ଥୁଆମୂଳ ରାମପୁର, ୦୬।୦୮ (ଦୁର୍ଗା କୀର୍ତ୍ତି): ଦୃଢ଼ ଇଚ୍ଛାଶକ୍ତି, କଠିନ ପରିଶ୍ରମ ଓ ନିଷ୍ଠା ଆଗରେ ହାର ମାନିଛି ଶାରୀରିକ ଅସମର୍ଥତା। ଅଭାବ ଅନଟନ ଓ ଶାରୀରିକ ସମସ୍ୟା ସତ୍ତ୍ୱେ କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ବଲଙ୍ଗୀ ଗ୍ରାମର ଜଣେ ଗରିବ ଶ୍ରମିକଙ୍କ ପୁଅ ଜ୍ୟୋତିଷ ନାଏକ ଦେଶର ଅଗ୍ରଣୀ ଶିକ୍ଷାନୁଷ୍ଠାନ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (ଜେଏନୟୁ), ନୂଆଦିଲ୍ଲୀରେ ପୋଷ୍ଟ ଗ୍ରାଜୁଏସନ ପଢ଼ିବାକୁ ସୁଯୋଗ ପାଇଛନ୍ତି। ସର୍ବଭାରତୀୟ ସ୍ତରରେ ଆୟୋଜିତ ସିୟୁଇଟି – ପିଜି ପରୀକ୍ଷାରେ କୃତକାର୍ଯ୍ୟ ହୋଇ ସେ ଜେଏନୟୁର ସମାଜ ଶାସ୍ତ୍ର ବିଭାଗରେ ନାମଲେଖା ପାଇଁ ଯୋଗ୍ୟତା ହାସଲ କରିଛନ୍ତି।
ବଲଙ୍ଗୀ ଗ୍ରାମର ଦିନମଜୁରିଆ ଗୁଲା ନାଏକ ଓ ଗୃହିଣୀ ଉଲ୍ଲାସ ନାଏକଙ୍କ ସୁପୁତ୍ର ଜ୍ୟୋତିଷ (ଜନ୍ମ: ୫ ମାର୍ଚ୍ଚ ୨୦୦୧) ଜଣେ ଅତ୍ୟନ୍ତ ସଂଘର୍ଷଶୀଳ ଓ ମେଧାବୀ ଛାତ୍ର। ସେ ନାର୍ଲା ସ୍ଥିତ ଜବାହର ନବୋଦୟ ବିଦ୍ୟାଳୟରୁ ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଶିକ୍ଷାଗ୍ରହଣ କରିବା ପରେ, ବ୍ରହ୍ମପୁର ବିଶ୍ୱବିଦ୍ୟାଳୟ ଅଧୀନସ୍ଥ ରାୟଗଡ଼ା ସ୍ବୟଂଶାସିତ ମହାବିଦ୍ୟାଳୟରୁ ସ୍ନାତକ ଡିଗ୍ରୀ ହାସଲ କରିଥିଲେ। ତେବେ ତାଙ୍କର ଏହି ସଫଳତା ପଛରେ ରହିଛି ଏକ ବଡ଼ ସଂଘର୍ଷର କାହାଣୀ। ପଞ୍ଚମ ଶ୍ରେଣୀରେ ପଢ଼ୁଥିବା ସମୟରୁ ଜ୍ୟୋତିଷ ’ସ୍ନାୟୁ ସମସ୍ୟାଜନିତ ବଧିରତା’ ନାମକ କାନ ସମସ୍ୟାରେ ପୀଡ଼ିତ ଅଛନ୍ତି, ଯାହା ଯୋଗୁଁ ତାଙ୍କର ଶ୍ରବଣ ଶକ୍ତି ଗୁରୁତର ଭାବେ ବାଧାପ୍ରାପ୍ତ ହୋଇଛି। ଶାରୀରିକ ଅସମର୍ଥତା ଥିବା ସତ୍ତ୍ୱେ ମେଡିକାଲ ପରୀକ୍ଷାରେ ତାଙ୍କର ଭିନ୍ନକ୍ଷମତା ୩୦ ରୁ ୩୫ ପ୍ରତିଶତ ମଧ୍ୟରେ ରହୁଥିବାରୁ, ସରକାରୀ ନିୟମ (୪୦ ପ୍ରତିଶତରୁ କମ) ହେତୁ ତାଙ୍କୁ ଭିନ୍ନକ୍ଷମ ମେଡିକାଲ ପ୍ରମାଣପତ୍ର ମିଳିପାରି ନାହିଁ। ଫଳରେ ସେ କୌଣସି ସରକାରୀ ସୁବିଧା ସୁଯୋଗ ବା ସଂରକ୍ଷଣ ନପାଇ ଜଣେ ସାଧାରଣ ଶିକ୍ଷାର୍ଥୀଙ୍କ ପରି ପ୍ରତିଯୋଗିତା କରି ଏହି ଅସାଧାରଣ ସଫଳତା ହାସଲ କରିଛନ୍ତି।
ଜ୍ୟୋତିଷ ସ୍ଥାନୀୟ ଅଞ୍ଛଳରେ ’ପରିବର୍ତ୍ତନ ଟ୍ୟୁସନ’ ମାଧ୍ୟମରେ ଛାତ୍ରଛାତ୍ରୀଙ୍କୁ ପଢ଼ାଇ ଆସୁଥିବାରୁ, ତାଙ୍କର ଏହି ସଫଳତାରେ ଟ୍ୟୁସନ ପରିବାର ଓ ସ୍ଥାନୀୟ ଗ୍ରାମବାସୀ ତାଙ୍କୁ ଶୁଭେଚ୍ଛା ଜଣାଇଛନ୍ତି। ଭବିଷ୍ୟତରେ ଜଣେ ସିଭିଲ ସର୍ଭାଣ୍ଟ (ଆଇଏଏସ/ଓଏଏସ) ହୋଇ ସମାଜ ଓ ଦେଶର ସେବା କରିବାକୁ ସେ ଲକ୍ଷ୍ୟ ରଖିଛନ୍ତି। ସରକାର କିମ୍ବା କୌଣସି ସହୃଦୟ ବ୍ୟକ୍ତି ତାଙ୍କ କାନର ଉପଯୁକ୍ତ ଚିକିତ୍ସା ପାଇଁ ସହାୟତାର ହାତ ବଢ଼ାଇଲେ, ସେ ଉଚ୍ଚଶିକ୍ଷା କ୍ଷେତ୍ରରେ ଆହୁରି ଆଗକୁ ବଢ଼ିପାରନ୍ତେ ବୋଲି ବୁଦ୍ଧିଜୀବୀ ମହଲରେ ମତପ୍ରକାଶ ପାଇଛି। ସୂଚନାଯୋଗ୍ୟ ଯେ, ଏହି ପରିବାରର ବଡ଼ ପୁଅ ମଣିଭଦ୍ର ନାଏକ ମଧ୍ୟ ୨୦୨୪ରେ ଜେଏନୟୁ ରେ ମାଷ୍ଟର ଡିଗ୍ରୀ ପଢ଼ିବା ପାଇଁ ମନୋନୀତ ହୋଇଥିଲେ।
