ଟୋକିଓ,୨୫।୭: ଅଲିମ୍ପିକ୍ସର ଶୁଟିଂ ଇଭେଣ୍ଟରେ ଭାରତର ସବୁଠୁ ବଡ଼ ଆଶା କୁହାଯାଉଥିବା ଦେଶର ନଂ ୧ ଶୁଟର ମନୁ ଭାକର ନିରାଶ ହୋଇଛନ୍ତି। ମହିଳା ୧୦ ମିଟର ଏୟାର ପିସ୍ତଲ ଶୁଟିଂ ଇଭେଣ୍ଟ ଫାଇନାଲ ପାଇଁ ରବିବାର ଅନୁଷ୍ଠିତ ଯୋଗ୍ୟତା ପର୍ଯ୍ୟାୟରେ ତାଙ୍କ ପିସ୍ତଲରେ ଦେଖାଦେଇଥିଲା ଯାନ୍ତ୍ରିକ ତ୍ରୁଟି। ଏଥି ଯୋଗୁ ତାଙ୍କୁ ପ୍ରାୟ ୨୦ ମିନିଟ୍ ହରାଇବାକୁ ପଡ଼ିଥିଲା। ଫଳରେ ଯୋଗ୍ୟତା ପର୍ଯ୍ୟାୟରୁ ଭାକରଙ୍କୁ ବିଦାୟ ନେବାକୁ ପଡ଼ିଛି।
ଆରମ୍ଭରୁ ଉନ୍ନତ ମାନର ପ୍ରଦର୍ଶନ କରିଥିଲେ ମନୁ। ହଠାତ୍ ତାଙ୍କ ପିସ୍ତଲର କକିଂ ଲିଭର ଭାଙ୍ଗି ଯାଇଥିଲା। ସେତେବେଳେ ତାଙ୍କୁ ୫୫ ମିନିଟ୍ରେ ୪୪ଟି ଶଟ୍ ମାରିବାର ଥିଲା। ପିସ୍ତଲକୁ ସଜାଡ଼ିବା ପରେ ବଳକା ଶଟ୍କୁ ଶେଷ କରିବା ପାଇଁ ତାଙ୍କ ହାତରେ ଥିଲା ମାତ୍ର ୩୬ ମିନିଟ୍। ଅବଶ୍ୟ ବଳକା ଶଟ୍ ନିର୍ଦ୍ଧାରିତ ସମୟ ମଧ୍ୟରେ ଶେଷ କରି ଦେଇଥିଲେ ଭାକର। କିନ୍ତୁ ଏହା ଯେକୌଣସି ସ୍ତରର ପ୍ରତିଯୋଗିତାରେ କଷ୍ଟକର କାର୍ଯ୍ୟ।
ସଜଡ଼ା ହେବା ପରେ ପିସ୍ତଲକୁ ଚେକ୍ କରିଥିଲେ ଜୁରି ମେମ୍ବର। କରୋନା କାରଣରୁ ଶୁଟିଂ ରେଞ୍ଜରେ ପିସ୍ତଲକୁ ଚେକ୍ କିମ୍ବା ରିପେୟାର କରିବାକୁ ଅନୁମତି ନାହିଁ। ଏଥିରେ ଆହୁରି ୪ରୁ ୫ ମିନିଟ୍ ଖର୍ଚ୍ଚ ହୋଇଥିଲା। ସାଧାରଣତଃ ପିସ୍ତଲକୁ ଚେକ୍ କରିବା ଲାଗି କିଛି ସେକେଣ୍ଡ୍ ଲାଗିଥାଏ। ଆଉ ଏଭଳି ଅସୁବିଧାର ସମ୍ମୁଖୀନ ହେବା ପରେ ମଧ୍ୟ ଆମେ ଅଧିକ ସମୟ ଦାବି କରିପାରିଲୁ ନାହିଁ। ଏଣୁ ପିସ୍ତଲ ସଜଡ଼ା ହେବା ପରେ ତୁରନ୍ତ ଶୁଟିଂ କରିବାକୁ ମନୁଙ୍କୁ କହିଥିଲି ବୋଲି ପିସ୍ତଲ କୋଚ୍ ରୋନକ ପଣ୍ଡିତ କହିଛନ୍ତି।
