ନୂଆଦିଲ୍ଲୀ,୧୬।୧୨: ଡିସେମ୍ବର ୧୫ରେ ହୋଇଥିବା ଏକ ଘୋଷଣା ଭାରତୀୟ କ୍ରିକେଟ ପ୍ରଶଂସକଙ୍କ ହୃଦୟ ଭାଙ୍ଗିଛି କହିଲେ ଚଳେ। କାରଣ ମୁମ୍ବାଇ ଇଣ୍ଡିଆନ୍ସ ବଡ଼ ନିଷ୍ପତ୍ତି ନେଇ ରୋହିତ ଶର୍ମାଙ୍କୁ ଅଧିନାୟକ ପଦରୁ ହଟାଇ ଦେଇଛି। ତାଙ୍କ ସ୍ଥାନରେ ହାର୍ଦ୍ଦିକ ପାଣ୍ଡ୍ୟାଙ୍କୁ ନିଯୁକ୍ତି ମିଳିଛି। ସେ ଜଣେ ଭଲ ଅଲରାଉଣ୍ଡର ହୋଇଥିବା ବେଳେ ନିଜକୁ ଅଧିନାୟକ ଭାବେ ସାବ୍ୟସ୍ତ ମଧ୍ୟ କରିଛନ୍ତି। ହେଲେ ଆଇପିଏଲ୍ ୨୦୨୪ ତାଙ୍କୁ ଦାୟିତ୍ୱ ଦେବା ମୁମ୍ବାଇ ପାଇଁ ଅଡୁଆ ସାଜିପାରେ ବୋଲି କୁହାଯାଉଛି। ଆସନ୍ତୁ ଜାଣିବା ଏହାର ୫ ପ୍ରମୁଖ କାରଣ:
-ବାରମ୍ବାର ଆଘାତ ଲାଗୁଥିବା ଖେଳାଳି
ହାର୍ଦ୍ଦିକ ଜଣେ ମ୍ୟାଚ୍ ବିଜେତା ଖେଳାଳି ହେଲେ ହେଁ ଲଗାତାର ଭାବେ ଆହତ ହୋଇଥାନ୍ତି। ୨୦୨୩ରେ ମଧ୍ୟ ସେଭଳି ହୋଇଥିଲା। ସେ ମାତ୍ର ୩ ମ୍ୟାଚ୍ ଖେଳି ବାଦ୍ ପଡ଼ିଥିଲେ। ଏମିତିରେ ତାଙ୍କୁ ଅଧିନାୟକ କରିବା ଛୁରୀ ଧାରରେ ଚାଲିବା ଭଳି ହୋଇପାରେ। ଦଳକୁ ଏହାର ପରିଣାମ ଭୋଗିବାକୁ ପଡ଼ିପାରେ।
-ଷ୍ଟାଣ୍ଡବାଏ ଅଧିନାୟକ ରଖିବାକୁ ହେବ:
ପାଣ୍ଡ୍ୟାଙ୍କ ଫିଟ୍ନେସ୍କୁ ଦେଖି ମୁମ୍ବାଇକୁ ଏକ ଷ୍ଟାଣ୍ଡବାଏ ଅଧିନାୟକ ମଧ୍ୟ ରଖିବାକୁ ହେବ। ସେ ପାଣ୍ଡ୍ୟାଙ୍କ ଅନୁପସ୍ଥିତିରେ ଦଳକୁ ସମ୍ଭାଳି ନେବେ। କାରଣ ନିୟମିତ ଅଧିନାୟକ ବାଦ ପଡ଼ିଲେ ଦଳକୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଥାଏ। ଗତ ବର୍ଷ ଦିଲ୍ଲୀ କ୍ୟାପିଟାଲ୍ସ ଏବଂ କୋଲକାତା ନାଇଟ୍ ରାଇଡର୍ସ ଏଭଳି ସ୍ଥିତିରେ ପଡ଼ିଥିଲେ।
-ଅଲରାଉଣ୍ଡର ଭାବେ ଖେଳିବେ କି?
ପାଣ୍ଡାଙ୍କ ଆହତ ସମସ୍ୟାକୁ ଦେଖି ପ୍ରଥମ ପ୍ରଶ୍ନ ଏହା ଯେ ମୁମ୍ବାଇ ଟିମ୍ ତାଙ୍କୁ ଅଲରାଉଣ୍ଡର ଭାବେ ଓହ୍ଲାଇବ କି? ୨୦୨୧ରେ ମୁମ୍ବାଇ ତାଙ୍କୁ ଆହତ ସମସ୍ୟା ଯୋଗୁ ବୋଲିଂ କରି ନ ପାରିବାରୁ ରିଲିଜ କରିଥିଲା। ଏବେ ମଧ୍ୟ ସେଭଳି କିଛି ହୋଇପାରେ। ଯଦି ସେ ୧୦୦% ଫିଟ୍ ନୁହନ୍ତି ତେବେ ମୁମ୍ବାଇକୁ ଅସୁବିଧାର ସମ୍ମୁଖୀନ ହେବାକୁ ପଡ଼ିପାରେ।
-ଟିମ୍ରେ ଏକତା ରହିବ?
ଅଧିନାୟକ ଭାବେ ରୋହିତଙ୍କ କଥାକୁ ଦଳର ଖେଳାଳି ମାନି ଆସୁଥିଲେ। ସେମାନେ ସର୍ବଦା ଏକ ଟିମ୍ ଭାବେ ସର୍ବଶ୍ରେଷ୍ଠ ଦେବାକୁ ଚାହୁଁଥିଲେ। ହେଲେ ପାଣ୍ଡ୍ୟାଙ୍କୁ ନେଇ ସମସ୍ତଙ୍କ ମନରେ ସେଭଳି ଭାବନା ଆସିବ କି? କାରଣ ମୁମ୍ବାଇକୁ ପାଣ୍ଡ୍ୟା ଫେରିବା ନେଇ ଖବର ଆସିବା ପରେ ଜସପ୍ରିତ ବୁମ୍ରା ଫ୍ରାଞ୍ଚାଇଜ୍କୁ ଅନ୍ଫଲୋ କରିଦେଇଛନ୍ତି। ବୁମ୍ରା ରାଗରେ ଏଭଳି କରିଥିବା କୁହାଯାଉଛି। କେବଳ ସେ ନୁହନ୍ତି ସୂର୍ଯ୍ୟକୁମାର ଯାଦବ ମଧ୍ୟ ହୃଦୟ ଭାଙ୍ଗିବାର ଇମୋଜି ଦେଇଥିଲେ।
-ମୁମ୍ବାଇରେ ସମର୍ଥନ କମ୍ ମିଳିବ?
ଆଇପିଏଲ୍ରେ ସବୁଠାରୁ ଲୋକପ୍ରିୟ ଟିମ୍ ହେଉଛି ମୁମ୍ବାଇ। ସୋସିଆଲ ମିଡିଆରେ ମଧ୍ୟ ଏହାର ପ୍ରଶଂସକ ଅଧିକ। ହେଲେ ରୋହିତ ହଟିବା ପରେ ଲକ୍ଷାଧିକ ଲୋକ ଏହାର ଆକାଉଣ୍ଟକୁ ଅନଫଲୋ କରିଦେଇଛନ୍ତି। ଏଥିରୁ ସେମାନେ ନିରାଶ ହୋଇଥିବା ସ୍ପଷ୍ଟ ହୋଇଛି। ଏହାର ପ୍ରଭାବ ଆଇପିଏଲ ୨୦୨୪ ସମୟରେ ମୁମ୍ବାଇ ମ୍ୟାଚ୍ ଉପରେ ପଡ଼ିବ ବୋଲି ଆଶଙ୍କା କରାଯାଉଛି।
