ଲକ୍ଷ୍ନୌ,୧୧ ।୯: ଉତ୍ତର ପ୍ରଦେଶର ରାଜଧାନୀ ଲକ୍ଷ୍ନୌ ସ୍ଥିତ ହଜରତଗଞ୍ଜରେ ଥିବା ଲେଭାନା ହୋଟେଲରେ ହୋଇଥିବା ଅଗ୍ନିକାଣ୍ଡ ଘଟଣାକୁ ନେଇ ସରକାର ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଏହି ଘଟଣାରେ ସରକାର ୧୯ ଅଧିକାରୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେଇଛନ୍ତି । ଅଗ୍ନିକାଣ୍ଡର ଯାଞ୍ଚ ଲକ୍ଷ୍ନୌ ମଣ୍ଡଳର ପୋଲିସ କମିଶନରଙ୍କ ଦ୍ୱାରା କରାଯାଉଛି । ଏହି ଯାଞ୍ଚ ରିପୋର୍ଟରେ ଫାୟାର ବ୍ରିଗେଡ, ଶକ୍ତି ବିଭାଗ, ନିଯୁକ୍ତି ବିଭାଗ, ଆବାସ ଓ ସହରି ବିକାଶ ବିଭାଗ ବ୍ୟତୀତ ଅବକାରୀ ବିଭାଗର ଅଧିକାରୀଙ୍କ ନିୟମିତତା ଓ ବେପରୁଆ ମନୋଭାବ ଦେଖିବାକୁ ମିଳିଛି । ଯାହା ପରେ ସରକାରଙ୍କ ଦ୍ୱାରା ଏମାନଙ୍କ ବିରୋଧରେ ନୋଟିସ ଜାରି କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।
ଯେଉଁ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ସେମାନଙ୍କ ମଧ୍ୟରେ ଗୃହ ବିଭାଗର ୪, ଶକ୍ତି ବିଭାଗର ୩, ନିଯୁକ୍ତି ବିଭାଗର ୧, ଆବାସ ଓ ସହରି ନିୟୋଜନ ବିଭାଗର ୮ ଓ ଅବକାରୀ ବିଭାଗର ୩ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଯେଉଁ ୧୯ ଜଣ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ସେମାନଙ୍କ ମଧ୍ୟରୁ ଆବାସ ଓ ସହରି ବିଭାଗର ୩ ଅଧିକାରୀ ଅବସର ନେଇ ସାରିଛନ୍ତି । ଆଉ ଯେଉଁମାନେ ଏବେ କାର୍ଯ୍ୟରତ ସେମାନଙ୍କୁ ତୁରନ୍ତ ସେବା ନିବୃତ୍ତ କରାଯାଇଛି । ଏବେ ଏହି ସମସ୍ତ ଅଧିକାରୀଙ୍କ ବିରୋଧରେ ନିୟମ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
