ଜମ୍ମୁ,୭ ।୧୧: ଜମ୍ମୁ-କଶ୍ମୀରରେ ବିଭିନ୍ନ ପ୍ରକାର ଉତ୍ସବ ପାଳନ ସମୟରେ କୋଭିଡ ଏସ୍ଓପିର ଅବମାନନା କରିବା ଏବେ ମହଙ୍ଗା ପଡିଛି । ନୂଆ ସଂକ୍ରମିତଙ୍କ ମଧ୍ୟରେ ସମ୍ପୂର୍ଣ୍ଣ ପରିବାର ସଂକ୍ରମିତ ହେଉଥିବା ଦେଖାଯାଇଛି । ଜମ୍ମୁ ସହରର ସରୱାଲ ଓ ସଞ୍ଜୟ ନଗର ଅଞ୍ଚଳରେ ଶନିବାର ଗୋଟିଏ ଗୋଟିଏ ପରିବାରର ୫-୫ ଜଣ ଲୋକ ସଂକ୍ରମିତ ହୋଇଥିବା ସୂଚନା ମିଳିଛି । ଦୁଇଟି ଯାକ ପରିବାର କଶ୍ମୀର ପଣ୍ଡିତ ସମ୍ପ୍ରଦାୟର ବୋଲି ଜଣାପଡିଛି । ଶନିବାର ସେଠାରେ ୧୫୧ ସଂକ୍ରମିତଙ୍କୁ ଚିହ୍ନଟ କରାଯାଇଛି । ସୂଚନାଯୋଗ୍ୟ, ଏମାନଙ୍କ ମଧ୍ୟରେ ଅଧିକାଂଶ ସଂକ୍ରମିତ ଦ୍ୱିତୀୟ ଡୋଜ ଟିକା ନେଇ ସାରିଛନ୍ତି । ହେଲେ ଉତ୍ସବ ସମୟରେ ସାମାଜିକ ଦୂରତା ରକ୍ଷା ନ କରିବା ଏମାନଙ୍କ ପାଇଁ ମହଙ୍ଗା ପଡିଛି । ତେବେ ଉତ୍ସବର ଋତୁ ଯିବା ପରେ ଆହୁରି ସଂକ୍ରମିତ ଚିହ୍ନଟ ହେବେବୋଲି କୁହାଯାଉଛି ।
ଏହାକୁ ନେଇ ସ୍ୱାସ୍ଥ୍ୟ ବିଭାଗ ଚିନ୍ତିତ ଥିବା ବେଳେ ଏବେ ସାମାଜିକ ଦୂରତା ରକ୍ଷା କରିବା, ମାସ୍କ ପିନ୍ଧିବା ଓ ଲକ୍ଷଣ ଦେଖାଗଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବାକୁ କୁହାଯାଇଛି ।
