କେସିଙ୍ଗା,୧୮।୧୧(ତୁମେଶ୍ୱର ସାହୁ): ଦୀର୍ଘଦିନ ଧରି ତାମିଲନାଡ଼ୁର ଏକ ଡିଟରଜେଣ୍ଟ କାରଖାନାରେ ବନ୍ଧକ ଥିବା କଳାହାଣ୍ଡି ଜିଲାର ଦାଦନ ଶ୍ରମିକ ଦିନେଶ ମାଝୀ ଶେଷରେ ଉଦ୍ଧାର ହୋଇ ନିଜ ଗାଁକୁ ଫେରିଛନ୍ତି। ବୁଧବାର ସକାଳେ ସେ କେସିଙ୍ଗା ବ୍ଲକ କସୃପଡ଼ା ଗ୍ରାମ ପଞ୍ଚାୟତ ଅନ୍ତର୍ଗତ ସିଂଝରଣ ଗ୍ରାମରେ ପହଞ୍ଚିବା ପରେ ପରିବାରବର୍ଗଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ସ୍ବାସ୍ଥ୍ୟମନ୍ତ୍ରୀ ଡ. ମୁକେଶ ମହାଲିଙ୍ଗଙ୍କ ହସ୍ତକ୍ଷେପ ତଥା ସରକାର ଓ ଶ୍ରମ ବିଭାଗର ତତ୍ପରତା ଯୋଗୁ ଦିନେଶ ମୁକ୍ତ ହୋଇ ଘରକୁ ଫେରିଥିବାରୁ ତାଙ୍କ ପରିବାର ମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି। ଅଞ୍ଚଳବାସୀ ମଧ୍ୟ ମନ୍ତ୍ରୀଙ୍କ ଉଦ୍ୟମକୁ ପ୍ରଶଂସା କରିଛନ୍ତି।
ସୂଚନା ଅନୁଯାୟୀ, ଚଳିତ ମାସର ପ୍ରଥମ ସପ୍ତାହରେ ଦିନେଶଙ୍କ ସମେତ ସିଂଝରଣ ଗ୍ରାମର କିଛି ଯୁବକ ନିଜ ଉଦ୍ୟମରେ କାମ ଅନ୍ବେଷଣରେ ତାମିଲନାଡ଼ୁ ଯାଇଥିଲେ। ସେଠାରେ ଜଣେ ଅପରିଚିତ ବ୍ୟକ୍ତି ଭଲ କାମ ଯୋଗାଇଦେବାର ପ୍ରଲୋଭନ ଦେଖାଇ ସେମାନଙ୍କୁ ଏକ ଡିଟରଜେଣ୍ଟ କାରଖାନାରେ ନିୟୋଜିତ କରିଥିଲେ। ଅଭିଯୋଗ ଅନୁସାରେ, ସମ୍ପୃକ୍ତ ବ୍ୟକ୍ତି କାରଖାନା ମାଲିକଙ୍କଠାରୁ ଶ୍ରମିକ ପିଛା ମୋଟା ଅଙ୍କର ଅଗ୍ରୀମ ଟଙ୍କା ନେଇ ସେମାନଙ୍କୁ ସେଠାରେ ଛାଡ଼ି ଚାଲିଯାଇଥିଲେ।
ପରବର୍ତ୍ତୀ ସମୟରେ କାରଖାନାରେ ନିର୍ଯାତନା ଓ ବିଭିନ୍ନ ଅସୁବିଧାର ସମ୍ମୁଖୀନ ହେବାରୁ ସାଙ୍ଗରେ ଯାଇଥିବା ଅନ୍ୟ ଯୁବକମାନେ କୌଶଳକ୍ରମେ ସେଠାରୁ ଖସି ଆସିଥିଲେ। ମାତ୍ର ଦିନେଶ କାରଖାନା କର୍ତ୍ତୃପକ୍ଷଙ୍କ ହାତରେ ଧରାପଡ଼ି ସେଠାରେ ଅଟକ ରହିଯାଇଥିଲେ। ତାଙ୍କୁ ମୁକ୍ତ କରିବା ପାଇଁ କାରଖାନା ମାଲିକ ସମ୍ପୃକ୍ତ ମଧ୍ୟସ୍ଥି ନେଇଥିବା ଅଗ୍ରୀମ ଟଙ୍କା ଫେରସ୍ତ କରିବାକୁ ସର୍ତ୍ତ ରଖିଥିବା ଅଭିଯୋଗ ହୋଇଥିଲା। ଏହି ଖବର ପାଇ ଦିନେଶଙ୍କ ପରିବାର ଲୋକେ ଚିନ୍ତିତ ହୋଇପଡ଼ିଥିଲେ। ତାଙ୍କ ଭାଇ ଦିଲୀପ ମାଝୀ ଓ ପରିବାରବର୍ଗ ସାମାଜିକ ଗଣମାଧ୍ୟମରେ ଉଦ୍ଧାର ପାଇଁ ନିବେଦନ କରିବା ସହ ଶ୍ରମ ବିଭାଗ ଓ ବିଭିନ୍ନ ପ୍ରଶାସନିକ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ।
ଘଟଣା ସମ୍ପର୍କରେ ସ୍ବାସ୍ଥ୍ୟମନ୍ତ୍ରୀ ଡ. ମୁକେଶ ମହାଲିଙ୍ଗଙ୍କ ନିକଟରେ ଖବର ପହଞ୍ଚିବା ପରେ ସେ ତୁରନ୍ତ ହସ୍ତକ୍ଷେପ କରିଥିଲେ। ମନ୍ତ୍ରୀଙ୍କ ଉଦ୍ୟମ ଓ ସରକାରଙ୍କ ହସ୍ତକ୍ଷେପ ପରେ ଶ୍ରମ ବିଭାଗ ତତ୍ପରତା ଦେଖାଇଥିଲା। ଶେଷରେ କାରଖାନା ମାଲିକ ଦିନେଶଙ୍କୁ ମୁକ୍ତ କରିଥିଲେ। ଗତକାଲି ତ୍ରିପୁରରୁ ଟ୍ରେନ ଯୋଗେ ଯାତ୍ରା ଆରମ୍ଭ କରି ବୁଧବାର ସକାଳେ ସେ ନିଜ ଗାଁରେ ପହଞ୍ଚିଥିବା ତାଙ୍କ ଭାଇ ଦିଲୀପ ମାଝୀ ସୂଚନା ଦେଇଛନ୍ତି।
ସ୍ଥାନୀୟ ଅଞ୍ଚଳରେ ନିଯୁକ୍ତି ସୁଯୋଗର ଅଭାବ ଯୋଗୁ କାମ ଅନ୍ବେଷଣରେ ବାହାର ରାଜ୍ୟକୁ ଯାଉଥିବା ଶ୍ରମିକମାନେ କିଭଳି ଠକେଇ ଓ ଶୋଷଣର ଶିକାର ହେଉଛନ୍ତି, ଦିନେଶଙ୍କ ଘଟଣା ତାହାର ଏକ ଉଦାହରଣ। ଏଭଳି ଘଟଣାର ପୁନରାବୃତ୍ତି ରୋକିବା ସହ ଦାଦନ ଶ୍ରମିକଙ୍କ ସୁରକ୍ଷା ପାଇଁ ଅଧିକ ସଚେତନତା ଓ ପ୍ରଶାସନିକ ତତ୍ପରତାର ଆବଶ୍ୟକତା ରହିଛି।
Dharitri – Odisha’s No.1 Odia Daily

