ତିରୁପତି, ୨୦।୧୧: ବଙ୍ଗୋପସାଗରରେ ସୃଷ୍ଟ ଲଘୁଚାପ ପ୍ରଭାବରେ ଆନ୍ଧ୍ରପ୍ରଦେଶର ବିଭିନ୍ନ ଜିଲାରେ ପ୍ରବଳ ବର୍ଷା ଲାଗିରହିଛି। ରୟାଲସୀମା ଅନ୍ତର୍ଗତ ୪ ଜିଲାରେ ବର୍ଷା ଓ ବନ୍ୟାରେ ଶୁକ୍ରବାର ୧୭ ଜଣଙ୍କ ମୃତ୍ୟୁ ଘଟିବା ସହ ଶତାଧିକ ନିଖୋଜ ହୋଇଯାଇଛନ୍ତି। ଚେୟେରୁ ନଦୀରେ ବନ୍ୟା ଆସି ଅନେକ ଗ୍ରାମ ଜଳାର୍ଣ୍ଣବ ହୋଇଥିବାବେଳେ ନନ୍ଦାଲୁରଠାରେ ଥିବା ସ୍ବାମୀ ଆନନ୍ଦ ମନ୍ଦିର ପାଣିରେ ବୁଡ଼ିଯାଇଛି। କଡପା ଜିଲାର ରାଜମପେଟ ଓ ଅନ୍ୟ ଅଞ୍ଚଳ ବନ୍ୟାପ୍ଳାବିତ ହୋଇଛି। ରିଲିଫ୍ ଓ ଉଦ୍ଧାର କାର୍ଯ୍ୟରେ ଅଗ୍ନିଶମ, ଏନ୍ଡିଆର୍ଏଫ୍ ଏବଂ ଏସ୍ଡିଆର୍ଏଫ୍ ଟିମ୍କୁ ନିୟୋଜିତ କରାଯାଇଛି। ଗଣ୍ଡଲୁରୁ ଅଞ୍ଚଳରୁ ୭ ମୃତଦେହ ମିଳିଥିବା ବେଳେ ରାୟାଭରମରୁ ୩ ଏବଂ ମଣ୍ଡପାଲ୍ଲି ନିକଟରୁ ୨ ଜଣଙ୍କ ମୃତଦେହ ମିଳିଛି। ମଣ୍ଡପାଲ୍ଲି, ଆକେପାଡୁ, ନନ୍ଦାଲୁରୁ ଅଞ୍ଚଳରୁ ୩୦ ଜଣ ବନ୍ୟାରେ ଭାସିଯାଇଛନ୍ତି। ବିଭିନ୍ନ ସ୍ଥାନରେ ଜାତୀୟ ରାଜପଥ ଓ ରେଳଲାଇନ ପାଣିରେ ବୁଡ଼ିଯାଇଛି। କଡପା ବିମାନ ବନ୍ଦରକୁ ୨୫ ତାରିଖ ଯାଏ ବନ୍ଦ କରାଯାଇଥିବାବେଳେ ନନ୍ଦାଲୁର-ରାଜାପେଟ୍ ମଧ୍ୟରେ ଚଳାଚଳ କରୁଥିବା ୧୦ଟି ଟ୍ରେନ୍ର ରୁଟ୍ ପରିବର୍ତ୍ତନ ହୋଇଛି।
ଲଘୁଚାପ ଯୋଗୁ ଆନ୍ଧ୍ରପ୍ରଦେଶର ଦକ୍ଷିଣ ଉପକୂଳ ଏବଂ ରାୟଲସୀମାରେ ପ୍ରବଳ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଥିଲା। ତିରୁମାଲାରେ ପ୍ରବଳ ବର୍ଷା ଲାଗି ରହିଥିବାରୁ ପ୍ରଭୁ ଭେଙ୍କଟେଶ୍ୱରଙ୍କ ଦର୍ଶନରେ ଆସିଥିବା ତୀର୍ଥଯାତ୍ରୀମାନେ ଫସିରହିଛନ୍ତି। ତିରୁମାଲା ମନ୍ଦିରକୁ ଯାଇଥିବା ୪ଟି ରାସ୍ତା ବନ୍ୟାପାଣିରେ ବୁଡିଥିବାବେଳେ ଗଛ ଉପୁଡି ଯାତାୟାତ ସମ୍ପୂର୍ଣ୍ଣ ବନ୍ଦ ହୋଇଯାଇଛି। ମୁଖ୍ୟମନ୍ତ୍ରୀ ଓ୍ବାଇ.ଏସ୍. ଜଗନମୋହନ ରେଡ୍ଡୀ ବର୍ଷା ପ୍ରଭାବିତ ଜିଲାଗୁଡ଼ିକର ଜିଲାପାଳମାନଙ୍କ ସହ ଭିଡିଓ କନ୍ଫରେନ୍ସରେ ଆଲୋଚନା କରିବା ସହ ଉଦ୍ଧାର ଓ ରିଲିଫ କାର୍ଯ୍ୟକୁ ତ୍ୱରାନ୍ବିତ କରିବା ଲାଗି ନିର୍ଦ୍ଦେଶ ଦେଇଛନ୍ତି।
