ଭୁବନେଶ୍ୱର,୨୯ା୧୨(ସ୍ପୋଟର୍ସ ବ୍ୟୁରୋ) : ଏଫ୍ଆଇଏଚ୍ ଓଡ଼ିଶା ପୁରୁଷ ହକି ବିଶ୍ୱକପ୍ ଭୁବନେଶ୍ୱର ଓ ରାଉରକେଲାରେ ଆସନ୍ତା ଜାନୁୟାରୀ ୧୩ରୁ ୨୯ ଯାଏ ଅନୁଷ୍ଠିତ ହେବ। ଟୁର୍ନାମେଣ୍ଟ ଆରମ୍ଭ ହେବା ପୂର୍ବରୁ ଖେଳାଳିଙ୍କ ମନୋବଳ ବଢାଇବା ପାଇଁ ପଦକ୍ଷେପ ନେଇଛି ହକି ଇଣ୍ଡିଆ। ଭାରତ ଯଦି ବିଶ୍ୱକପ୍ର ଏହି ସଂସ୍କରଣରେ ଚାମ୍ପିୟନ ହୁଏ ତେବେ ଦଳର ସମସ୍ତ ଖେଳାଳି ଏବଂ ସପୋର୍ଟ ଷ୍ଟାଫ୍ଙ୍କ ପାଇଁ ଏହି ପୁରସ୍କାର ଘୋଷଣା କରାଯାଇଛି। ଭାରତୀୟ ହକି ଦଳ ବିଶ୍ୱକପ୍ରେ ସମୁଦାୟ ୩ଟି ପଦକ ହାସଲ କରିଛି।
୧୯୭୧ ଓ ୧୯୭୩ ସଂସ୍କରଣରେ ଦଳ ବ୍ରୋଞ୍ଜ ପଦକ ହାସଲ କରିଥିବା ବେଳେ ମାଲେସିଆରେ ଅନୁଷ୍ଠିତ୧୯୭୫ ସଂସ୍କରଣରେ ଦଳ ସ୍ବର୍ଣ୍ଣ ପଦକ ହାସଲ କରିଥିଲା। ପାକିସ୍ତାନକୁ ପରାସ୍ତ କରି ଅଜିତ ପାଲ୍ ସିଂଙ୍କ ନେତୃତ୍ୱରେ ଭାରତ ଏହି ସଫଳତା ହାସଲ କରିଥିବା ବେଳେ ଏହା ପରଠାରୁ ଦଳ ଖାଲି ହାତରେ ଫେରିଛି। କ୍ରମାଗତ ଦ୍ୱିତୀୟ ବର୍ଷ ପାଇଁ ଭାରତରେ ଏହି ସମ୍ମାନଜନକ ଟୁର୍ନାମେଣ୍ଟ ଆୟୋଜିତ ହେଉଥିବା ବେଳେ ହୃତଗୌରବ ଫେରାଇ ଆଣିବାକୁ ପ୍ରୟାସ କରିବ ହରମନ୍ପ୍ରୀତ ସିଂଙ୍କ ଭାରତୀୟ ଦଳ। ବିଶ୍ୱର ୧୫ ଶକ୍ତିଶାଳୀ ଦଳଙ୍କ ମଧ୍ୟରେ ପୋଡିୟମ ଫିନିଶ ଭାରତ ପାଇଁ ଅତ୍ୟନ୍ତ କଷ୍ଟକର ବ୍ୟାପାର ରହିବ। ଭାରତୀୟ ଦଳର ମନୋବଳ ବୃଦ୍ଧି କରିବା ପାଇଁ ଏହି ପୁରସ୍କାର ରାଶି ଘୋଷଣା କରାଯାଇଥିବା ପ୍ରକାଶ କରିଛନ୍ତି ହକି ଇଣ୍ଡିଆ ସଭାପତି ଦିଲୀପ ତିର୍କୀ।
୨୪ ଡିସେମ୍ବରରେ ହକି ଇଣ୍ଡିଆ ପକ୍ଷରୁ ଅନୁଷ୍ଠିତ ଭର୍ଚୁଆଲ ବୈଠକରେ ଏହି ନିଷ୍ପତ୍ତି ନିଆଯାଇଥିବା ସେ ପ୍ରକାଶ କରିଛନ୍ତି। ଭାରତୀୟ ଦଳ ଯଦି ଚଳିତ ସଂସ୍କରଣରେ ସ୍ବର୍ଣ୍ଣ ବିଜୟୀ ହୁଏ ତେବେ ଦଳର ପ୍ରତ୍ୟେକ ଖେଳାଳିଙ୍କୁ ୨୫ ଲକ୍ଷ ଟଙ୍କା ଏବଂ ସପୋର୍ଟ ଷ୍ଟାଫ୍ଙ୍କୁ ୫ ଲକ୍ଷ ଟଙ୍କାର ପୁରସ୍କାର ପ୍ରଦାନ କରାଯିବ। ରୌପ୍ୟ ପଦକ ହାସଲ କଲେ ଦଳର ପ୍ରତ୍ୟେକ ଖେଳାଳିଙ୍କୁ ୧୫ ଲକ୍ଷ ଟଙ୍କା ଏବଂ ସପୋର୍ଟ ଷ୍ଟାଫ୍ଙ୍କୁ ୩ ଲକ୍ଷ ଟଙ୍କାର ପୁରସ୍କାର ଓ ବ୍ରୋଞ୍ଜ ପଦକ ପାଇଁ ପ୍ରତ୍ୟେକ ଖେଳାଳିଙ୍କ ପାଇଁ ୧୦ ଲକ୍ଷ ଟଙ୍କା ଏବଂ ସପୋର୍ଟ ଷ୍ଟାଫ୍ଙ୍କୁ ୨ ଲକ୍ଷ ଟଙ୍କାର ପୁରସ୍କାର ବ୍ୟବସ୍ଥା ରଖାଯାଇଛି। ଚଳିତ ବିଶ୍ୱକପ୍ରେ ଭାରତ ପୁଲ୍ ଡି’ରେ ସ୍ଥାନ ପାଇଛି। କଷ୍ଟସାଧ୍ୟ ଗ୍ରୁପ୍ରେ ସ୍ଥାନ ପାଇଥିବା ଭାରତ ସହିତ ସ୍ପେନ୍, ଇଂଲଣ୍ଡ ଓ ଓ୍ବେଲ୍ସ ମଧ୍ୟ ଗୋଟିଏ ଗ୍ରୁପ୍ରେ ସ୍ଥାନ ପାଇଛନ୍ତି। ରାଉରକେଲାର ବିର୍ସା ମୁଣ୍ଡା ହକି ଷ୍ଟାଡିୟମରେ ସ୍ପେନ ବିପକ୍ଷରେ ଜାନୁୟାରୀ ୧୩ ତାରିଖରେ ନିଜର ଅଭିଯାନ ଆରମ୍ଭ କରିବ ଭାରତ। ୧୫ ତାରିଖରେ ସମାନ ଷ୍ଟାଡିୟମରେ ଇଂଲଣ୍ଡ ସହିତ ମ୍ୟାଚ୍ ଖେଳିବା ପରେ କଳିଙ୍ଗ ଷ୍ଟାଡିୟମରେ ୧୯ ତାରିଖରେ ଏହାର ଅନ୍ତିମ ଗ୍ରୁପ୍ ପର୍ଯ୍ୟାୟ ମ୍ୟାଚ ଖେଳିବ।
