ମୁମ୍ବାଇ: ଏବେ ବଲିଉଡର ଅଧିକାଂଶ ଫିଲ୍ମରେ ସାଉଥ୍ ଫିଲ୍ମର ରିମେକ ଦେଖିବାକୁ ପଡୁଛି । ଆଉ ବଲିଉଡ୍ ସେଲିବ୍ରିଟିମାନେ ଏବେ ସାଉଥ ଫିଲ୍ମରେ ଅଭିନୟ କରିବା ଆରମ୍ଭ କରି ଦେଇଛନ୍ତି । ଏବେ ଏହି ଲିଷ୍ଟରେ ସଲମାନଙ୍କ ନାମ ସାମିଲ ହୋଇଯାଇଛି । ଜଣାଶୁଣା ତେଲଗୁ ନିର୍ଦ୍ଦେଶକ ହରିଶ ଶଙ୍କର ସଲମାନ ଖାଁଙ୍କୁ ତାଙ୍କ ଅଗାମୀ ଫିଲ୍ମ ପାଇଁ ଆପ୍ରୋଚ କରିବାକୁ ଯାଉଛନ୍ତି ବୋଲି ଶୁଣିବାକୁ ମିଳିଛି । ନିକଟରେ ହରିଶ ଶଙ୍କର ସଲମାନ ଖାଁଙ୍କୁ ଭେଟିଥିବାରୁ କିଛି ଫଟୋ ସୋସିଆଲ ମିଡିଆରେ ଦେଖିବା ପରେ ପ୍ରଶଂସକଙ୍କ ଉତ୍ସାହ ବଢିଯାଇଛି ।
କିଛିଦିନ ତଳେ ସଲମାନ ଏକ ଆଡ ଶୁଟିଂ କରୁଥିବା ସମୟରେ ହରିଶ ଶଙ୍କର ତାଙ୍କ ସହ ଦେଖା କରିଥିଲେ ବୋଲି କୁହାଯାଏ । ଏବେ ନିର୍ଦ୍ଦେଶକ ହରିଶ ଶଙ୍କର ଏକ ସ୍କ୍ରିପ୍ଟ ଉପରେ କାମ କରୁଥିବା ବେଳେ ଏଥିପାଇଁ ସେ ଖୁବଶୀଘ୍ର ସଲମାନଙ୍କୁ ଆପ୍ରୋଚ କରିବେ ବୋଲି ଜଣାପଡିଛି । ନିର୍ଦ୍ଦେଶକ ହରିଶ ଶଙ୍କର ବହୁ ଚର୍ଚ୍ଚିତ ଫିଲ୍ମ ଗବ୍ୱର ସିଂର ନିର୍ଦ୍ଦେଶକ । ଏହା ବଲିଉଡ ମୁଭି ‘ଦବଙ୍ଗ’ର ରିମେକ । ଏଥିରେ ସଲମାନଙ୍କ ଚରିତ୍ରରେ ଅଭିନୟ କରିଛନ୍ତି ପୱନ କଲ୍ୟାଣ । ଏହାର ସିକ୍ୱୁଏଲ ସରଦାର ଗବ୍ୱର ସିଂ କିନ୍ତୁ ଦବଙ୍ଗ ୨ର ରିମେକ ନୁହେଁ ବୋଲି ସ୍ପଷ୍ଟ କରାଯାଇଛି ।
