ଭୁବନେଶ୍ୱର, ୨୩।୨(ବ୍ୟୁରୋ): ମଙ୍ଗଳବାର ଥିଲା ବର୍ଷର ପ୍ରଥମ ସିମେଟ୍ରିକାଲ ବା ପଲିଣ୍ଡ୍ରୋମ୍। ଅର୍ଥାତ୍ କ୍ୟାଲେଣ୍ଡରର ଏପରି ଏକ ତାରିଖ ଯାହାକି ସାଂଖିକ ଦୃଷ୍ଟିରୁ ବିରଳ। ମଙ୍ଗଳବାର ଥିଲା ୨୨.୦୨.୨୦୨୨ ତାରିଖ। ଅର୍ଥାତ ୨ ତାରିଖ ଦ୍ବିତୀୟ ମାସ ଏବଂ ୨୦୨୨ ବର୍ଷ। ଆମେ ଏଭଳି ସଂଖ୍ୟା କ୍ରମକୁ ଦ୍ବିତୀୟ ଥର ଦେଖିପାରିବା ନାହିଁ। ଏଭଳି ଦିନ ଖୁବ କ୍ୱଚିତ୍ ଦେଖିବାକୁ ମିଳିଥାଏ, ଯେଉଁଥିରେ ଦିନ, ମାସ ଓ ବର୍ଷର ସଂଖ୍ୟା ସମାନ ରହେ। କୌତୁହଳର ବିଷୟ ହେଉଛି, ଏହି ତାରିଖ ଉଭୟ ପଲିଣ୍ଡ୍ରୋମ୍ ଏବଂ ଆମ୍ବିଗ୍ରାମ୍। ଆମ୍ବିଗ୍ରାମ୍ର ଅର୍ଥ ଶବ୍ଦଟିକୁ ସିଧାରୁ ପଢିଲେ ଯାହା ତାକୁ ଓଲଟା ପଢିଲେ ମଧ୍ୟ ସମାନ। ୨୨.୦୨.୨୦୨୨ ସଂଖ୍ୟାକୁ ଆଗରୁ ପଢିଲେ ବାଇଶି ଶୂନ ଦୁଇ ଦୁଇ ଶୂନ ବାଇଶି ଏବଂ ପଛଆଡୁ ପଢିଲେ ମଧ୍ୟ ତାହା ବାଇଶି ଶୂନ ଦୁଇ ଦୁଇ ଶୂନ ବାଈଶି। ଏହି ଦିନଟିକୁ ସୋସିଆଲ ମିଡିଆରେ ୟୁଜର୍ସ ଟୁଜ୍ ଡେ’ର ଆଖ୍ୟା ଦେଇଛନ୍ତି। ଐତିହାସିକ ଦୃଷ୍ଟିରୁ ଏହା କୌଣସି ଗୁରୁତ୍ୱ ବହନ କରୁ ନ ଥିଲେ ବି ଜ୍ୟୋତିର୍ବିଦ୍ଙ୍କ ମତରେ, ଦୁଇଜଣ ବ୍ୟକ୍ତି କିମ୍ବା ଦୁଇଟି ଚିନ୍ତାଧାରାର ମିଳନକୁ ସଂଖ୍ୟା ୨ ସୂଚିତ କରିଥାଏ। ତେଣୁ ଏହାକୁ ଅମୃତ ବେଳା ବୋଲି କୁହାଯାଏ। ଏହି ବିରଳ ତାରିଖରେ ଭୁବନେଶ୍ୱର ମହାନଗର ନିଗମ ହସ୍ପିଟାଲରେ ୩ ଏବଂ କଟକ ଏସ୍ସିବି ହସ୍ପିଟାଲରେ ୨୫ଜଣ ଶିଶୁ ଜନ୍ମ ହୋଇଥିବା ମେଡିକାଲ ସୂତ୍ରରୁ ସୂଚନା ମିଳିଛି। ଫଳରେ ଉକ୍ତ ତାରିଖ ସମ୍ପୃକ୍ତ ପରିବାର ଲୋକଙ୍କ ପାଇଁ ମହତ୍ତ୍ୱପୂର୍ଣ୍ଣ ହୋଇଥିବାବେଳେ ସେମାନଙ୍କ ମୁହଁରେ ହସ ଫୁଟିଛି। ସେହିପରି କେତେଜଣ ବ୍ୟକ୍ତି ନୂଆ ଗାଡ଼ି, ଗହଣା ଓ ଘର କିଣି ଖୁସି ମନାଇଛନ୍ତି। ସୂଚନାଯୋଗ୍ୟ, ୨୦୧୧ ମସିହାରେ ଏଭଳି ସଂଖ୍ୟାକ୍ରମ ୧୧.୧.୨୦୧୧ ଦେଖିବାକୁ ମିଳିଥିଲା।
