଦସ୍ତଖତ ସମ୍ମିଳିତ ଏକ ଅଭିଯୋଗପତ୍ର ପ୍ରଦାନ କରିଛନ୍ତି। ଅନ୍ୟପଟେ ବିଡିଓ ରଦ୍ଦ ହୋଇଥିବା ସମସ୍ତ ଜବ୍କାର୍ଡର ନକଲ କପି ଦେବାକୁ କହିବା ସହ ତଦନ୍ତ କରାଯିବ ବୋଲି କହିଥିବା ଜଣାପଡ଼ିଛି।
