ପୁରୀ ଅଫିସ,୧୧।୧୦: ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କୁ ଆଖି ପୂରେଇ ଦେଖିବାର ସୁଯୋଗ ନାହିଁ। ସାତଦରିଆ ପାରି ହୋଇ ଶ୍ରୀକ୍ଷେତ୍ରକୁ ଆସିଥିଲେ ବି ବାଇଶ ପାହାଚରେ ସେମାନଙ୍କୁ ପାଦ ପକାଇବା ମନା। ଚକାଆଖି ସହ ଆଖି ମିଶାଇବା ସୁଯୋଗ ନ ଥାଉ ବରଂ ମହାପ୍ରଭୁଙ୍କ ମହାପ୍ରସାଦରେ କିନ୍ତୁ ସେମାନେ ମନ ବୁଝାଇଛନ୍ତି। ମହାପ୍ରସାଦ ସେବନ କରି ଭାବ ଓ ଭକ୍ତିରେ କଳା ଠାକୁରଙ୍କ ସାନ୍ନିଧ୍ୟଲାଭ କରିଛନ୍ତି। ଏମିତି ଦୁଇଜଣ ବିଦେଶୀ ଜଗନ୍ନାଥପ୍ରେମୀ ଭକ୍ତଙ୍କୁ ଶନିବାର ଶ୍ରୀମନ୍ଦିର ଉତ୍ତର ଦ୍ୱାରରେ ଦେଖିବାକୁ ମିଳିଥିଲା। ଏହି ଦୁଇ ବିଦେଶୀ ଭକ୍ତ ତଳେ ବସି ଆନନ୍ଦରେ ଭଙ୍ଗା କୁଡ଼ୁଆରେ ଖାଉଥିଲେ ଅବଢା। ଯିଏ ଦେଖୁଥିଲା ଆପେ ଆପେ ପାଟିରୁ ବାହାରି ଆସୁଥିଲା କାଳିଆ ପ୍ରେମରେ ବନ୍ଧା ବିଦେଶୀ।
ବିଶ୍ୱାସ ରହିଛି ଶ୍ରୀଜଗନ୍ନାଥ ମହାପ୍ରଭୁଙ୍କୁ ଦର୍ଶନ କଲେ ଯେତିକି ପୁଣ୍ୟ ମିଳେ ମହାପ୍ରସାଦ ସେବନରେ ସେତିକି ପୁଣ୍ୟପ୍ରାପ୍ତି ହୋଇଥାଏ। ତେଣୁ ବିଦେଶୀ ଭକ୍ତମାନେ ଅବଢା ପାଇବାର ସୁଯୋଗ ପାଇଲେ ବେଶ୍ ଆନନ୍ଦିତ ହୋଇଥାନ୍ତି। ଶନିବାର ରୁଷିଆର ଦୁଇଜଣ ଜଗନ୍ନାଥପ୍ରେମୀ ଭକ୍ତ ସିଂହଦ୍ୱାର ନିକଟରେ ପହଞ୍ଚତ୍ଥିଲେ। ଦୂରରୁ ପତିତପାବନଙ୍କୁ ଦର୍ଶନ କରିବା ପରେ ଉତ୍ତର ଦ୍ୱାରକୁ ଯାଇଥିଲେ। ସେଠାରୁ ଅବଢା ସଂଗ୍ରହ କରି ନିକଟସ୍ଥ ପାଥ୍ ୱେରେ ବସି ଭଙ୍ଗା କୁଡ଼ୁଆରେ ସେବନ କରିଥିଲେ। ମହାପ୍ରଭୁ ଶ୍ରୀଜଗନ୍ନାଥ ତାଙ୍କ ହୃଦୟରେ ଅଛନ୍ତି। ମନ୍ଦିରକୁ ନ ଯାଇପାରନ୍ତୁ ବରଂ କିନ୍ତୁ ସେମାନେ ଭାବ, ଭକ୍ତିରେ ଠାକୁରଙ୍କୁ ସ୍ମରଣ କରିଛନ୍ତି। ମହାପ୍ରସାଦ ସେବନ କରି ନିଜକୁ ଧନ୍ୟ ମନେକରିବା ସହ ଆତ୍ମତୃପ୍ତି ଲାଭ କରିଥିବା ଏହି ଦୁଇ ବିଦେଶୀ ଜଗନ୍ନାଥପ୍ରେମୀ ଭକ୍ତ କହିଛନ୍ତି।
