ଅଗରତାଲା,୮।୩: ତ୍ରିପୁରାରେ ଭାଜପା ସରକାରଙ୍କ ୪ ବର୍ଷ ପୂର୍ତ୍ତି ଅବସରରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଏକ ସାଧାରଣ ସଭାକୁ ସମ୍ବୋଧିତ କରିଛନ୍ତି। ମଙ୍ଗଳବାର ଅନ୍ତର୍ଜାତୀୟ ମହିଳା ଦିବସ ଅବସରରେ ମହିଳା ସଶକ୍ତିକରଣ ଅଭିଯାନ ଏଠାରେ ହିଁ ଆରମ୍ଭ ହେବାକୁ ଯାଉଛି ବୋଲି ଅମିତ ଶାହା କହିଛନ୍ତି। ଏହି ଅବସରରେ ତ୍ରିପୁରା ମହିଳାଙ୍କୁ ଶାହା ଏକ ବଡ଼ ଉପହାର ଭେଟି ଦେଇଛନ୍ତି। ବର୍ତ୍ତମାନ ତ୍ରିପୁରାର ସରକାରୀ ଚାକିରିରେ ମାଆ ଓ ଭଉଣୀମାନଙ୍କୁ ୩୩ ପ୍ରତିଶତ ସଂରକ୍ଷଣ ଦିଆଯିବ। ଏତଦ୍ ବ୍ୟତୀତ ତ୍ରିପୁରାର ଯୁବକମାନଙ୍କ ପାଇଁ ନ୍ୟାସନାଲ ଫରେନସିକ ସାଇନ୍ସ ୟୁନିଭର୍ସିଟି କ୍ୟାମ୍ପସର ଖୁବ୍ଶୀଘ୍ର ମୂଳଦୁଆ ପକାଯିବ ବୋଲି ସେ ସୂଚନା ଦେଇଛନ୍ତି। ଅନ୍ୟପଟେ ରାଜଧାନୀ ଅଗରତାଲାରେ ଶାହା କହିଛନ୍ତି, ଦେଶର ସ୍ବାଧୀନତାର ୭୫ ବର୍ଷ ପୂରଣ ହୋଇଥିବା ବେଳେ ସୁନ୍ଦର ତ୍ରିପୁରାକୁ ମଧ୍ୟ ୫୦ ବର୍ଷ ପୂରିଛି। ୨୫ ବର୍ଷ ଧରି କମ୍ୟୁନିଷ୍ଟମାନେ ତ୍ରିପୁରା ଉପରେ ଶାସନ କରିଥିଲେ। ଏହି ସମୟରେ କମ୍ୟୁନିଷ୍ଟମାନେ ଗରିବଙ୍କ ନାମରେ ଏଠାରେ ଶାସନ କରିଥିଲେ। କିନ୍ତୁ ଗରିବଙ୍କ ପାଇଁ କିଛି କରି ନ ଥିଲେ। କିନ୍ତୁ ୪ବର୍ଷରୁ ଭାଜପା ସରକାର ଆସିବା ପରେ ତ୍ରିପୁରା ପରିବର୍ତ୍ତନ ହେବା ସହ ଲୋକଙ୍କୁ ମୌଳିକ ସୁବିଧା ମିଳିଛି। ତ୍ରିପୁରାର ପ୍ରତ୍ୟେକ ଗରିବ ଲୋକଙ୍କୁ ବିଦ୍ୟୁତ ଯୋଗାଣ ପାଇଁ ଭାଜପା ସରକାର କାର୍ଯ୍ୟ କରିଛି। ତ୍ରିପୁରାରେ ସଡ଼କ ଏବଂ ରେଳପଥ ସହ ଜଡିତ ଅନେକ ଯୋଜନା କର୍ଯ୍ୟକ୍ଷମ କରିଛି ଭାଜପା। ଆସନ୍ତା ବର୍ଷ ଯେତେବେଳେ ୫ବର୍ଷ ସମାପ୍ତ ହୋଇଯିବ ସେତେବେଳେ ଭାଜପାକୁ ଆଉ ଥରେ ସୁଯୋଗ ଦେବାକୁ ଜନତାଙ୍କୁ ସେ ନିବେଦନ କରିଛନ୍ତି। ଏଥିସହ ଭାଜପା ଶାସନକୁ ଆସିଲେ ତ୍ରିପୁରାକୁ ଦେଶର ଏକ ନମ୍ବର ରାଜ୍ୟ ଭାବେ ଗଢ଼ିତୋଳିବୁ ବୋଲି ଶାହା କହିଛନ୍ତି।
