ନୂଆପଡ଼ା,୧୮।୪(ମକାରୁ ବେମାଲ)ସ୍ବାଧୀନତାର ଦୀର୍ଘ ବର୍ଷ ପରେ ବି ଲୋକେ ମୌଳିକ ସୁବିଧାରୁ ବଞ୍ଚତ୍ତ। କେନ୍ଦ୍ର ଓ ରାଜ୍ୟ ସରକାର ମାଳମାଳ ଯୋଜନା କରୁଥିଲେ ମଧ୍ୟ ଲୋକ କିମ୍ବା ଗାଁ ପର୍ଯ୍ୟନ୍ତ ପହଞ୍ଚତ୍ ପାରୁନାହିଁ। ସ୍ବାସ୍ଥ୍ୟ, ଶିକ୍ଷା, ବିଜୁଳି ସାତ ସପନ ହୋଇଯାଇଛି। ଏପରି ଏକ ଗାଁ ଦେଖିବାକୁ ମିଳିଛି ଉପାନ୍ତ ନୂଆପଡା ଜିଲା କୋମନା ବ୍ଲକ ସୁନାବେଡା ଅଭୟାରଣ୍ୟ ଭିତରେ ବସବାସ କରୁଥିବା କମାର (ପହରିଆ) ସମ୍ପ୍ରଦାୟର ଗଡଗଡା ଗଁାରେ। ଏହି ଗାଁରେ ୪୦ ପରିବାରର ୩ ଶହରୁ ଊର୍ଦ୍ଧ୍ୱ ଜନସଂଖ୍ୟା ରହିଛି। ସେମାନେ ମୁଖ୍ୟତ ବାଉଁଶରେ ବିଭିନ୍ନ ଘର କରଣି ସମଗ୍ରୀ ତିଆରି କରି ବଜାର ବା ଗାଁରେ ବୁଲି ବିକ୍ରୟ କରି ପରିବାର ଚଳନ୍ତି। ଜଙ୍ଗଲରେ ବାଉଁଶ ମିଳୁ ନ ଥିବାରୁ ତାଙ୍କ କୌଳିକ ବୃତ୍ତି ଲୋପ ପାଇ ଗଲାଣି। ବର୍ଷା ଋତୁରେ ଚାଷ କାମ କରି ଅମଳ ପରେ ଦାଦନ ଯିବା ଛଡା ଅନ୍ୟ କୌଣସି ଉପାୟ ନାହିଁ। ଗାଁର ୫୦ରୁ ଊର୍ଦ୍ଧ୍ୱ ବାହାର ରାଜ୍ୟକୁ କାମ ଅନ୍ବେଷଣରେ ଯାଇଛନ୍ତି। ଗାଁକୁ ଯିବା ପାଇଁ ଭଲ ମଧ୍ୟ ନାହିଁ। ଗାଁରେ ଶୂନରୁ ୬ ବର୍ଷର ୩୦ରୁ ଊର୍ଦ୍ଧ୍ୱ ପିଲା ରହିଛନ୍ତି। ସେମାନଙ୍କ ପାଇଁ ଅଙ୍ଗନୱାଡି କର୍ମୀ ନିଯୁକ୍ତ ହୋଇଛନ୍ତି। ଅଙ୍ଗନୱାଡି ଗୃହ ନ ଥିବାରୁ ଗଛ ମୂଳେ ବା ଅନ୍ୟ କାହା ଘରେ ପିଲାମାନଙ୍କୁ ପ୍ରାକ ଶିକ୍ଷା ଦିଆଯାଉଛି। ଅଙ୍ଗନୱାଡି ଗୃହ ପାଇଁ ୨୦୨୦-୨୧ରେ ୮ ଲକ୍ଷ ୨୦ ହଜାର ଟଙ୍କା ମଞ୍ଜୁର ହୋଇ ଗୃହ ନିର୍ମାଣ କାର୍ଯ୍ୟ ଚାଲିଛି। ଏଯାଏ ସମ୍ପୂର୍ଣ୍ଣ ନ ହୋଇ ଅଧାପନ୍ତରିଆ କରି ପଡିରହିଛି। ସୂଚନା ଫଳକରେ କାର୍ଯ୍ୟ ଆରମ୍ଭ ତାରିଖ ୨୦୨୦ ଜୁନ ୨୯ ଓ କାର୍ଯ୍ୟ ଶେଷ ତାରିଖ ୨୦୨୧ ଜୁନ ୨୫ ରହିଥିବା ବେଳେ ବର୍ତମାନ ସୁଦ୍ଧା ସମ୍ପୂର୍ଣ୍ଣ ହୋଇ ନାହିଁ। ବିଦ୍ୟାଳୟ ନ ଥିବାରୁ ପିଲା ଅଙ୍ଗନୱାଡି କେନ୍ଦ୍ରରୁ ବାହାରିବା ପରେ ପଢି ପାରୁନାହିଁ। ଗାଁରେ ଶିକ୍ଷିତ ଯୁବତୀ କିମ୍ବା ଯୁବକ ନାହାନ୍ତି। ସୁନାବେଡା କିମ୍ବା ଚେରେଚୂଆଁକୁ ପାହାଡିଆ ଜଙ୍ଗଲ ରାସ୍ତା ଦେଇ ୧୦ରୁ ୧୫ କି.ମି. ଯିବାକୁ ପଡେ। ପାହାଡିଆ ଜଙ୍ଗଲ ରାସ୍ତାରେ ପିଲା ଚାଲି ସ୍କୁଲ ଯିବା କାଠିକର ପାଠ। ଗଁାର ଜାନି ପହରିଆ (୬୦), କପୁର ପହରିଆ (୬୦), ଚଇତୁ ପହରିଆ (୬୨), କଳକଲେନ ପହରିଆ (୭୦), ସମର ପହରିଆ (୬୦), ରଇବାରୀ ପହରିଆ (୬୦), ରଇବାରୀ ପହରିଆ (୬୨), ଝୁଲେନ ପହରିଆ (୬୦) ଏପରି ୬୦ ବର୍ଷରୁ ଊର୍ଦ୍ଧ୍ୱ ବୟସ୍କ ବୃଦ୍ଧାବୃଦ୍ଧଙ୍କୁ ବାର୍ଦ୍ଧକ୍ୟ ଭତ୍ତା ମିଳିନାହିଁ। ଗାଁ କିଛି ଲୋକଙ୍କୁ ଆବାସ ଗୃହ ମିଳିଛି। ହେଲେ ନିର୍ମାଣ କାର୍ଯ୍ୟ ଆରମ୍ଭ କରି ନାହାନ୍ତି। ଭୋଟ ସମୟରେ ଅନେକ ନେତା ଆସି ପ୍ରତିଶ୍ରୁତି ଦେଇ ଚାଲି ଯାଆନ୍ତି। ଭୋଟ ପରେ ଦେଖାମିଳେ ନାହିଁ ବୋଲି ଗାଁ ଜଣେ ବୃଦ୍ଧ ବୁଧୁ ପହରିଆ କହିଛନ୍ତି। ଏହି ଗାଁ ଉପରେ ଜିଲା ପ୍ରଶାସନ ସ୍ବତନ୍ତ୍ର ଦୃଷ୍ଟି ଦେଇ ସବୁ ସମସ୍ୟାର ସମାଧାନ କରିବା ଦାବି କରିଛନ୍ତି।
