ମୁମ୍ବାଇ,୧୪।୫ : ଭାରତୀୟ ଦିନିକିଆ ଓ ଟି୨୦ ଦଳରେ ହାର୍ଦ୍ଦିକ ପାଣ୍ଡ୍ୟାଙ୍କ ପାଇଁ ଯାଗା ନାହିଁ। ଅସ୍ତ୍ରୋପଚାର ପରେ ସେ ନିୟମିତ ବୋଲିଂ କରିପାରୁ ନାହାନ୍ତି। ଏହି କାରଣରୁ ତାଙ୍କୁ ଚୟନକର୍ତ୍ତା ଲମ୍ବା ଫର୍ମାଟ ପାଇଁ ଅଣାଦେଖା କରୁୁଛନ୍ତି। ମତେ ଲାଗୁଛି ଯଦି ଦିନିକିଆରେ ୧୦ ଓଭର ଏବଂ ଟି୨୦ରେ ୪ ଓଭର ବୋଲିଂ ନ କରିପାରିବେ, ତେବେ ସେ ଚୂଡ଼ାନ୍ତ ଏକାଦଶରେ ସ୍ଥାନ ପାଇପାରିବେ ନାହିଁ। କାରଣ ସେ ଜଣେ ସ୍ପେଶାଲିଷ୍ଟ ବ୍ୟାଟ୍ସମ୍ୟାନ ନୁହନ୍ତି। ହାର୍ଦ୍ଦିକଙ୍କ ଉପରେ ଏଭଳି ମନ୍ତବ୍ୟ ଦେଇଛନ୍ତି ପୂର୍ବତନ ଚୟନକମିଟି ସଦସ୍ୟ ସରଣଦୀପ ସିଂ। ଚଳିତ ବର୍ଷ ଅଷ୍ଟ୍ରେଲିଆ ଗସ୍ତରେ ଭାରତୀୟ ଦଳର ଅପୂର୍ବ ସଫଳତା ପରେ ଶେଷ ହୋଇଥିଲା ସରଣଦୀପଙ୍କ କାର୍ଯ୍ୟକାଳ।
୨୦୧୯ରେ ପିଠିରେ ଅସ୍ତ୍ରୋପଚାର ହେବା ପରେ ହାର୍ଦ୍ଦିକ ନିୟମିତ ବୋଲିଂ କରୁ ନାହାନ୍ତି। ଏହି କାରଣରୁ ଇଂଲଣ୍ଡ ଗସ୍ତ ପାଇଁ ଘୋଷିତ ଭାରତୀୟ ଦଳରେ ତାଙ୍କୁ ସ୍ଥାନ ମିଳିନାହିଁ।
ଯଦି ହାର୍ଦ୍ଦିକ ବୋଲିଂ ନ କରନ୍ତି, ତେବେ ଏହା ଭାରତୀୟ ଦଳର କ୍ଷତି କରିବ। ଏଥି ଯୋଗୁ ଟିମ୍ ଇଣ୍ଡିଆକୁ ଜଣେ ଅତିରିକ୍ତ ବୋଲର ଖେଳାଇବାକୁ ପଡ଼ିବ। ଫଳରେ ସୂର୍ଯ୍ୟକୁମାର ଯାଦବଙ୍କ ଭଳି ଖେଳାଳି ବାହାରେ ବସିବେ। ୫ ବୋଲରଙ୍କୁ ନେଇ ଖେଳିବା ଦ୍ୱାରା ଟିମ୍ ଇଣ୍ଡିଆର ସନ୍ତୁଳନ ପ୍ରଭାବିତ ହେଉଛି, ଯାହାକି ଅଷ୍ଟ୍ରେଲିଆ ଓ ଇଂଲଣ୍ଡ ଦିନିକିଆ ସିରିଜ୍ରେ ଦେଖିବାକୁ ମିଳିଥିଲା। ତେବେ ଦଳ ପାଖରେ ରବୀନ୍ଦ୍ର ଜାଡେଜା, ଓ୍ବାଶିଂଟନ ସୁନ୍ଦର, ଅକ୍ଷର ପଟେଲ, ଶାର୍ଦ୍ଦଳ ଠାକୁରଙ୍କ ଭଳି ଅଲରାଉଣ୍ଡର ଅଛନ୍ତି। ସେମାନେ ହାର୍ଦ୍ଦିକଙ୍କ କାମ କରିଦେବେ ବୋଲି ପୂର୍ବତନ ସ୍ପିନର ସରଣଦୀପ କହିଛନ୍ତି।
