ନୂଆଦିଲ୍ଲୀ/ଓ୍ବାର୍ଦ୍ଧା/ସମ୍ଭଲ,୧୩।୧୧: ଅଯୋଧ୍ୟା ଉପରେ ପୂର୍ବତନ କେନ୍ଦ୍ରମନ୍ତ୍ରୀ ସଲମାନ ଖୁର୍ସିଦଙ୍କ ପୁସ୍ତକକୁ ନେଇ ଅଡ଼ୁଆରେ ପଡ଼ିଥିବା କଂଗ୍ରେସ ଏବେ ସଫେଇ ଦେବାରେ ଲାଗିଛି। ୬୮ ବର୍ଷୀୟ ଖୁର୍ସିଦ ‘ସନ୍ରାଇଜ୍ ଓଭର ଅଯୋଧ୍ୟା: ନେଶନହୁଡ୍ ଇନ୍ ଆଓ୍ବାର ଟାଇମ୍ସ’ରେ ହିନ୍ଦୁତ୍ୱକୁ ଆଇଏସ୍ ଏବଂ ବୋକୋ ହାରାମ୍ ଭଳି ମୌଳବାଦୀ ଇସ୍ଲାମୀୟ ଆତଙ୍କବାଦୀ ବା ଜେହାଦୀ ସଙ୍ଗଠନଗୁଡ଼ିକ ସହ ତୁଳନା କରିଛନ୍ତି, ଯାହା ଜାତୀୟ ରାଜନୀତିରେ ଉଷ୍ମତା ଭରିଦେଇଛି। ଅନ୍ୟପକ୍ଷେ ଆସନ୍ତା ବର୍ଷ ହେବାକୁ ଥିବା ଉତ୍ତର ପ୍ରଦେଶ ସମେତ ୫ ରାଜ୍ୟର ବିଧାନସଭା ନିର୍ବାଚନରେ କଂଗ୍ରେସ ମୁସଲିମ୍ ଭୋଟ ହାତେଇବା ପାଇଁ ସାମ୍ପ୍ରଦାୟିକ ରାଜନୀତି କରୁଥିବା ଭାଜପା ଅଭିଯୋଗ ଆଣିଛି। ଏବେ କଂଗ୍ରେସ ନେତା ରାହୁଲ ଗାନ୍ଧୀ ଏହି ବିବାଦକୁ ଲମ୍ଫ ମାରିଛନ୍ତି।
ମହାରାଷ୍ଟ୍ରର ଓ୍ବାର୍ଦ୍ଧାସ୍ଥିତ ସେବାଗ୍ରାମ ଆଶ୍ରମରେ ଶୁକ୍ରବାର ଆୟୋଜିତ ଏଆଇସିସି ଓରିଏଣ୍ଟେଶନ ପ୍ରୋଗ୍ରାମ୍କୁ କଂଗ୍ରେସ ନେତା ରାହୁଲ ଗାନ୍ଧୀ ଭର୍ଚୁଆଲି ସମ୍ବୋଧିତ କହିଛନ୍ତି, ହିନ୍ଦୁଧର୍ମ ଓ ହିନ୍ଦୁତ୍ୱ ଦୁଇଟି ଭିନ୍ନ ବିଷୟ। ଏହା ମଧ୍ୟରେ ଫରକ୍ ରହିଛି। ଯଦି ପ୍ରଭେଦ ନ ଥାନ୍ତା ତେବେ ଦୁଇଟିର ନାମ ଗୋଟିଏ ହୋଇଥାଆନ୍ତା। ହିନ୍ଦୁମାନଙ୍କୁ ହିନ୍ଦୁତ୍ୱର ଆବଶ୍ୟକତା ନ ଥାଆନ୍ତା। ହିନ୍ଦୁତ୍ୱର ନାମ କ’ଣ କୌଣସି ମୁସଲମାନ ବା ଶିଖ୍ଙ୍କୁ ହତ୍ୟା କରିବା? ଉପନିଷଦରେ ତ ଏପରି ଉଲ୍ଲେଖ କରାଯାଇ ନାହିଁ। କେଉଁ ବହିରେ ଏହା ଲେଖାଅଛି ବୋଲି ରାହୁଲ ପ୍ରଶ୍ନ କରିଛନ୍ତି। ରାହୁଲଙ୍କ ମତରେ କଂଗ୍ରେସ ଏକ ‘ସୁନ୍ଦର ମୁକ୍ତା’ ସଦୃଶ, ଯହିଁରେ ଅସରନ୍ତି ଶକ୍ତି ଅନ୍ତର୍ନିହିତ ହୋଇ ରହିଛି। ସେହିପରି ବରିଷ୍ଠ କଂଗ୍ରେସ ନେତା ରାଶିଦ୍ ଅଲ୍ଭି ୟୁପିର ସମ୍ଭଲରେ ଆୟୋଜିତ କଳ୍କୀ ମହୋତ୍ସବରେ ରାମାୟଣର ଜଣେ ରାକ୍ଷସଙ୍କ ସମ୍ପର୍କରେ ଅବତାରଣା କରି କହିଛନ୍ତି, ଜୟ ଶ୍ରୀରାମ ସ୍ଲୋଗାନ ଦେଉଥିବା ସମସ୍ତେ ଋଷି ନୁହନ୍ତି। ତେଣୁ ଜୟ ଶ୍ରୀରାମ କହୁଥିବା ଲୋକଙ୍କ ପ୍ରତି ସତର୍କ ରହିବାକୁ ସେ ଲୋକଙ୍କୁ ପରାମର୍ଶ ଦେଇଛନ୍ତି। ଏନେଇ ଭାଜପା ଆଇଟି ସେଲ୍ ମୁଖ୍ୟ ଅମିତ୍ ମାଲବ୍ୟ ଟୁଇଟ୍ କରି କହିଛନ୍ତି, ଯେଉଁମାନେ ରାମଙ୍କ ନାମ ଧରୁଛନ୍ତି ସେମାନଙ୍କୁ କଂଗ୍ରେସ ନେତା ରାକ୍ଷସ ଭାବେ ଅଭିହିତ କରୁଛନ୍ତି। ରାମଭକ୍ତଙ୍କୁ ନେଇ କଂଗ୍ରେସ ମନରେ କେତେ ବିଷ ଭରିରହିଛି।
