ରାଞ୍ଚି,୨୬ ।୮: ଝାଡ଼ଖଣ୍ଡରେ ଏବେ ରାଜନୈତିକ ଝଡ ଲାଗି ରହିଛି । ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ବିଧାନସଭା ସଦସ୍ୟତା ଉପରେ ଖଣ୍ଡା ଝୁଲୁଛି । ଅବୈଧ ଖଣି ଖନନ ପଟ୍ଟା ଆବଣ୍ଟନ ମାମଲାରେ ତାଙ୍କର ଅଡୁଆ ବଢିବାରେ ଲାଗିଛି । ଜନପ୍ରତିନିଧି ଆଇନ ୧୯୫୧ରେ ସେ ଦୋଷୀ ହୋଇଛନ୍ତି । ଏବେ ଶେଷ ନିଷ୍ପତ୍ତି ରାଜ୍ୟପାଳଙ୍କ ଉପରେ । ଏବେ ପ୍ରଶ୍ନ ଉଠିଛି କି ଯଦି ଶୁକ୍ରବାର ହେମନ୍ତ ସୋରେନ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦିଅନ୍ତି ତେବେ କିଏ ହେବେ ପରବର୍ତ୍ତି ମୁଖ୍ୟମନ୍ତ୍ରୀ । ଏହି ରେସରେ କେତେ ଜଣଙ୍କ ନାମ ସାମ୍ନାକୁ ଆସୁଥିବା ବେଳେ ସବୁଠାରୁ ଆଗରେ ରହିଛି ହେମନ୍ତଙ୍କ ପତ୍ନୀ କଳ୍ପନା ସୋରେନଙ୍କ ନାମ ।
କଳ୍ପନା ଓଡ଼ିଶାର ମୟୁରଭଞ୍ଜ ଜିଲା ବାସିନ୍ଦା । ଏକ ବ୍ୟବସାୟୀ ପରିବାରରେ ତାଙ୍କର ଜନ୍ମ । ତାଙ୍କର ଦୁଇ ଭଉଣୀ ଭାଇ ରହିଛନ୍ତି । ୧୯୭୬ରେ ରାଞ୍ଚିରେ ସେ ଜନ୍ମ ନେଇଥିଲେ । ରାଞ୍ଚିରେ ସେ ଗ୍ରାଜୁଏଶନ ଶେଷ କରିଛନ୍ତି । ଏହାପରେ ୨୦୦୬ରେ ସେ ହେମନ୍ତ ସୋରେନଙ୍କୁ ବିବାହ କରିଥିବା ବେଳେ ତାଙ୍କର ୨ଟି ସନ୍ତାନ ରହିଛନ୍ତି ।
ସେ ନିଜେ ଜଣେ ବିଜନେସ ଓମେନ । ଏହାସହ ସେ ଏକ ପ୍ରାଇଭେଟ ସ୍କୁଲ ବି ଚଳାଉଛନ୍ତି । ସାମାଜିକ କାର୍ଯ୍ୟକ୍ରମରେ ସେ ଖୁବ୍ କମ ନଜର ଆସନ୍ତି । ହେଲେ ମହିଳା ସଶକ୍ତିକରଣ ଓ ଶିଶୁ କାର୍ଯ୍ୟକ୍ରମରେ ସେ ସବୁବେଳେ ନଜର ଆସିଥାଆନ୍ତି ।
ମୁଖ୍ୟମନ୍ତ୍ରୀ ପଦକୁ ନେଇ କଳ୍ପନା ସୋରେନଙ୍କ ନାମ ଚର୍ଚ୍ଚାକୁ ଆସୁଛି ସତ । ହେଲ ଏବେ ସବୁଠାରୁ ବଡ ପ୍ରଶ୍ନ ବିନା ରାଜନୈତିକ ଅନୁଭବରେ କଳ୍ପନା କ’ଣ ରାଡ଼ଖଣ୍ଡ ରାଜନୀତିର ଟଣାଭିଡାକୁ ସମ୍ଭାଳି ପାରିବେ । କଳ୍ପନାଙ୍କ ମାତା-ପିତା ରାଜନୈତିକ ପରିବାରର ନୁହେଁ ସତ ହେଲେ ସେ ସୋରେନ ପରିବାରର ବୋହୂ ହେବା ପରେ ଦୀର୍ଘ ୧୬ ବର୍ଷ ହେବ ରାଜନୀତିକୁ ଅତି ପାଖରୁ ଦେଖି ଆସୁଛନ୍ତି । ତାଙ୍କ ସ୍ୱାମୀ ହେମନ୍ତ ସୋରେନଙ୍କର ରାଜନୀତିରେ ଲମ୍ବା ଅନୁଭବ ରହିଛି । ସେ ଦୁଇ ଦୁଇଥର ମୁଖ୍ୟମନ୍ତ୍ରୀ ହୋଇ ସାରିଛନ୍ତି । ଏହାସହ କଳ୍ପନାଙ୍କ ଶ୍ୱଶୁର ଶିବୁ ସୋରେନ ବି ରାଜନୀତିରେ ବହୁ ପୁରୁଣା । ତେଣୁ ଏସବୁକୁ ଦେଖିଲେ କଳ୍ପନା ମୁଖ୍ୟମନ୍ତ୍ରୀ ହୋଇ ପାରନ୍ତି ବୋଲି କୁହାଯାଉଛି ।
