ଡେରାବିଶ,୧୦ା୯ (ବେବର୍ତ୍ତା ଅଜୟ ଦାସ)ତିନି ତିନି ବର୍ଷରୁ ୬ ବର୍ଷ ଯାଏ ଶିଶୁଙ୍କ ମାନସିକ ଓ ଶାରିରୀକ ଅଭିବୃଦ୍ଧି ନିମନ୍ତେ ରାଜ୍ୟ ସରକାରଙ୍କ ମହିଳା ଓ ଶିଶୁ ସମନ୍ବିତ ବିକାଶ ବିଭାଗ ପକ୍ଷରୁ ଅଙ୍ଗନୱାଡି କେନ୍ଦ୍ରରେ ସେମାନଙ୍କୁ ବିଭିନ୍ନ ଖେଳ କୌତୁକ ଶିକ୍ଷା ପ୍ରଦାନ କରାଯାଉଛି। ମାତ୍ର କେନ୍ଦ୍ରାପଡ଼ା ଜିଲା ଅନ୍ତର୍ଗତ ଡେରାବିଶ ବ୍ଲକ ଅଧୀନ ହରିଅଙ୍କ (ଜେନାସାହି) ଗ୍ରାମରେ ଏକ ଅଙ୍ଗନୱାଡି କେନ୍ଦ୍ର ରହିଛି। ଏହି କେନ୍ଦ୍ରରେ ଗ୍ରାମର ୧୩ ନଂ. ଓ ୧୫ନଂ. ୱାର୍ଡର ସମୂଦାୟ ୩୦ ଜଣ କୋମଳମତି ଶିଶୁ ଅଧ୍ୟୟନ କରୁଛନ୍ତି। କେନ୍ଦ୍ରର ସ୍ଥାୟୀ ଗୃହ ନ ଥିବାରୁ ଗ୍ରାମରେ ଥିବା ପ୍ରକଳ୍ପ ପ୍ରାଥମିକ ବିଦ୍ୟାଳୟରେ କେନ୍ଦ୍ର ଚାଲୁଛି। ଏହି ପ୍ରାଥମିକ ବିଦ୍ୟାଳୟଟିରେ କମ୍ ସଂଖ୍ୟକ ଛାତ୍ରୀଛାତ୍ର ଥିବାରୁ ଅନ୍ୟ ବିଦ୍ୟାଳୟ ସହ ମର୍ଜ ହୋଇଯାଇଛି। ଖାଲି ପଡ଼ିଥିବା ଏହି ବିଦ୍ୟାଳୟ ଗୃହଟି ବିପଦ ସଙ୍କୁଳ ଅବସ୍ଥାରେ ପଡ଼ି ରହିଛି। ତେବେ ବିଦ୍ୟାଳୟ ଗୃହରେ ପଡ଼ିଥିବା ଆଜବେଷ୍ଟସ ବହୁ ପୁରୁଣା ହୋଇଥିବାରୁ ତାହା ଭାଙ୍ଗିରୁଜି ଗଲାଣି। ଗୃହର କାନ୍ଥରେ ବହୁ ସ୍ଥାନରେ ଫାଟ ସୃଷ୍ଟି ହୋଇଛି। ବର୍ଷା ହେଲେ ଘର ଭିତରେ ପାଣି ଜମିବା ସହ ସାପ ଓ ବେଙ୍ଗ ଭିତରେ ଖେଳିଥାନ୍ତି। ଏଭଳି ଏକ ବିପଦ ସଙ୍କୁଳ ଗୃହରେ ଚାଲିଛି ଅଙ୍ଗନୱାଡି କେନ୍ଦ୍ର। କିଛିଦିନ ହେବ ଲଗାଣ ବର୍ଷା ପାଇଁ ଏହି କେନ୍ଦ୍ରରେ ଶିଶୁମାନଙ୍କୁ ଶିକ୍ଷାଦାନ କରିବା ସୁରକ୍ଷିତ ହେଉ ନ ଥିବାରୁ ସାମାଜିକ କର୍ମୀ ସୁଖଦାନନ୍ଦ ପ୍ରଧାନ ବ୍ୟକ୍ତିଗତ ଭାବେ ଏକ ପାଲ ଭଙ୍ଗା ଆଜବେଷ୍ଟସ ଉପରେ ପକାଇଛନ୍ତି। ଏହି ବିଷୟରେ ହରିଅଙ୍କ ସରପଞ୍ଚ କନକଲତା ପ୍ରଧାନଙ୍କୁ ପଚାରିବାରୁ ଏହି କେନ୍ଦ୍ର ପାଇଁ ଏକ ସ୍ଥାୟୀ ଗୃହ ନିର୍ମାଣ କରିବା ପାଇଁ ଡେରାବିଶ ସିଡିପିଓ ଓ ବିଡିଓଙ୍କୁ ବାରମ୍ବାର ଲିଖିତ ଭାବେ ଜଣାଇଛି। ମାତ୍ର ଏହି ଦିଗରେ କୌଣସି ପଦକ୍ଷେପ ନିଆଯାଇନାହିଁ। ତୁରନ୍ତ ଏହି କେନ୍ଦ୍ରର ସ୍ଥାୟୀ ପକ୍କା ଗୃହ ନିର୍ମାଣ ପାଇଁ ପ୍ରଧାନ ବ୍ଲକ ପ୍ରଶାସନ ନିକଟରେ ଦାବି ଜଣାଇଛନ୍ତି। ସିଡିପିଓ ସ୍ନେହଲତା ସାହୁଙ୍କୁ ପଚାରିବାରୁ କେନ୍ଦ୍ରର ସ୍ଥାୟୀ ଘର ପାଇଁ ସରପଞ୍ଚଙ୍କ ଦାୟିତ୍ୱ ରହିଛି। ତାଙ୍କର ନୁହେଁ ବୋଲି ସାହୁ କହିଛନ୍ତି। ତେବେ ଖୁବ୍ଶୀଘ୍ର ଏହି କେନ୍ଦ୍ରର ଅବସ୍ଥା ପରିଦର୍ଶନ କରିବା ପରେ ଯାହା କିଛି ପଦକ୍ଷେପ ନେବେ ବୋଲି ସିଡିପିଓ ସାହୁ କହିଛନ୍ତି। ଏ ସମ୍ପର୍କରେ ବିଡିଓ ଦାଶରଥି ଜେନାଙ୍କୁ ପଚାରିବାରେ ସମ୍ପୃକ୍ତ ପଞ୍ଚାୟତର ସରପଞ୍ଚଙ୍କ ସହ ଆଲୋଚନା କରିବା ପରେ ଖୁବ୍ଶୀଘ୍ର ଏହି କେନ୍ଦ୍ର ପାଇଁ ସ୍ଥାୟୀ ଗୃହ ନିର୍ମାଣ କରିବା ପାଇଁ ପଦକ୍ଷେପ ନିଆଯିବ ବୋଲି ସେ କହିଛନ୍ତି।
