ହାତରେ ବାରମ୍ବାର ଧୂଳି, ମାଟି, ଝାଳ, ସାବୁନ ଫେଣ, ପାଣି ତଥା ସାନିଟାଇଜର୍ ଲାଗିଲେ କିମ୍ବା ଏହା ଅଧିକରୁ ଅଧିକ ସୂର୍ଯ୍ୟକିରଣ ସଂସ୍ପର୍ଶରେ ଆସିଲେ, ହାତର ଚମକ୍ ଧୀରେ ଧୀରେ କମିଯାଏ। ଯଦି ଠିକ୍ ସମୟରେ ଏଥିପ୍ରତି ଧ୍ୟାନ ନ ଦିଆଯାଏ କିମ୍ବା ହାତର ଠିକ୍ ଯତ୍ନ ନ ନିଆଯାଏ, ତା’ହେଲେ ହାତର ଚର୍ମ ଲୋଚାକୋଚା ହୋଇ କମ୍ ବୟସରେ ବି ବୟସ୍କ ଲୋକଙ୍କ ହାତପରି ଦେଖାଯାଇଥାଏ। ସେଥିପାଇଁ ହାତକୁ ହାଇଡ୍ରେଟ୍ ରଖିବା ନିହାତି ଜରୁରୀ। ସନ୍ତୁଳିତ ଆହାର ସହ ପ୍ରଚୁର ମାତ୍ରାରେ ପାଣି ପିଇଲେ ହାତକୁ ଏପରି କି ଶରୀରକୁ ଠିକ୍ ପୋଷଣ ମିଳିଥାଏ। ସେହିପରି ଯଦି ଆପଣ ହାତକୁ ସାବୁନରେ ଧୋଉଥାନ୍ତି, ତା’ହେଲେ ସାଙ୍ଗେସାଙ୍ଗେ ହାତରେ ନଡ଼ିଆ ତେଲ କିମ୍ବା ବଡିଲୋଶନ ଲଗାଇ ଦିଅନ୍ତୁ। ସୂର୍ଯ୍ୟକିରଣରେ ବାହାରକୁ ବାହାରିବା ପୂର୍ବରୁ ଶରୀରରେ ସନ୍ସ୍କ୍ରିନ୍ ଲୋଶନ ଲଗାଇବାକୁ ଆଦୌ ଭୁଲନ୍ତୁ ନାହିଁ। ଧୂଳି, ମାଟି, ଝାଳରୁ ହାତ କେମିତି ସୁରକ୍ଷିତ ରହିବ ସେ ପ୍ରତି ଧ୍ୟାନ ଦେବା ସହ ସାନିଟାଇଜର୍ର ବ୍ୟବହାର ଯେତେ ସମ୍ଭବ କମ୍ କରନ୍ତୁ। ସେହିପରି କୁହାଯାଏ, ଯେଉଁମାନେ ସ୍ମୋକିଂ କରନ୍ତି, ସେମାନଙ୍କ ହାତରେ ଖୁବ୍ ଶୀଘ୍ର ରିଙ୍କଲ୍ସ ଆସିଥାଏ। ତେଣୁ ଏସବୁ ପ୍ରତି ଯତ୍ନବାନ ହେଲେ ହାତ ସର୍ବଦା ସୁନ୍ଦର ତଥା ଆକର୍ଷଣୀୟ ଲାଗିଥାଏ।
