କଟକ ଅଫିସ, ୧୩।୨: ଗଞ୍ଜେଇ ବିକ୍ରି ଅଭିଯୋଗରେ ବାଦାମବାଡି ପୋଲିସ ୨ ଜଣଙ୍କୁ ଗିରଫ କରି ଶନିବାର କୋର୍ଟଚାଲାଣ କରିଛି। ସେମାନେ ହେଲେ କଟକ ଜିଲା ୪୨ ମୌଜା ଥାନା ଅନ୍ତର୍ଗତ ଝିଙ୍କିରିଆ ଗ୍ରାମର ବୁବା ଓରଫ ନାରାୟଣ ପତି ଓ ମଧୁପାଟଣା ଥାନା ଅଧୀନ କଲ୍ୟାଣ ନଗର ଅଞ୍ଚଳର ଅବକାଶ ସ୍ବାଇଁ। ନାରାୟଣଙ୍କଠାରୁ ୨୦ କେଜି ୫୦୦ ଗ୍ରାମ ଗଞ୍ଜେଇ, ୨ଟି ମୋବାଇଲ ଓ ଏକ ସ୍କୁଟି(ନଂ. ଓଡ଼ି୦୫ଏଜି-୮୭୯୦) ଜବତ କରାଯାଇଛି। ଏହାପରେ ତାଙ୍କ ଘର ଉପରେ ଶନିବାର ପୋଲିସ ଚଢ଼ାଉ କରି ୭୫ ଲକ୍ଷ ୨୦ ହଜାର ଟଙ୍କା, ୮୦ ଗ୍ରାମର ସୁନା ଅଳଙ୍କାର, ବିପୁଳ ପରିମାଣର ସିଗାରେଟ୍ ପ୍ୟାକେଟ୍ ଜବତ କରିଥିବା ଡିସିପିଙ୍କ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ଡିସିପି ପ୍ରତୀକ୍ ସିଂ କହିଛନ୍ତି।
ଡିସିପିଙ୍କ ସୂଚନା ଅନୁଯାୟୀ, ୨୦୦୫ରୁ ନାରାୟଣ ନିଶା କାରବାର କରିଆସୁଥିଲେ। ଏହି ଘଟଣାରେ ସେ ଅନେକ ଥର ଧରାପଡ଼ି ଜେଲ୍ ଯାଇଛନ୍ତି। ସେଠାରୁ ଆସିବା ପରେ ମଧ୍ୟ ସେ ଏହି କାରବାର କରୁଥିଲେ। କେହି ଯେପରି ଜାଣି ନ ପାରିବେ ସେଥିପାଇଁ ବାଇକ୍ରେ ଅଳ୍ପ ପରିମାଣର ଗଞ୍ଜେଇ ନେଇ କଟକ ସହର ସମେତ ଆଖପାଖ ଅଞ୍ଚଳରେ ବିକ୍ରି କରୁଥିଲେ। ବିଭିନ୍ନ ସମୟରେ ତାଙ୍କ ନିକଟରୁ କମ୍ ପରିମାଣର ଗଞ୍ଜେଇ ଜବତ କରାଯାଉଥିବାରୁ ସହଜରେ ଜାମିନ ମିଳିଯାଉଥିଲା। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ସିଗାରେଟ୍ କିଣି ଆଣି ସେଥିରେ ଗଞ୍ଜେଇ ଭର୍ତ୍ତି କରି ଏହି ବେଆଇନ କାରବାର କରୁଥିବାବେଳେ ଏଥିରେ ତାଙ୍କୁ ପରିବାର ଲୋକେ ସହଯୋଗ କରୁଥିଲେ। ତାଙ୍କର ଅନ୍ୟ କୌଣସି ରୋଜଗାର ନ ଥିଲା। ତେଣୁ ସେ ମୋଟାଅଙ୍କର ଟଙ୍କାକୁ ବ୍ୟାଙ୍କରେ ରଖିଲେ କାହାର ସନ୍ଦେହ ହେବ ଭାବି ଘରେ ରଖୁଥିଲେ। ପୂର୍ବରୁ ତାଙ୍କ ଉପରେ ସ୍ପେଶାଲ ସ୍କ୍ବାଡ୍ ଓ ବାଦାମବାଡି ପୋଲିସ ନଜର ରଖିଥିଲା। ଶୁକ୍ରବାର ନାରାୟଣ ଓ ତାଙ୍କ ସହଯୋଗୀ ଅବକାଶ ଲିଙ୍କ୍ରୋଡ୍ ନିକଟରେ ଏକ ସ୍କୁଟିରେ ଗଞ୍ଜେଇ ରଖି ଛିଡ଼ା ହୋଇଥିବାବେଳେ ସ୍ପେଶାଲ ସ୍କ୍ବାଡ୍ ଓ ସ୍ଥାନୀୟ ପୋଲିସ ଚଢ଼ାଉ କରି ସେମାନଙ୍କୁ କାବୁ କରି ଥାନାକୁ ନେଇଥିଲା। ସେଠାରେ ନାରାୟଣଙ୍କୁ ପଚରାଉଚରା ପରେ ପୋଲିସ ତାଙ୍କ ଘରେ ଚଢ଼ାଉ କରି ଏକ ଆଲମିରାରେ ଲୁଚାଇ ରଖାଯାଇଥିବା ଟଙ୍କା ସମେତ ଅନ୍ୟ ସାମଗ୍ରୀ ଜବତ କରିଥିଲା। ଏ ନେଇ ବାଦାମବାଡି ଥାନାରେ ଏକ ମାମଲା(ନଂ.୪୦/୨୨) ରୁଜୁ ହୋଇଛି। ପୂର୍ବରୁ ନାରାୟଣଙ୍କ ନଁାରେ ବାଦାମବାଡି, ପୁରୀଘାଟ, କଟକ ସଦର ଓ ମଧୁପାଟଣା ଥାନାରେ ୬ଟି ଏବଂ ଅବକାଶଙ୍କ ନଁାରେ ବାଦାମବାଡି ଥାନାରେ ଗୋଟିଏ ମାମଲା ରହିଛି। ନାରାୟଣ ଅନ୍ୟ ବ୍ୟବସାୟୀଙ୍କୁ ଗଞ୍ଜେଇ ଦେବା ସହ ଛୋଟ ଛୋଟ ପୁଡ଼ିଆ କରି ନିଜେ ବିକ୍ରି କରୁଥିଲେ। ଏହି ଘଟଣାରେ ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ ସେନେଇ ତଦନ୍ତ ଜାରି ରହିଛି। ତେବେ ନାରାୟଣଙ୍କଠାରୁ ବିପୁଳ ପରିମାଣର ଅର୍ଥ ମିଳିବା ପରେ ତାଙ୍କ ଆର୍ଥିକ କାରବାର ବାବଦରେ ତଦନ୍ତ କରିବାକୁ ଆୟକର ବିଭାଗ ଓ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି)କୁ ଅବଗତ କରାଯିବ ବୋଲି ଡିସିପି କହିଛନ୍ତି।
