ଭୁବନେଶ୍ବର,୮ା୧୧(ବ୍ୟୁରୋ):ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବଚ୍ଛତା ଓ ସାଧୁତାର ଆହ୍ବାନକୁ ଗୃହ ବିଭାଗର ଉଚ୍ଚପଦସ୍ଥ ଅଫିସର ବେଖାତିର କରୁଛନ୍ତି। ଏ ବାବଦରେ ସରକାରଙ୍କ ପାଖରେ ତଥ୍ୟ ରହିଛି ନା ଜାଣିଶୁଣି ସରକାର ଏହାକୁ ଏଡ଼େଇ ଯାଉଛନ୍ତି ବୋଲି ଛାତ୍ର କଂଗ୍ରେସ ରାଷ୍ଟ୍ରୀୟ ସଂଯୋଜକ ଅଖିଳେଶ ଯାଦବ ପ୍ରଶ୍ନ କରିଛନ୍ତି। ଅଖିଳେଶ ସୋମବାର କଂଗ୍ରେସ ଭବନରେ ଏକ ଖବରଦାତା ସମ୍ମିଳନୀ ଜରିଆରେ କହିଛନ୍ତି, ଦୀପ୍ତେଶ ପଟ୍ଟନାୟକ ଯିଏକି ଜଣେ ଆଇପିଏସ ଅଫିସର ସେ ଅନୈତିକ କାର୍ଯ୍ୟରେ ସମ୍ପୃକ୍ତ। ସେ ସାଧାରଣ ଜନତାଙ୍କ ସେବକ। ଲୋକଙ୍କ ଟିକସ ଅର୍ଥରେ ଦରମାପ୍ରାପ୍ତ ହୁଅନ୍ତି। ମାତ୍ର ତାଙ୍କ କାର୍ଯ୍ୟକ୍ରମକୁ ଯଦି ଅନୁଧ୍ୟାନ କରାଯାଏ, ତେବେ ରାଜ୍ୟର ସାଧାରଣ ଜନତା ଏଥିରେ ଆଶ୍ଚର୍ଯ୍ୟାନ୍ବିତ ହେବେ। ସେ ରାଉରକେଲା ଏସ୍ପି ଭାବେ କାର୍ଯ୍ୟରତ ଥିବାବେଳେ ତାଙ୍କ ବିରୋଧରେ ତଦନ୍ତ କମିଶନ ବିସିଥିବା ସତ୍ତ୍ୱେ ତାଙ୍କୁ କିପରି ପଦୋନ୍ନତି ମିଳିଲା। ତାଙ୍କ ପଦୋନ୍ନତିକୁ ଆମ୍ଭେ ନୁହେଁ ରାଜ୍ୟ ଓକିଲ ସଂଘ ମଧ୍ୟ ନିନ୍ଦା କରିଛି। ସେ ଜଣେ ବିଶୃଙ୍ଖଳିତ ଅଫିସର ବୋଲି ପ୍ରମାଣିତ ହୋଇଛି। ତାଙ୍କ ବିରୋଧରେ ନାଇଡ଼ୁ କମିଶନ ତଦନ୍ତ କରୁଥିଲେ। ସରକାରୀ ନିୟମ ଉଲ୍ଲଂଘନ କରି ସେ ବାରମ୍ବାର ବିଦେଶରେ ଅୟେସ କରିଛନ୍ତି। ଏହାର ତଦନ୍ତ ନିତାନ୍ତ ହେବା ଜରୁରୀ। ଏହିସବୁ ବ୍ୟୟବହୁଳ ଜୀବନଶୈଳୀ ଉପରେ ରାଜ୍ୟ ଭିଜିଲାନ୍ସ ଓ କେନ୍ଦ୍ରର ଇଡି ବିଭାଗର ନଜର ଅଛି ନା ନାହିଁ। ତାହା ଜାଣିବା ଦରକାର। ସରକାରୀ ନିୟମ ଅନୁସାରେ ସେ ତାଙ୍କର ସମ୍ପତ୍ତି ତଥ୍ୟ ଏପର୍ଯ୍ୟନ୍ତ ସରକାରଙ୍କୁ କାହିଁକି ଦେଇ ନାହାନ୍ତି। ସରକାର ମଧ୍ୟ ଏହି ଘଟଣାରେ ନୀରବ ରହୁଛନ୍ତି। ଦୀପ୍ତେଶ ପଟ୍ଟନାୟକ ଏକ ଉଦାହରଣ ମାତ୍ର। ଏପରି ଅନେକ ଆଇପିଏସ ଓ ଆଇଏଏସ୍ ଅଫିସର ଯିଏକି ଆମ ଟିକସ ପଇସାରେ ଦରମାପ୍ରାପ୍ତ ହୁଅନ୍ତି ସେମାନେ ନିଜ ଦାୟିତ୍ୱ ତୁଲାଇବାରେ ଚରମ ଅବହେଳା ପ୍ରଦର୍ଶନ କରୁଥିବା ବେଳେ ସରକାର ସେମାନଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ନେଉନାହାନ୍ତି ବୋଲି ଯାଦବ କହିଛନ୍ତି।
