ଭୁବନେଶ୍ୱର,୪ା୧୧,(ଅନିଲ ଦାସ): କାର୍ତ୍ତିକ ମାସ ହେଲା। ରାଜ୍ୟରେ ଶୀତ ବଦଳରେ ତାତି ବିରାଜମାନ କରୁଛି। ସକାଳ ୮ଟା ହେବା ମାତ୍ରେ ମାଡ଼ିଆସୁଛି ଟାଇଁ ଟାଇଁ ଖରା। ପାରଦ ୩୫ ଡିଗ୍ରୀକୁ ଟପିଯାଉଛି। ରାଜ୍ୟରେ ସ୍ବାଭାବିକ ଭାବେ ଦିନର ସର୍ବୋଚ୍ଚ ତାପମାତ୍ରା ୩୦ ଡିଗ୍ରୀ ତଳେ ରହିଥାଏ। ମାତ୍ର ଚଳିତ ବର୍ଷ ଏଥିରେ ବ୍ୟତିକ୍ରମ ଦେଖାଦେଇଛି। ପାଣିପାଗ ବିଶେଷଜ୍ଞଙ୍କ କହିବା ଅନୁଯାୟୀ, ଜଳବାୟୁ ପରିବର୍ତ୍ତନ ଓ ପ୍ରଦୂଷଣ ତାପମାତ୍ରା ବୃଦ୍ଧିର ପ୍ରମୁଖ କାରଣ। ଅନ୍ୟପକ୍ଷରେ ପେରୁ ଉପକୂଳ ପୂର୍ବ କେନ୍ଦ୍ରୀୟ ପ୍ରଶାନ୍ତ ମହାସାଗରରେ ରହିଥିବା ଏଲ୍-ନିନ୍ୟୋ ମଧ୍ୟ ଗରମ ବୃଦ୍ଧିର ଅନ୍ୟ ଏକ କାରଣ। ଏଲ୍-ନିନ୍ୟୋ ପ୍ରଭାବରୁ ବାୟୁ ଚଳାଚଳ ପ୍ରଭାବ ପ୍ରଭାବିତ ହୋଇଛି। ରାଜ୍ୟକୁ ଉତ୍ତର ଉତ୍ତର-ପୂର୍ବ ଦିଗ ବଦଳରେ ପୂର୍ବ ଦକ୍ଷିଣ-ପୂର୍ବ ଦିଗରୁ ବାୟୁ ପ୍ରବାହିତ ହେଉଛି। ଏହି କାରଣରୁ ଚଳିତ ବର୍ଷ ଶୀତ କମିଯାଇପାରେ ବୋଲି ଅନୁମାନ କରାଯାଉଛି।
ଶୀତ ଏକପ୍ରକାର ଗାଏବ ହୋଇଯାଇଛି। ଅକ୍ଟୋବର ଶେଷ ଆଡ଼କୁ ଟିକେ ହାଲୁକା ଶୀତ ହୋଇଥିଲା। ନଭେମ୍ବର ୧ ତାରିଖରୁ ରାଜ୍ୟରେ ତାତି ବିରାଜମାନ କରୁଛି। ଦିନରେ ହେଉଥିବା ପ୍ରବଳ ଖରା ପରିବେଶକୁ ଉତ୍ତପ୍ତ କରି ଦେଉଛି। ତାପମାତ୍ରା ୩ରୁ ୪ ଡିଗ୍ରୀ ସେଲ୍ସିୟସ ଉପରକୁ ଉଠିଯାଇଛି। ଆହୁରି ୪/୫ ଦିନ ଏଭଳି ପାଗ ରହିବ। ତାତି ବଢୁଥିବାରୁ ଆଞ୍ଚଳିକ ପାଣିପାଗ ବିଭାଗ ପକ୍ଷରୁ ଉପକୂଳ ଓଡ଼ିଶା ସମେତ କେନ୍ଦୁଝର, ଢେଙ୍କାନାଳ,ମୟୂରଭଞ୍ଜ, କନ୍ଧମାଳ, କଳାହାଣ୍ଡି, ନବରଙ୍ଗପୁର, ରାୟଗଡ଼ା, ମାଲକାନଗିରି, କୋରାପୁଟ ଜିଲାର ଗୋଟିଏ ୨ଟି ସ୍ଥାନରେ ହାଲୁକା ଝଡ଼ବର୍ଷା ହେବ ବୋଲି ପୂର୍ବାନୁମାନ କରାଯାଇଛି। ଆସନ୍ତା ୫ ତାରିଖରୁ ବାୟୁ ପ୍ରବାହର ଗତି ପରିବର୍ତ୍ତନ ହୋଇ ଉତ୍ତର ଉତ୍ତର-ପୂର୍ବ ଦିଗରୁ ବହିବ। ଫଳରେ ତାପମାତ୍ରା କମିବା ସହ ହାଲୁକା ଶୀତ ଆରମ୍ଭ ହେବ। କେତେକ ସ୍ଥାନରେ କୁହୁଡିଆ ପାଗ ମଧ୍ୟ ସୃଷ୍ଟି ହେବ।
