ବ୍ରହ୍ମପୁର ଅଫିସ,୬ା୧: ବ୍ରହ୍ମପୁର ସହରରେ ଦିନକୁ ଦିନ ମଶାବଂଶ ବୃଦ୍ଧି ପାଉଛି। ଯାହାଦ୍ୱାରା ସହରବାସୀ ମ୍ୟାଲେରିଆ, ବାତଜ୍ୱର ଭଳି ବିଭିନ୍ନ ସଂକ୍ରାମକ ରୋଗର ଶିକାର ହେଉଛନ୍ତି। କିନ୍ତୁ ବିଇଏମ୍ସି ପକ୍ଷରୁ ମଶାଦାଉରୁ ରକ୍ଷା ପାଇବା ନିମନ୍ତେ କୌଣସି ଆଖିଦୃଷ୍ଟିଆ ପଦକ୍ଷେପ ଗ୍ରହଣ କରାଯାଉନାହିଁ। ଫଳରେ ସହରବାସୀ ମଶାଦାଉରୁ ରକ୍ଷା ପାଇବା ନିମନ୍ତେ ବିଭିନ୍ନ ଉପାୟ ଅବଲମ୍ବନ କରୁଛନ୍ତି। କିନ୍ତୁ ମଶା କାମୁଡ଼ାରୁ ନିସ୍ତାର ମିଳୁନି। ତେବେ ବିଭିନ୍ନ ରାଜନୈତିକ ଦଳ ପକ୍ଷରୁ ବାରମ୍ବାର ଦାବି କରାଯିବା ପରେ ବିଇଏମ୍ସି ବିଳମ୍ବରେ ସହରବାସୀଙ୍କୁ ସୁହାଇଲା ଭଳି ପଦକ୍ଷେପ ଗ୍ରହଣ କରିଥିଲା। ନିଗମ ପକ୍ଷରୁ ତରବରିଆ ଭାବେ ଏକ ଭଙ୍ଗା ଦଦରା ଟ୍ରାକ୍ଟରରେ ଟିଫା ମେଶିନ ଯୋଡ଼ାଯାଇ ପ୍ରତି ୱାର୍ଡରେ ମଶାଧୂଆଁ ଛଡ଼ାଯିବା ନିମନ୍ତେ ନିଷ୍ପତ୍ତି ହୋଇଥିଲା। ଏହି ଟିଫା ମେଶିନରେ କିଙ୍ଗ୍ ଫଗ୍ ନାମକ ତେଲ ଓ ଡିଜେଲ ମିଶାଯାଇ ମେଶିନରୁ ଧୂଆଁ ଛଡ଼ାଯାଉଥିଲା। ଏହି ତେଲର ମୂଲ୍ୟ ୩ ହଜାର ଟଙ୍କା ରହିଥିବା ନିଗମ କାର୍ଯ୍ୟାଳୟ ସୂତ୍ରରୁ ଜଣାଯାଏ। ତଦନୁଯାୟୀ ନିଗମର ସାନିଟେଶନ ବିଭାଗ ପକ୍ଷରୁ ଗତ ଡିସେମ୍ବର ୮ରୁ ଟିଫା ମେଶିନରେ ମଶାଧୂଆଁ ଛାଡ଼ିବା ପ୍ରକ୍ରିୟା ଆରମ୍ଭ ହୋଇଥିଲା। ଏଭଳି ଡିସେମ୍ବର ୩୧ ଯାଏ ପ୍ରତିଦିନ ୨ଟି ଲେଖାଏ ଓ୍ବାର୍ଡରେ ଧୂଆଁ ଛଡାଯାଇଥିଲା। କିନ୍ତୁ କିଛିଦିନ ପରେ ଏହି କାର୍ଯ୍ୟ ସମ୍ପୂର୍ଣ୍ଣ ହୋଇ ନ ଥିବା ଅଭିଯୋଗ ହୋଇଥିଲା, ଫଳରେ ମଶାବଂଶ ବୃଦ୍ଧି ରୋକିବାରେ ନିଗମ ବିଫଳ ହୋଇଥିଲା।
ସୂଚନାଯୋଗ୍ୟ, ସହରବାସୀଙ୍କୁ ମଶାଦାଉରୁ ରକ୍ଷା ନିମନ୍ତେ ଗତ ୧ ବର୍ଷ ତଳେ ବିଇଏମ୍ସି ସାନିଟେଶନ ବିଭାଗ ପକ୍ଷରୁ ହ୍ୟାଣ୍ଡ ଫଗିଂ ମେଶିନ କିଣାଯାଇଥିଲା। ସେ ସମୟରେ ୪୦ଟି ୱାର୍ଡ ନିମନ୍ତେ ଲକ୍ଷାଧିକ ଟଙ୍କା ବ୍ୟୟରେ ୪୦ଟି ହ୍ୟାଣ୍ଡ ଫଗିଂ ମେଶିନ ୱାର୍ଡର ଏସ୍ଆଇ (ସାନିଟେଶନ ଅଧିକାରୀ) ଓ ଜମାଦାରଙ୍କୁ ପ୍ରଦାନ କରାଯାଇଥିଲା। ଏହି ହ୍ୟାଣ୍ଡ ଫଗିଂରେ ମାଲାଥିନ ଓ ଡିଜେଲ ମିଶାଯାଇ ନର୍ଦ୍ଦମା ଓ ଗଳିକନ୍ଦିରେ ମଶା ଉପତ୍ତ୍ତି ସ୍ଥଳରେ ସ୍ପ୍ରେ କରାଯାଉଥିଲା। ଏହି କାର୍ଯ୍ୟରେ ସଫେଇ କର୍ମଚାରୀ ନିୟୋଜିତ ରହୁଥିଲେ। ଏଥିସହ ୬ଟି ବଡ଼ ହ୍ୟାଣ୍ଡ ଫଗିଂ ମେଶିନ ମଧ୍ୟ କିଣାଯାଇଥିଲା। ଏହାଦ୍ୱାରା ମଧ୍ୟ ମଶାଧୂଆଁ ସ୍ପ୍ରେ କରାଯାଉଥିଲା। କିନ୍ତୁ ଏହାକୁ ଚଳାଇବା ପାଇଁ ଉପଯୁକ୍ତ ତାଲିମ ଅଭାବରୁ ଯାନ୍ତ୍ରିକ ତ୍ରୁଟି ଦେଖାଦେଇଥିଲା। ଫଳରେ ଏହାର ବ୍ୟବହାର ମଧ୍ୟ ଖୁବ୍ କମ୍ ଦିନ ମଧ୍ୟରେ ବନ୍ଦ ହୋଇଯାଇଥିଲା। କିନ୍ତୁ ଲକ୍ଷାଧିକ ଟଙ୍କାର ମେଶିନଗୁଡିକ ଅଚଳ ପରେ ଏହାର ମରାମତି କରାଯାଉ ନ ଥିବା ଅଭିଯୋଗ ହୋଇଛି। ଫଳରେ କୌଣସି ୱାର୍ଡରେ ମେଶିନଗୁଡିକ ବ୍ୟବହୃତ ହେଉ ନ ଥିବା ବହୁ କର୍ପୋରେଟର ଅଭିଯୋଗ କରିଛନ୍ତି। ମାଲାଥିନ ତେଲ ବିଇଏମ୍ସି ପକ୍ଷରୁ କିଣା ନ ଯିବାରୁ ଏହି ଫଗିଂ ମେଶିନ ବ୍ୟବହୃତ ହେଉ ନ ଥିବା ଅନ୍ୟ ଏକ କାରଣ ବୋଲି ମଧ୍ୟ କର୍ପୋରେଟର ଅଭିଯୋଗ କରିଛନ୍ତି। ଏଣୁ ପୂର୍ବରୁ କିଣାଯାଇଥିବା ହ୍ୟାଣ୍ଡ ଫଗିଂ ମେଶିନ ପ୍ରତି ୱାର୍ଡକୁ ପୁନର୍ବାର ପ୍ରଦାନ କରିବା ଲାଗି କର୍ପୋରେଟରମାନେ ଦାବି କରିଛନ୍ତି।
ଏ ନେଇ ବିଇଏମ୍ସି ସ୍ବାସ୍ଥ୍ୟ ଅଧିକାରୀ ମାନସ ରଞ୍ଜନ ପଣ୍ଡାଙ୍କ ସହ ଯୋଗାଯୋଗ ବେଳେ ସେ କହିଛନ୍ତି, ବର୍ତ୍ତମାନ ଡ୍ରେନ୍ରେ ମଶାବଂଶ ବୃଦ୍ଧି ରୋକିବାକୁ ତେଲ ସିଞ୍ଚନ କରାଯାଉଛି। ଆଗାମୀ ଦିନରେ ମଶାବଂଶ ବୃଦ୍ଧି ରୋକିବାରେ ଏହା ସହାୟକ ହେବ ବୋଲି ସେ କହିଛନ୍ତି। ଅନ୍ୟପଟେ ସାନିଟେଶନର ଜଣେ ଅଧିକାରୀଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ଯାନ୍ତ୍ରିକ ତ୍ରୁଟି କାରଣରୁ ହ୍ୟାଣ୍ଡ ଫଗିଂ ମେଶିନଗୁଡିକ ବ୍ୟବହୃତ ହୋଇପାରୁନାହିଁ। ଏହାର ମରାମତି କରାଯାଇ ଖୁବ୍ଶୀଘ୍ର କାର୍ଯ୍ୟରେ ଲାଗିବ ବୋଲି ସେ କହିଛନ୍ତି।
