ନୂଆଦିଲ୍ଲୀ,୨୩।୮(ପି.ଟି.): ଭାରତୀୟ ପୁରୁଷ ହକି ଦଳର କୋର ଗ୍ରୁପ୍ କେତୋଟି ମୌଳିକ ବ୍ୟାୟାମ ସହ ଟ୍ରେନିଂ ଆରମ୍ଭ କରିଛନ୍ତି। ତେବେ କେତେ ସପ୍ତାହ ପରେ ଦଳ ସ୍କିଲ୍ ଡେଭଲପମେଣ୍ଟ ଉପରେ ଫୋକସ କରିବ ବୋଲି ଶନିବାର ଭାରତୀୟ ହେଡ୍ କୋଚ୍ ଗ୍ରାହାମ ରିଡ୍ କହିଛନ୍ତି। ଭାରତର ୬ ଜଣ ଖେଳାଳି କୋଭିଡ୍-୧୯ର ଶିକାର ହୋଇଥିବାରୁ ସାମାନ୍ୟ ସମସ୍ୟା ରହିଛି ବୋଲି ସେ କହିଛନ୍ତି।
ଅଧିନାୟକ ମନପ୍ରୀତ ସିଂ, ସୁରେନ୍ଦର କୁମାର, ଜସକରଣ ସିଂ, ବରୁଣ କୁମାର, କ୍ରିଷନ ବାହାଦୁର ପାଠକ ଓ ମନଦୀପ ସିଂ କୋଭିଡ୍-୧୯ ଟେଷ୍ଟରେ ପଜିଟିଭ୍ ବୋଲି ଜଣାପଡିବା ପରେ ବେଙ୍ଗାଲୁରୁର ଏକ ହସ୍ପିଟାଲ୍ରେ ଚିକିତ୍ସିତ ହେଉଛନ୍ତି। ଗତ ୧୦ରୁ ୧୨ ତାରିଖ ମଧ୍ୟରେ ଖେଳାଳିମାନଙ୍କର ପରୀକ୍ଷା ହୋଇଥିଲା। ଇତିମଧ୍ୟରେ ୫ ଖେଳାଳି ସୁସ୍ଥ ହୋଇଛନ୍ତି। ତେବେ ସୁରେନ୍ଦରଙ୍କୁ ପୁଣି ଥରେ ହସ୍ପିଟାଲରେ ଭର୍ତ୍ତିକରିବାକୁ ପଡିଛି। ଦଳରେ ଯୋଗ ଦେବା ପୂର୍ବରୁ ଏହି ୫ ଖେଳାଳି ଆହୁରି କିଛି ଦିନ ଆଇସୋଲେଶନରେ ରହିବାକୁ ପଡିବ।
ତେବେ ବାକି ଖେଳାଳିମାନେ ବୁଧବାରଠାରୁ ବିଭିନ୍ନ କ୍ରୀଡ଼ା କାର୍ଯ୍ୟକଳାପ ଆରମ୍ଭ କରିଛନ୍ତି। ଆଉ କେତେ ସପ୍ତାହ ପରେ ସବୁ ଖେଳାଳିଙ୍କ ଡେଭଲପ୍ମେଣ୍ଟ ପ୍ଲାନ ଓ ସ୍ପିଲ୍ ଡେଭଲପମେଣ୍ଟ ଉପରେ ଫୋକସ କରାଯିବ ରିଡ୍ କହିଛନ୍ତି। ଆସନ୍ତାବର୍ଷ ଟୋକିଓ ଅଲିମ୍ପିକ୍ସ ଆରମ୍ଭ ହେବାକୁ ଯାଉଥିବାରୁ ଖେଳାଳିମାନେ କେତେ ପ୍ରସ୍ତୁତ ସେନେଇ ଆକଳନ କରାଯିବ। ଅଲିମ୍ପିକ୍ ପ୍ରସ୍ତୁତି ନେଇ ସବୁ ଖେଳାଳିଙ୍କୁ ଅବଗତ କରାଇଛି ବୋଲି ୫୬ ବର୍ଷିଆ ରେଡ୍ କହିଛନ୍ତି। ଦଳରେ ଯୋଗ ଦେବା ପୂର୍ବରୁ ରିଡ୍ ଦୁଇ ସପ୍ତାହ କ୍ୱାରାଣ୍ଟାଇନ୍ରେ ରହିଥିଲେ। ଏହି ସମୟରେ ଖେଳାଳିଙ୍କୁ ଭାରତର ସ୍ବର୍ଣ୍ଣିମ ଅଲିମ୍ପିକ ଇତିହାସ ସମ୍ପର୍କରେ ଅବଗତ କରାଯାଇଥିଲା। ଏହା ଖେଳାଳିମାନଙ୍କ ଅଲିମ୍ପିକ ସ୍ବପ୍ନ ପୂରଣ କରିବାରେ ସହାୟକ ହେବ। ଅଲିମ୍ପିକ୍ସରେ ସଫଳତା ପାଇବା ପାଇଁ ଖେଳାଳିମାନଙ୍କୁ ବିଭିନ୍ନ କାର୍ଯ୍ୟ କରିବାକୁ କୁହାଯାଇଛି। ଗତ ଦୁଇ ସପ୍ତାହ ମଧ୍ୟରେ ଭାରତର ଅତୀତ ତଥା ସ୍ବର୍ଣ୍ଣିମ ଅଲିମ୍ପିକ୍ ଇତିହାସ ସମ୍ପର୍କରେ ଶିକ୍ଷା କରିବାକୁ ଆମେ ପ୍ରୟାସ କରିଛୁ ବୋଲି କୋଚ୍ ରେଡ୍ କହିଛନ୍ତି। ଏଥିସହିତ ଅଗାମୀ ୧୨ମାସରେ ଆମେ ଅନ୍ୟାନ୍ୟ କାର୍ଯ୍ୟକ୍ରମ ମଧ୍ୟ ହାତକୁ ନେବୁ ବୋଲି ସେ କହିଛନ୍ତି। ବେଙ୍ଗାଲୁରୁ କ୍ୟାମ୍ପରେ ଏବେ ୩୩ ପୁରୁଷ ଓ ୨୪ଜଣ ମହିଳା ଖେଳାଳି ରହିଛନ୍ତି।
