ଭବାନୀପାଟଣା,୧୫।୪(ସ୍ବ.ପ୍ର.): କଳାହାଣ୍ଡି ଜିଲା ଜୟପାଟଣା ବ୍ଲକ ବଡ଼ପୁଝାରିଗୁଡା ପଞ୍ଚାୟତ ବତାସୀଗୁଡା ଗ୍ରାମର ସ୍ବର୍ଗତ ମଦନ ମାଝିଙ୍କ ପରିବାର ଏବେ ଦୁର୍ବିସହ ଜୀବନଯାପନ କରୁଛନ୍ତି। କେନ୍ଦୁଲିଭରେ କାମ କରି ପରିବାରକୁ ରୋଜଗାର ଯୋଗାଉ ଥିବା ମଦନଙ୍କ ଅକାଳ ବିୟୋଗ ପରେ ପରିବାର ଲୋକେ ଦୁଇ ଓଳି ଦୁଇ ମୁଠା ଖାଇବାରୁ ବଞ୍ଚତ୍ତ ହେଉଥିବା ଜଣାପଡିଛି। ମଦନଙ୍କ ମୃତ୍ୟୁ ପରେ ବିଭାଗୀୟ ଅଧିକାରୀଙ୍କ ପକ୍ଷରୁ ତାଙ୍କ ପରିବାରକୁ ୭ ଲକ୍ଷ ଟଙ୍କା ଆର୍ଥିକ ସହାୟତା ରାଶି ପ୍ରଦାନ ସହ ତାଙ୍କ ପୁଅ କିମ୍ବା ଝିଅଙ୍କୁ କେନ୍ଦୁପତ୍ର ଅଫିସ କାର୍ଯ୍ୟରେ ସ୍ଥାୟୀ ନିଯୁକ୍ତି ପ୍ରତିଶ୍ରୁତି ଦେଇଥିବା ପରିବାର ଲୋକେ କହିଛନ୍ତି। କିନ୍ତୁ ଦୀର୍ଘ ସମୟ ହୋଇଥିଲେ ସୁଦ୍ଧା ତାଙ୍କୁ ସହାୟତା ରାଶି କିମ୍ବା କାହାକୁ ନିଯୁକ୍ତି ଦିଆଯାଇ ନାହିଁ। ସୂଚନା ଅନୁଯାୟୀ ଲଡୁଗାଁ କେନ୍ଦୁପତ୍ର ରେଞ୍ଜ ଜୟପାଟଣା ସେକ୍ସନ ଅଧୀନ ଘୁଟ୍ରୁନାଗଫେଣି, ଏକଟାଗୁଡା, ସାନପୁଝାରିଗୁଡା ପାହାଡ଼ରେ ସ୍ବର୍ଗତ ମଦନ ଦୀର୍ଘ ବର୍ଷ ଧରି କେନ୍ଦୁପତ୍ର ବନ୍ଦେଇ ଚେକର ଭାବେ କାମ କରୁଥିଲେ। ପରିବାର କହିଲେ ତାଙ୍କ ବୁଢ଼ୀ ମା’ ଡାଲିମ୍ବ, ସ୍ତ୍ରୀ ବାଳ, ଝିଅ ତିଳୋତ୍ତମା, ବଡ଼ ପୁଅ ନୋବାସ ଓ ସାନ ପୁଅ ଜଗନ୍ନାଥ। କେନ୍ଦୁଲିଭରେ କାମ କରି ମାସକୁ ମିଳୁଥିବା ୧୨ ହଜାର ଟଙ୍କାରେ ସୁଖଦୁଃଖରେ ପରିବାର ଚଳି ଯାଉଥିଲା। ଝିଅ ତିଳୋତ୍ତମା ଓ ନୋବାସ ଯୁକ୍ତ ୨ ଓ ସାନ ପୁଅ ଦଶମ ଶ୍ରେଣୀ ପର୍ଯ୍ୟନ୍ତ ପଢ଼ିଛନ୍ତି। ୨୦୨୨ ଜୁନ ୨୧ ତାରିଖରେ ଦିନ କାମ କରି ଘରକୁ ଫେରିବା ସମୟରେ ଚାଚିଗୁଡାଗାଁର ଦାସପଡା ଲିଫ୍ଟ କେନାଲ ନିକଟରେ ଏକ ଅଜଣା ଗାଡି ଧକ୍କାରେ ମଦନ ଗୁରୁତର ହୋଇଥିଲେ। ତାଙ୍କୁ କୋକସରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଅବସ୍ଥା ସାଂଘାତିକ ହେବାରୁ ଭବାନୀପାଟଣା ମୁଖ୍ୟ ଚିକିତ୍ସାଳୟ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ନେଇ ପରିବାର ଲୋକ ବାରମ୍ବାର ଜୟପାଟଣା ରେଞ୍ଜ ଅଫିସ ଓ ଭବାନୀପାଟଣା ଡିଏଫଓ ଅଫିସ ଦୌଡ଼ି ନିରାଶ ହେଲେ ସୁଦ୍ଧା କିଛି ସୁଫଳ ମିଳି ନାହିଁ। କେବଳ ପ୍ରତିଶ୍ରୁତି ଉପରେ ପ୍ରତିଶ୍ରୁତି ମିଳୁଥିବା ମଦନଙ୍କ ସ୍ତ୍ରୀ ବାଳ ମାଝି କହିଛନ୍ତି। ଫଳରେ ୨ ପୁଅ ଓ ଝିଅର ପାଠପଢ଼ା ଅଧାରୁ ବନ୍ଦ ରହିଛି। ଅନ୍ୟପକ୍ଷରେ କେନ୍ଦୁଲିଭରେ ନିଯୁକ୍ତି ଦେବା ବିଭାଗ କର୍ମଚାରୀ ପାଇଁ ଲାଞ୍ଚ ମାଗୁଥିବା ଭଳି ସଙ୍ଗୀନ ଅଭିଯୋଗ କରିଛନ୍ତି ମଦନଙ୍କ ଝିଅ। ଏ ଦିଗରେ ଏକ ଉଚ୍ଚସ୍ତରୀୟ ତଦନ୍ତ ସହ ପରିବରକୁ ନ୍ୟାୟ ପ୍ରଦାନ ପାଇଁ ସାଧାରଣରେ ଦାବି ଉଠିଛି। ଏ ନେଇ ଜୟପାଟଣା କେନ୍ଦୁପତ୍ର ରେଞ୍ଜରଙ୍କୁ ପଚାରିବାରୁ ସେ କହିଛନ୍ତି ଯେ, ଏହା ମୋର ସମୟର ଘଟଣା ନୁହେଁ। ତାଙ୍କ ପରିବାରର ବଡ଼ ପୁଅଙ୍କୁ କେନ୍ଦୁପତ୍ର ମୁନସି ଭାବେ କାର୍ଯ୍ୟ କରିବାକୁ କହୁଛି, କିନ୍ତୁ ସେ ମୋ ବାପାଙ୍କ କାମ ଦିଆଯାଉ ବୋଲି କହୁଛନ୍ତି ବୋଲି କହିଛନ୍ତି।
