ଭୁବନେଶ୍ୱର, ୧୦।୩(କ୍ରୀଡ଼ା ପ୍ରତିନିଧି)- ସମଗ୍ର ବିଶ୍ୱରେ ଏବେ ଓଡ଼ିଶା ହକିକୁ ନେଇ ଚର୍ଚ୍ଚା। ୨୦୧୮ରେ ହକି ବିଶ୍ୱକପ୍କୁ ସଫଳତାର ସହ ଆୟୋଜନ ପରେ ୨୦୨୩ ବିଶ୍ୱକପ୍ ଆୟୋଜନ ଅଧିକାର ମିଳିଛି। ବିଶ୍ୱଶ୍ରେଣୀୟ ଭିତ୍ତିଭୂମି ଉପଲବ୍ଧ ଯୋଗୁ ଏଠାରେ ଅନେକ ଅନ୍ତର୍ଜାତୀୟ ପ୍ରତିଯୋଗିତା ମଧ୍ୟ ଇତିମଧ୍ୟରେ ଅନୁଷ୍ଠିତ ହୋଇଯାଇଛି। ଓଡ଼ିଶା ଭାରତୀୟ ହକି ଦଳର ପ୍ରାୟୋଜକ ହୋଇ ଉଦାହରଣ ସୃଷ୍ଟି କରିଛି। ଦିଲୀପ ତିର୍କୀଙ୍କଠାରୁ ଆରମ୍ଭ କରି ଅନେକ ଖେଳାଳି ଭାରତୀୟ ଦଳର ଅଧିନାୟକ ମଧ୍ୟ ହୋଇଛନ୍ତି। ଭାରତୀୟ ହକିକୁ ରୁଦ୍ଧିମନ୍ତ କରିବାରେ ଓଡ଼ିଶାର ଅତୁଳନୀୟ ଅବଦାନ ରହିଛି। ମାତ୍ର ବିଡ଼ମ୍ବନାର ବିଷୟ ଏହି ଯେ ଏପରି ମହନୀୟ ଇତିହାସ ରଖୁଥିବା ଓଡ଼ିଶା (ହକି ଓଡ଼ିଶା) ଏବେ ହକି ଇଣ୍ଡିଆର ସହଯୋଗୀ ସଦସ୍ୟଭାବେ ପରିଗଣିତ ହେଉଛି। ହକି ଇଣ୍ଡିଆର ସ୍ଥାୟୀ ସଦସ୍ୟ ଥିବା ୨୨ ଆସୋସିଏଶନ ମଧ୍ୟରେ ହକି ଓଡ଼ିଶା ନାହିଁ। ହକି ଇଣ୍ଡିଆର ସ୍ଥାୟୀ ସଦସ୍ୟ ପାଇଁ ଉପଯୁକ୍ତ ମାନଦଣ୍ଡ ପୂରଣରେ ବିଳମ୍ବକୁ ଏହାର କାରଣ ଦର୍ଶାଯାଉଛି। ଏହାକୁ ନେଇ ଅନେକ ଚର୍ଚ୍ଚା ହୋଇ ସାରିଥିବାବେଳେ ଏବେ ହକି ଓଡ଼ିଶା ପାଗ ଭିଡ଼ିଛି।
ମଙ୍ଗଳବାର କଟକ ବାରବାଟୀ ଷ୍ଟାଡିୟମ ପରିସରରେ ଥିବା ଗେଷ୍ଟ ହାଉସରେ ହକି ଓଡ଼ିଶାର ସ୍ବତନ୍ତ୍ର ସାଧାରଣ ବୈଠକ ଅନୁଷ୍ଠିତ ହୋଇଛି। ଜଷ୍ଟିସ ଏ. ଏସ୍. ନାଇଡ଼ୁଙ୍କ ପୌରୋହିତ୍ୟରେ ଅନୁଷ୍ଠିତ ବୈଠକରେ ସମ୍ପାଦକ ପ୍ରତାପ ଶତପଥୀ ଅଡିଟି ରିପୋର୍ଟ ଉପସ୍ଥାପନ କରିଛନ୍ତି। ଏହା ସର୍ବସମ୍ମତିକ୍ରମେ ଗୃହୀତ ହୋଇଥିବାବେଳେ ୬ଟି ଜିଲା ବରଗଡ଼, ଝାରସୁଗୁଡ଼ା, ସୁବର୍ଣ୍ଣପୁର, ନୟାଗଡ଼, କେନ୍ଦୁଝର ଓ ରାୟଗଡ଼ାକୁ ନୂତନଭାବେ ଅନୁବନ୍ଧିତ କରାଯାଇଥିବା ସମ୍ପର୍କରେ ସମ୍ପାଦକ ଅବଗତ କରାଇଥିଲେ। ଏହି ଅବସରରେ ହକି ଓଡ଼ିଶାର ଓ୍ବେବସାଇଟ୍ www.hockeyodisha.inକୁ ଜଷ୍ଟିସ୍ ନାଇଡ଼ୁ ଉନ୍ମୋଚନ କରିଥିଲେ। ଅନ୍ୟମାନଙ୍କ ମଧ୍ୟରେ ଉପସଭାପତି ଉମାକାନ୍ତ ନନ୍ଦ, ଶ୍ରୀମନ୍ତ ସାହୁ, ଆନନ୍ଦିନୀ ଦର୍ଜୀ, ତ୍ରିଷ୍ଣା ଗୋସ୍ବାମୀ, ଯୁଗ୍ମସମ୍ପାଦକ ପ୍ରଣବ କିଶୋର ପଟ୍ଟନାୟକ, ମମତା ସ୍ବାଇଁ, ସାଇପଦ୍ମଜିତା ମହାପାତ୍ର, ପବୀର କୁମାର ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ।
