ଭୁବନେଶ୍ୱର,୧୨ା୧୦(ବ୍ୟୁରୋ): ଭୁବନେଶ୍ୱର ଉପକଣ୍ଠ ପାତ୍ରପଡ଼ା ଗାଁ ପୋଖରୀରୁ ବରିଷ୍ଠ ସାମ୍ବାଦିକ ନବୀନ ଦାସଙ୍କ ବଡ଼ପୁଅ ମନୀଷ ଅନୁରାଗ ଦାସଙ୍କ ମୃତଦେହ ମିଳବା ଘଟଣା ଦିନକୁ ଦିନ ରହସ୍ୟ ଘେରକୁ ଟାଣି ହୋଇଯାଉଛି। ଏହି ଘଟଣାକୁ ୩ଦିନ ବିତିଯାଇଥିଲେ ବି ମନୀଷଙ୍କ କିପରି ମୃତ୍ୟୁ ହୋଇଛି, ତା’ର ପ୍ରକୃତ କାରଣ କମିଶନରେଟ ପୋଲିସ ଉନ୍ମୋଚନ କରିପାରି ନାହିଁ। ଏହି ଘଟଣାରେ ପୋଲିସ ଏକ କାର ଜବତ କରିଥିବାବେଳେ ମନୀଷଙ୍କ ଜଣେ ସାଙ୍ଗ ଏବଂ ଅନ୍ୟ ଜଣେ ଯୁବକଙ୍କୁ ଅଟକ ରଖି ପଚରାଉଚରା କରୁଥିବା ଜଣାପଡ଼ିଛି। ଅପରପକ୍ଷରେ ବ୍ୟବଚ୍ଛେଦର ଚୂଡ଼ାନ୍ତ ରିପୋର୍ଟ ଆସି ନ ଥିଲେ ସୁଦ୍ଧା ପ୍ରାଥମିକ ରିପୋର୍ଟରୁ ମନୀଷଙ୍କ ଶ୍ୱାସରୁଦ୍ଧରୁ ମୃତ୍ୟୁ ହୋଇଥାଇପାରେ ବୋଲି ଏମ୍ସର ଡାକ୍ତର ପ୍ରଭାସ ରଞ୍ଜନ ତ୍ରିପାଠୀ ମଙ୍ଗଳବାର ସୂଚନା ଦେଇଛନ୍ତି। ସେହିପରି ରବିବାର ରାତି ୩ଟା ୨୯(ତା.୧୦।୧୦।୨୦୨୧)ରେ ମନୀଷ ପାତ୍ରପଡ଼ାସ୍ଥିତ ସାଉଥସିଟି ହୋଟେଲରୁ ବାହାରି ଏକୁଟିଆ ଚାଲି ଚାଲି ଯିବାର ଏକ ସିସିଟିଭି ଫୁଟେଜ ମଧ୍ୟ ମିଳିଛି।
ଶନିବାର ସାରେ ଇନ୍ଫୋସିଟି ଛକସ୍ଥିତ ଗ୍ବାଭା ଆଇସ୍କ୍ରିମ୍ ପାର୍ଲର ସମ୍ମୁଖରେ ମନୀଷ ନିଜ କାର୍ ଥୋଇ ୨ସାଙ୍ଗଙ୍କ ସହ ଅନ୍ୟ ଏକ କାର୍(ଓଡି୦୨ ଏକ୍ସ ୯୬୯୬)ରେ ଯାଇଥିଲେ। ମଙ୍ଗଳବାର ଉକ୍ତ କାରକୁ ପୋଲିସ ଜବତ କରିଛି। ପୋଲିସ ଅଟକ ରଖିଥିବା ୨ଜଣଙ୍କ ସମ୍ପର୍କରେ କିଛି ସୂଚନା ଦେବାକୁ ଡିସିପି ଉମାଶଙ୍କର ଦାଶ ମନା କରିଦେଇଛନ୍ତି। ଅପରପକ୍ଷରେ ଶନିବାର ରାତିରେ ମନୀଷ ଓ ତାଙ୍କ ସାଙ୍ଗଙ୍କ ମଧ୍ୟରେ ଟଙ୍କା ଦିଆନିଆକୁ ନେଇ ବଚସା ହୋଇଥିଲା ବୋଲି ମଧ୍ୟ ଚର୍ଚ୍ଚା ହେଉଛି। ଏହି ଝଗଡାକୁ କେନ୍ଦ୍ର କରି ସାଙ୍ଗମାନେ କିଛି ଆପରାଧିକ ଘଟଣା ଘଟାଇ ଥାଇପାରନ୍ତି ବୋଲି ସନ୍ଦେହ କରାଯାଉଛି।
