ନୂଆଦିଲ୍ଲୀ,୨୪।୧୧: ଟି୨୦ ବିଶ୍ୱକପ୍ରେ ନିରାଶାଜନକ ପ୍ରଦର୍ଶନ ଯୋଗୁ ସେମିଫାଇନାଲରୁ ବିଦା ହୋଇଥିଲା ଭାରତୀୟ କ୍ରିକେଟ ଟିମ୍। ଏହାପରଠାରୁ ଦଳରେ କୋଚ୍ ଏବଂ ଅଧିନାୟକ ପରିବର୍ତ୍ତନକୁ ନେଇ ଆଲୋଚନା ହେଉଛି। ଏସବୁ ମଧ୍ୟରେ ଦଳର ପୂର୍ବତନ ସ୍ପିନର ହରଭଜନ ସିଂ ନିଜର ପ୍ରତିକ୍ରିୟା ରଖିଛନ୍ତି।
ହରଭଜନ କହିଛନ୍ତି, ଆଶିଷ ନେହେରାଙ୍କ ଭଳି ବ୍ୟକ୍ତିତ୍ୱକୁ ଭାରତର ଟି୨୦ କୋଚ୍ ହେବା ଉଚିତ। କାରଣ ସେ ଦ୍ରାବିଡଙ୍କ ତୁଳନାରେ ଅନ୍ତର୍ଜାତୀୟ କ୍ରିକେଟର ସବୁଠାରୁ ଛୋଟ ଫର୍ମାଟକୁ ବେଶ ଭଲ ଭାବେ ବୁଝନ୍ତି। ସେ କୋଚ୍ ଥିବା ବେଳେ ଗୁଜରାଟ ଟାଇଟନ୍ସ ନିଜର ପ୍ରଥମ ସିଜନରେ ହାର୍ଦ୍ଦିକ ପାଣ୍ଡ୍ୟାଙ୍କ ଅଧିନାୟକତ୍ୱରେ ନିଜର ପ୍ରଥମ ଆଇପିଏଲ୍ ଟାଇଟଲ ହାସଲ କରିଥିଲା। ନେହେରା ଏହି ଟୁର୍ନାମେଣ୍ଟରେ ଶାନ୍ତ ରହି ଖେଳିବାକୁ ପରାମର୍ଶ ଦେଇଥିଲେ। ଏହା ଫଳପ୍ରଦ ହୋଇଥିଲା ବୋଲି ସେ କହିଛନ୍ତି।
ଏହାଛଡ଼ା ନେହେରାଙ୍କୁ ନେଇ ସେ କହିଛନ୍ତି, ଯିଏ ନିକଟରେ ଏହି ଫର୍ମାଟରେ ଖେଳିଛନ୍ତି ସେ ଟି୨୦ରେ କୋଚ୍ ଭୂମିକା ପାଇଁ ଯୋଗ୍ୟ। ତା ଅର୍ଥ ନୁହେଁ ଦ୍ରାବିଡଙ୍କୁ କୋଚ୍ ପଦରୁ ହଠାଇଦେବା। ତାଙ୍କ ସହ ଦୀର୍ଘ ଦିନ ଖେଳିଛି। ଏଥିପାଇଁ ତାଙ୍କ ପ୍ରତି ବହୁତ ସମ୍ମାନ ରହିଛି। ବୋର୍ଡ ଚାହିଁଲେ ନେହେରା ଏବଂ ରାହୁଲଙ୍କୁ ମିଶାଇ ୨୦୨୪ ବିଶ୍ୱକପ୍ ପାଇଁ ଦଳ ଚୟନକୁ ନେଇ କାମ କରିପାରିବେ ବୋଲି ହରଭଜନ କହିଛନ୍ତି।
