ମୁମ୍ବାଇ: ବଲିଉଡ ଅଭିନେତ୍ରୀ ହେଜେଲ କେଚ ଓ ପୂର୍ବତନ କ୍ରିକେଟର ଯୁବରାଜ ସିଂଙ୍କ ଘରକୁ ଚଳିତ ବର୍ଷ ଜାନୁଆରୀରେ ଆସିଥିଲେ ଜଣେ ନୂଆ ଅତିଥି । ହେଜେଲ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ । ଆଉ ପୁଅ ଜନ୍ମ ହେବା ପରେ ହେଜେଲ ଓ ଯୁବରାଜ ତାଙ୍କର ପ୍ୟାରେଣ୍ଟହୁଡ ଲାଇଫର ମଜା ଉଠାଉଛନ୍ତି ।
କିଛିଦିନ ହେବ କପଲ ତାଙ୍କ ପୁଅର ଫଟୋ ଶେୟାର କରୁଥିବା ଦେଖାଯାଇଛି । ୧୯ ଜୁନ ଫାଦର୍ସ ଡେ’ ଅବସରରେ କପଲ ତାଙ୍କ କ୍ୟୁଟ ଲାଡଲା ସହ ଏକ ସୁନ୍ଦର ଫଟୋ ଶେୟାର କରିଥିଲେ । ଏହି ଫଟୋକୁ ଶେୟାର କରି ହେଜେଲ ଓ ଯୁବରାଜ ତାଙ୍କ ପୁଅର ନାମ କହିଥିଲେ ।
ହେଜେଲ ଓ ଯୁବରାଜ ତାଙ୍କ ପୁଅର ସବୁଠାରୁ ୟୁନିକ ନାମ ରଖିଛନ୍ତି । ପୁଅର ନାଁ ହେଉଛି ‘ଓରିୟନ କିଚ ସିଂ’ । ପୋଷ୍ଟ ସହ କପଲ ଲେଖିଛନ୍ତି ବିଶ୍ୱକୁ ତୁମକୁ ସ୍ୱାଗତ ଓରିୟନ କିଚ ସିଂ । ମମି ଡାଡି ତୁମକୁ ଖୁବ୍ ଭଲ ପାଆନ୍ତି । ତୁମର ଆଖି ସବୁ ସ୍ମାଇଲ ସହ ସେମିତି ଚମକିଥାଏ ଯେମିତି ତୁମ ନାମ ତାରା ମାନଙ୍କ ମଧ୍ୟରେ ଲେଖାଯାଇଛି, ହାପି ଫାଦର୍ସ ଡେ ।
ସୂଚନା ଅନୁଯାୟୀ, ହେଜେଲ ଓ ଯୁବରାଜଙ୍କ ପୁଅର ନାମ ଏକ ୟୁନିକ ପୌରାଣିକ ଶିକାରି ଓରାୟନଙ୍କ ନାମ ଅନୁଯାୟୀ ରଖାଯାଇଛି । ଯାହାକୁ ଏକ ତାରା ମଣ୍ଡଳରେ ପରିବର୍ତ୍ତନ କରିଦିଆଯାଇଛି । ଆକାଶରେ ଏହି ତାରାମଣ୍ଡଳକୁ ଓରାୟନ ନାମରେ ଚିହ୍ନିତ କରାଯାଇଥାଏ । ଗତ ସପ୍ତାହରେ ବି ହେଜେଲ ତାଙ୍କ ପୁଅର ଏକ ଫଟୋ ଶେୟାର କରିଥିଲେ ଯେଉଁଥିରେ ସେ ଯୁବରାଜଙ୍କ ଛାତି ଉପରେ ଶୋଇଥିବା ଦେଖାଯାଇଥିଲା । ସୂଚନାଯୋଗ୍ୟ, ୧୨ ନଭେମ୍ବର ୨୦୧୫ରେ ଯୁବରାଜ ଓ ହେଜେଲଙ୍କ ନିର୍ବନ୍ଧ ହୋଇଥିବା ବେଳେ, ୩୦ ନଭେମ୍ବର ୨୦୧୬ରେ ଏମାନେ ବିବାହ କରିଥିଲେ । ବିବାହର ପ୍ରାୟ ୫ ବର୍ଷ ପରେ ଘରକୁ ନୂଆ ଅତିଥି ଆସିଛନ୍ତି ।
