ହାଟଡିହୀ/ଛେନାପଦୀ, ୨।୧୦ (ଶୁଭକାନ୍ତ ନାୟକ/ନିରାକାର ପରିଡ଼ା): କେନ୍ଦୁଝର ଜିଲା ହାଟଡିହୀ ବ୍ଲକ ଡ଼ଅଁର ପଞ୍ଚାୟତ ଅନ୍ତର୍ଗତ ସରଳା-ରାଧାନଗରପାଟଣା ଗ୍ରାମରେ ଜଣେ ନବବଧୂଙ୍କୁ ୧୦ ଲକ୍ଷ ଟଙ୍କା ଯୌତୁକ ଦାବି କରି ନିର୍ଯାତନା ଦେବା ସହ ମରଣାନ୍ତକ ଆକ୍ରମଣ କରାଯାଇଥିବା ଅଭିଯୋଗ ହୋଇଛି। ଏନେଇ ଅକ୍ଟୋବର ୧ ତାରିଖରେ ନନ୍ଦିପଦା ଥାନାରେ ମାମଲା ନଂ. ୩୭୦/୨୦୨୬ ରୁଜୁ ହୋଇଛି।
ଅଭିଯୋଗ ଅନୁସାରେ, ଗ୍ରାମର ନମ୍ରତା ବେହେରା ନିଜ ଗ୍ରାମର ବନମାଳୀ ଜେନାଙ୍କ ପୁଅ ତାପସଙ୍କୁ ଭଲ ପାଇ ଗତ ୧୧ ଜୁଲାଇ ୨୦୨୫ରେ ଭଦ୍ରକସ୍ଥିତ ଏକ ଶିବ ମନ୍ଦିରରେ ହିନ୍ଦୁ ରୀତିନୀତି ଅନୁସାରେ ବିବାହ କରିଥିଲେ। ବିବାହ ପରେ ନମ୍ରତା ନିଜ ସ୍ୱାମୀଙ୍କ ସହ ଗାଁରେ ରହୁଥିଲେ। ପରିବାର ବିରୋଧରେ ପ୍ରେମ ବିବାହ କରିଥିବାରୁ ନମ୍ରତାଙ୍କର ବାପଘର ସହ ସମସ୍ତ ସମ୍ପର୍କ ବିଚ୍ଛିନ୍ନ ହୋଇଥିଲା।
ବିବାହର ପ୍ରାୟ ୨ ମାସ ପରେ ସ୍ୱାମୀ ତାପସଙ୍କ ସମେତ ଶାଶୁ ଝରଣା ଜେନା, ଶ୍ୱଶୁର ବନମାଳୀ ଜେନା ଓ ନଣନ୍ଦ ସୁନେଲି ଜେନା ମିଳିମିଶି ନମ୍ରତାଙ୍କୁ ଯୌତୁକ ବାବଦରେ ୧୦ ଲକ୍ଷ ଟଙ୍କା ଓ ସୁନାଗହଣା ଦାବି କରି ନିର୍ଯାତନା ଦେଇଥିବା ଅଭିଯୋଗ ହୋଇଛି। ତେବେ ବାପଘର ସହ ସମ୍ପର୍କ ନଥିବାରୁ ଦାବି ମୁତାବକ ଯୌତୁକ ଦେବାକୁ ନମ୍ରତା ଅକ୍ଷମତା ପ୍ରକାଶ କରିଥିଲେ।
ଏହାକୁ ନେଇ ବିଭିନ୍ନ ସମୟରେ ଅଭିଯୁକ୍ତମାନେ ନମ୍ରତାଙ୍କୁ ମାଡ଼ ମାରିବା ସହ ଗାଳିଗୁଲଜ କରୁଥିବା ଅଭିଯୋଗରେ ଦର୍ଶାଯାଇଛି। ଗତ ଜୁନ୍ ୧୬ ତାରିଖ ଏବଂ ସେପ୍ଟେମ୍ବର ୯ ତାରିଖରେ ଅଭିଯୁକ୍ତମାନେ ତାଙ୍କୁ ପ୍ରବଳ ମାଡ଼ ମାରିଥିଲେ। ଏଥିରେ ନମ୍ରତା ଚେତାଶୂନ୍ୟ ହୋଇପଡ଼ିବା ସହ ତାଙ୍କ ନାକରୁ ରକ୍ତସ୍ରାବ ହୋଇଥିଲା। ପଡ଼ୋଶୀଙ୍କ ହସ୍ତକ୍ଷେପ ପରେ ନମ୍ରତା ରକ୍ଷା ପାଇଥିବା ଅଭିଯୋଗରେ କୁହାଯାଇଛି।
ପରେ ନମ୍ରତା ନନ୍ଦିପଦା ଥାନାରେ ଲିଖିତ ଅଭିଯୋଗ କରି ଘଟଣାରେ ସମ୍ପୃକ୍ତଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ପୋଲିସକୁ ଅନୁରୋଧ କରିଛନ୍ତି। ଘଟଣାକୁ ନେଇ ପୋଲିସ ମାମଲା ରୁଜୁ କରି ତଦନ୍ତ କରୁଥିବା ଜଣାପଡ଼ିଛି।
