ନୂଆଦିଲ୍ଲୀ, ୧୫।୫ : ଭେଟେରିନାରୀ ଆସୋସିଏଶନ ଅଫ ଇଣ୍ଡିଆ ଦ୍ୱାରା ଦାଖଲ ହୋଇଥିବା ମାନହାନି ମକଦ୍ଦମା ଉପରେ ଦିଲ୍ଲୀ ହାଇକୋର୍ଟ ଭାଜପା ଏମ୍ପି ମାନେକା ଗାନ୍ଧୀଙ୍କୁ ସମନ ଜାରି କରିଛନ୍ତି। କୋର୍ଟ ଏହାର ଉତ୍ତର ମାଗିଛନ୍ତି। ମାନେକା ଗାନ୍ଧୀଙ୍କ ବିନା ସର୍ତ୍ତମୂଳକ କ୍ଷମା ପ୍ରାର୍ଥନା ଏବଂ ୨ କୋଟି ଟଙ୍କା କ୍ଷତିପୂରଣ ଦାବିରେ ଏହି ଆବେଦନ କରାଯାଇଛି।
ଜଷ୍ଟିସ ଅମିତ ବନସାଲ ମାନେକା ଗାନ୍ଧୀଙ୍କୁ ୩୦ ଦିନ ମଧ୍ୟରେ ଆବେଦନ ଉପରେ ଲିଖିତ ବିବୃତ୍ତି ଦେବାକୁ ନିର୍ଦ୍ଦେଶ ଦେଇଛନ୍ତି। ଅଗଷ୍ଟ ୪ ରେ ଏହି ମାମଲାର ଶୁଣାଣି ପାଇଁ କୋର୍ଟ ସ୍ଥିର କରିଛନ୍ତି।
ଏହା ଦେଶରେ ପ୍ରାଣୀ ଚିକିତ୍ସକଙ୍କ ସର୍ବୋଚ୍ଚ ସଂଗଠନ ବୋଲି ଆବେଦନରେ କୁହାଯାଇଛି। ଆବେଦନକାରୀ ମାନେକା ଗାନ୍ଧୀଙ୍କ ବିରୋଧରେ ଉତ୍ପୀଡନ, ମାନସିକ ଆଘାତ, ଅର୍ଥର ବେଆଇନ ଦାବି ଏବଂ ବଦନାମ ଅଭିଯୋଗରେ ମକଦ୍ଦମା ଦାୟର କରିଛନ୍ତି। ୟୁନିୟନର ସଦସ୍ୟଙ୍କ ବିରୋଧରେ ମନ୍ତବ୍ୟ ଦେବା ଏବଂ ମିଥ୍ୟା ବିବୃତ୍ତି ଦେବା ଅଭିଯୋଗରେ ଏହି ପିଟିଶନରେ ଅଭିଯୋଗ ହୋଇଛି।
ଆଇନଜୀବୀ ନମିତା ରାୟଙ୍କ ଦ୍ୱାରା ଦାଖଲ ହୋଇଥିବା ଆବେଦନପତ୍ରରେ ଦର୍ଶାଯାଇଛି ଯେ ଭାରତରେ ପ୍ରାଣୀ ଚିକିତ୍ସା କ୍ଷେତ୍ରରେ ଆବଶ୍ୟକ ସଂସ୍କାର ଉପରେ ମନ୍ତବ୍ୟ ଦେବା ଉଦ୍ଦେଶ୍ୟରେ ଉତ୍ତରଦାତା ଏକ ପ୍ରକାଶନରେ ସଂସ୍ଥାକୁ ବଦନାମ କରିଛନ୍ତି ଏବଂ ପ୍ରାଣୀ ଚିକିତ୍ସକଙ୍କ ବିରୁଦ୍ଧରେ ଆପତ୍ତିଜନକ ଶବ୍ଦ, ବଦନାମ ତଥା ଅପମାନଜନକ ବିବୃତ୍ତି ଦେଇଛନ୍ତି।
ଆବେଦନକାରୀ ଅଭିଯୋଗ କରିଛନ୍ତି ଯେ ମାନେକା ଅନେକ ଫୋନ କଲ କରି ଆପତ୍ତିଜନକ ଭାଷା ବ୍ୟବହାର କରିଥିଲେ। ସେ କହିଛନ୍ତି ଯେ ମାନେକା ଗାନ୍ଧୀ ପୂର୍ବତନ କେନ୍ଦ୍ର ମନ୍ତ୍ରୀ ଭାବରେ ଜାଣିଶୁଣି ତାଙ୍କ ପ୍ରଭାବର ଅପବ୍ୟବହାର କରିଛନ୍ତି ଏବଂ ଅଶ୍ଳୀଳ ଭାଷାର ବ୍ୟବହାର କରିଛନ୍ତି।
