ନୂଆଦିଲ୍ଲୀ,୧୮।୯: ବୈବାହିକ ଜୀବନରେ ଉତ୍ଥାନ-ପତନ ଲାଗି ରହିଥାଏ। କେତେବେଳେ ପରିସ୍ଥିତି ଏପରି ହୋଇଥାଏ ଯାହାର ସମାଧାନ ବାହାରିପାରେ। କିନ୍ତୁ କେତେବେଳେ ପରିସ୍ଥିତି ଏମିତି ସୃଷ୍ଟି ହୁଏ ଯେ ବିବାହ ଆଗକୁ ବଢ଼ିପାରେ ନାହିଁ। ଶେଷରେ ଦମ୍ପତିମାନେ ଛାଡ଼ପତ୍ର ମୁହାଁ ହେଉଥିବା ଦେଖାଯାଏ। କିନ୍ତୁ ଏବେ ଏକ ନୂଆ ଟ୍ରେଣ୍ଡ ଆସିଛି। ଲୋକେ ଛାଡ଼ପତ୍ର ନେଉନାହାନ୍ତି, କିନ୍ତୁ ପତି-ପତ୍ନୀ ସମ୍ପର୍କରୁ ମୁକ୍ତ ହେଉଛନ୍ତି। ଏହି ଟ୍ରେଣ୍ଡ ଜାପାନରୁ ଆରମ୍ଭ ହୋଇଛି ଏବଂ ଧୀରେ ଧୀରେ ଅନ୍ୟ ଦେଶମାନଙ୍କରେ ମଧ୍ୟ ପ୍ରସାରିତ ହେଉଛି। ଛାଡ଼ପତ୍ର ନ ନେଇ ମଧ୍ୟ ଅଲଗା ହେବାର ଏହି ନୂଆ ଟ୍ରେଣ୍ଡକୁ ‘ମ୍ୟାରେଜ ଗ୍ରାଜୁଏସନ’ (Marriage Graduation) କୁହାଯାଉଛି। ଜାପାନରେ ଏହାକୁ ‘ସୋତ୍ସୁକନ’ (Sotsukon) କୁହାଯାଏ।
**ମ୍ୟାରେଜ ଗ୍ରାଜୁଏସନ କ’ଣ?**
ମ୍ୟାରେଜ ଗ୍ରାଜୁଏସନ ବା ସୋତ୍ସୁକନରେ ପତି-ପତ୍ନୀ ପାରସ୍ପରିକ ସହମତିରେ ଅଲଗା ହେବାର ନିଷ୍ପତ୍ତି ନିଅନ୍ତି। ଏମାନେ ଛାଡ଼ପତ୍ର ନେଇ ନ ଥାନ୍ତି, କେବଳ ଅଲଗା ଅଲଗା ଜୀବନ ଯାପନ କରିବାକୁ ନିଷ୍ପତ୍ତି ନିଅନ୍ତି। ଯେପରି ଆମେ କୌଣସି କଲେଜରେ ନାମ ଲେଖାଇ ଗ୍ରାଜୁଏଟ ହୋଇ ବାହାରି ଆସୁ, ଠିକ ସେହିପରି ଏହି ଲୋକମାନେ ବିବାହିତ ଜୀବନରୁ ମୁକ୍ତ ହୋଇଯାଆନ୍ତି, ଯାହାକୁ ମ୍ୟାରେଜ ଗ୍ରାଜୁଏସନ କୁହାଯାଉଛି।
**ମ୍ୟାରେଜ ଗ୍ରାଜୁଏସନରେ କ’ଣ ହୁଏ?**
ଏହି ପ୍ରକାର ଅଲଗା ହେବାରେ ଦମ୍ପତିଙ୍କ ମଧ୍ୟରେ ପତି-ପତ୍ନୀ ସମ୍ପର୍କ ଶେଷ ହୋଇଯାଏ। ଉଭୟେ ନିଜ ନିଜର ଖର୍ଚ୍ଚ ଓ ଦାୟିତ୍ୱ ନିଜେ ସମ୍ଭାଳନ୍ତି। କେତେବେଳେ ମ୍ୟାରେଜ ଗ୍ରାଜୁଏସନ ପରେ ଲୋକମାନେ ଗୋଟିଏ ଘରେ ରୁମମେଟ ପରି ରହନ୍ତି, ଆଉ କେତେବେଳେ ଅଲଗା ଅଲଗା ବାସସ୍ଥାନ ତିଆରି କରନ୍ତି। ତଥାପି, ଅଲଗା ହେବା ପରେ ମଧ୍ୟ ଉଭୟେ ମିଳାମିଶା କରନ୍ତି ଏବଂ ପରସ୍ପରକୁ ସାହାଯ୍ୟ କରିଥାନ୍ତି।
**ମ୍ୟାରେଜ ଗ୍ରାଜୁଏସନର ଲାଭ**
ଯଦିଓ ମ୍ୟାରେଜ ଗ୍ରାଜୁଏସନ ମଧ୍ୟ ତଲାକ ପରି ବିବାହ ଶେଷ କରିବାର ଏକ ଉପାୟ, କିନ୍ତୁ ଏହା ତଲାକଠାରୁ ବେଶ ଭିନ୍ନ। ଏହାର ସବୁଠାରୁ ବଡ଼ ଲାଭ ହେଉଛି ଏଥିରେ କୌଣସି ଆଇନଗତ ଅଡ଼ୁଆ କିମ୍ବା ଅନାବଶ୍ୟକ ଖର୍ଚ୍ଚ ହୋଇ ନ ଥାଏ। ଏଠାରେ ପତି-ପତ୍ନୀ ଅଲଗା ହେବାକୁ ଚାହୁଁଥିଲେ ଏକାଠି ବସି ନିଜ ନିଜ ପଥ ଅଲଗା କରିନିଅନ୍ତି। ମ୍ୟାରେଜ ଗ୍ରାଜୁଏସନରେ ବିବାହ ଶେଷ ହେଲେ ମଧ୍ୟ କୌଣସି ତିକ୍ତତା କିମ୍ବା ମାନସିକ ଚାପ ରହିନଥାଏ। ଲୋକେ ପାରସ୍ପରିକ ସହମତିରେ ଏକକାଳୀନ ସମ୍ପର୍କ ମଧ୍ୟ ବଜାୟ ରଖିପାରନ୍ତି।
