ଚଣ୍ଡିଗଡ,୧୨।୧୨: ଗୁଗଲି ବଲ୍ରେ ବିଶ୍ୱର ବଡ ବଡ ବ୍ୟାଟ୍ସମ୍ୟାନଙ୍କୁ ଆଉଟ୍ କରିଥିବା ଭାରତୀୟ ସ୍ପିନର ହରଭଜନ ସିଂ ଭାଜପାରେ ଯୋଗଦେବା ଆଲୋଚନାକୁ ଖଣ୍ଡନ କରିଛନ୍ତି। ସୋସିଆଲ ମିଡିଆରେ ଚାଲିଥିବା ଗୁଜବକୁ ସେ ମିଥ୍ୟା ବୋଲି କହିଛନ୍ତି। ୨୦୧୭ ବିଧାନସଭା ନିର୍ବାଚନରେ ହରଭଜନ କଂଗ୍ରେସରେ ଯୋଗଦେବା ବିଷୟରେ ମଧ୍ୟ ଆଲୋଚନା ହୋଇଥିଲା।
ଜଲନ୍ଦରରୁ ଆସିଥିବା ହରଭଜନ ସିଂ ଖୁବ ଶୀଘ୍ର ସମସ୍ତ ପ୍ରକାର କ୍ରିକେଟରୁ ଅବସର ନେବାକୁ ଯାଉଛନ୍ତି। ଏଭଳି ପରିସ୍ଥିତିରେ ପଞ୍ଜାବ ନିର୍ବାଚନରେ ହରଭଜନ ସିଂ ଭାଜପାର ମୁଖ ହୋଇପାରନ୍ତି ବୋଲି ସୋସିଆଲ ମିଡିଆରେ ଏହି ବାର୍ତ୍ତା ଭାଇରାଲ ହେବାରେ ଲାଗିଛି। ଏହା ପରେ କ୍ରିକେଟର ହରଭଜନ ସିଂ ନିଜେ ବାହାରକୁ ଆସି ଏହି ଗୁଜବକୁ ଖଣ୍ଡନ କରିଥିଲେ। ମୋର ଭାଜପାରେ ଯୋଗଦେବା ଆଲୋଚନା ସମ୍ପୂର୍ଣ୍ଣ ଭୁଲ ବୋଲି ହରଭଜନ ସିଂ କହିଛନ୍ତି। ସେ ଏପର୍ଯ୍ୟନ୍ତ କୌଣସି ରାଜନୈତିକ ଦଳରେ ଯୋଗ ଦେଉନାହାଁନ୍ତି। ଏହି ସମୟରେ ପଞ୍ଜାବରେ ଭାଜପା ନିଜର ପୁରୁଣା ସହଯୋଗୀ ଶିରୋମଣି ଅକାଳୀ ଦଳ ବିନା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବାରୁ ଭାଜପା ସହ ହରଭଜନଙ୍କ ଆଲୋଚନା ମଧ୍ୟ ବୃଦ୍ଧି ପାଇଛି।
