ନୂଆଦିଲ୍ଲୀ, ୯ା୩ (ପି.ଟି.)-ବିବିସି ଇଣ୍ଡିଆନ ସ୍ପୋଟର୍ସଓମ୍ୟାନ ଅଫ୍ ଦି ଇୟର ପୁରସ୍କାରର ଦ୍ୱିତୀୟ ସଂସ୍କରଣ ଫଳାଫଳ ସୋମବାର ପ୍ରକାଶ ପାଇଛନ୍ତି। ବର୍ତ୍ତମାନ ରାପିଡ୍ ଫର୍ମାଟରେ ରହିଥିବା ବିଶ୍ୱ ଚାମ୍ପିୟନ କୋନେରୁ ହମ୍ପି ଏହି ପୁରସ୍କାର ଜିତିଛନ୍ତି। ମାତ୍ର ୧୫ବର୍ଷ ବୟସରେ ସର୍ବ କନିଷ୍ଠ ଖେଳାଳି ଭାବେ ଚେସ୍ ଗ୍ରାଣ୍ଡମାଷ୍ଟର ହୋଇଥିବା ହମ୍ପି ତାଙ୍କ ସମର୍ଥକଙ୍କଠାରୁ ସବୁଠାରୁ ଅଧିକ ଭୋଟ ପାଇଥିଲେ। ଏହି ସମ୍ମାନଜନକ ପୁରସ୍କାର ପାଇଁ ୪୦ଜଣିଆ ବିଚାରକମଣ୍ଡଳୀ ଗତ ମାସରେ ରେସ୍ଲର ଭିନେଶ ଫୋଗତ, ସ୍ପ୍ରିଣ୍ଟର ଓଡ଼ିଶାର ଦୂତୀ ଚାନ୍ଦ, ଶୁଟର ମନୁ ଭାକର ଏବଂ ମହିଳା ହକି ଦଳର ଅଧିନାୟିକା ରାଣୀ ରାମପାଲଙ୍କ ନାମ ସୁପାରିସ କରିଥିଲେ। ପୁରସ୍କାର ଜିତିବା ପରେ ହମ୍ପି ତାଙ୍କ ପ୍ରତିକ୍ରିୟାରେ କହିଛନ୍ତି ଏହି ପୁରସ୍କାର କେବଳ ତାଙ୍କ ପାଇଁ ନୁହେଁ ଚେସ୍ ସମୁଦାୟ ପାଇଁ ବହୁ ମୂଲ୍ୟବାନ। ଚେସ୍ ଏକ ଇନ୍ଡୋର ଗେମ୍। ଭାରତରେ କ୍ରିକେଟ ତୁଳନାରେ ଏହାର ଲୋକପ୍ରିୟତା ଅତ୍ୟନ୍ତ ନଗଣ୍ୟ। ଦୃଢ଼ ଇଚ୍ଛାଶକ୍ତି ଓ ଆତ୍ମବିଶ୍ୱାସ ବଳରେ ସେ ଚେସ୍ରେ ବହୁ ବାଟ ଆଗେଇ ପାରିଛନ୍ତି। ଜଣେ ମହିଳା ଖେଳାଳି ହିସାବରେ ସେ ବର୍ତ୍ତମାନ ଖେଳ ଛାଡ଼ିବା କଥା ଚିନ୍ତା କରିନାହାନ୍ତି। ବିବାହ ଓ ମାତୃତ୍ୱ ଲାଭ କରିବା ଜୀବନକାଳର ଏକ ଅଂଶବିଶେଷ। ଏହା ଜୀବନର ଗତିପଥ ବଦଳାଇ ଦେବ ବୋଲି ମନେ କରିବା ଉଚିତ ନୁହେଁ ବୋଲି ୪ବର୍ଷୀୟା ଶିଶୁକନ୍ୟାର ମା’ ୩୩ ବର୍ଷୀୟା ହମ୍ପି ପ୍ରକାଶ କରିଛନ୍ତି। ବିବିସି ମହାନିର୍ଦ୍ଦେଶକ ଟିମ୍ ଡେଭ୍ ଭର୍ଚୁଆଲ ପୁରସ୍କାର ଉତ୍ସବରେ ଅଧ୍ୟକ୍ଷତା କରିବା ସହ ବିଜେତାଙ୍କ ନାମ ଘୋଷଣା କରିଥିଲେ। ଚଳିତ ବର୍ଷର ଲାଇଫ୍ ଟାଇମ୍ ଆଚିଭମେଣ୍ଟ ପୁରସ୍କାର ଭେଟେରାନ ଆଥଲେଟ ଅଞ୍ଜୁ ବବି ଜର୍ଜଙ୍କୁ ମିଳିଥିଲା। ସେ ହେଉଛନ୍ତି ଭାରତର ଏକମାତ୍ର ଆଥାଲେଟ୍, ଯିଏକି ୨୦୦୩ ବିଶ୍ୱ ଚାମ୍ପିୟନଶିପ୍ ଲଙ୍ଗ ଜମ୍ପରେ ଏକ ପଦକ ଲାଭ କରିଥିଲେ। ଇଂଲଣ୍ଡ ଅଲରାଉଣ୍ଡର ବେନ୍ ଷ୍ଟୋକ୍ସ ଯୁବ ଶୁଟର ମନୁ ଭାକରଙ୍କୁ ଇମର୍ଜିଂ ପ୍ଲେୟର ଅଫ୍ ଦି ଇୟର ଘୋଷଣା କରିଥିଲେ। ଚଳିତବର୍ଷ ବିବିସି ପୁରସ୍କାରରେ ପ୍ରଥମ ଥର ଏହି କାଟେଗୋରିକୁ ସାମିଲ କରାଯାଇଛି।
