ଭୁବନେଶ୍ୱର,୧୫ା୪: ମହାରାଷ୍ଟ୍ର, ତାମିଲ୍ନାଡ଼ୁ, ବିହାର ଭଳି ଓଡ଼ିଶାରେ ବହୁ କୁଖ୍ୟାତ ଅପରାଧୀ ନାହାନ୍ତି। ଆମ ରାଜ୍ୟରେ ସରକାରଙ୍କ ଦ୍ୱାରା ତାଲିକାଭୁକ୍ତ ମାତ୍ର ହାତଗଣତି ୮ରୁ ୧୦ଜଣ କୁଖ୍ୟାତ ଅପରାଧୀ ଅଛନ୍ତି। ସେମାନଙ୍କ ଆପରାଧିକ କାର୍ଯ୍ୟକଳାପ ରୋକିବାକୁ ରାଜ୍ୟରେ ୨୦୧୨ରେ ସ୍ବତନ୍ତ୍ର ଟାସ୍କ ଫୋର୍ସ(ଏସ୍ଟିଏଫ୍) ଗଠନ କରାଯାଇଥିଲା। ଲକ୍ଷ୍ୟ ଥିଲା ରାଜ୍ୟରେ ଘଟୁଥିବା ସଂଗଠିତ ଅପରାଧକୁ ରୋକିବା। ହେଲେ କେତେଜଣ ଲୋକଙ୍କୁ ନଜରରେ ରଖିବାରେ ଏସ୍ଟିଏଫ୍ ବିଫଳ ହୋଇଛି। କଟକ ବଡ଼ ଡାକ୍ତରଖାନାରୁ ଶେଖ୍ ହାଇଦର ଫେରାର ହେବା ଘଟଣାରୁ ଏହା ସ୍ପଷ୍ଟ ହେଉଛି ଯେ, ଏସ୍ଟିଏଫ୍ ଏନେଇ କୌଣସି ଗୁରୁତ୍ୱ ଦେଉ ନାହିଁ। କେବଳ ତଳତଳିଆ କନଷ୍ଟେବଳଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯାଇ ବଡ଼ବଡ଼ିଆ ଅଧିକାରୀ ଖସି ଯାଉଛନ୍ତି। ଗତ ଜାନୁୟାରୀରୁ ମାର୍ଚ୍ଚ ୨୩ ମଧ୍ୟରେ ସମ୍ବଲପୁରରୁ ହାଇଦର ୩ଥର ଏସ୍ସିବିକୁ ଚିକିତ୍ସା ପାଇଁ ଆସିଥିଲେ। ହେଲେ ଏନେଇ ଏସ୍ସିବି ପରିସରରେ ଥିବା ଫାଣ୍ଡିକୁ କୌଣସି ସୂଚନା ଦିଆଯାଇ ନାହିଁ କିମ୍ବା ହସ୍ପିଟାଲ ନିକଟରେ ଥିବା ମଙ୍ଗଳାବାଗ ଥାନା ଅଧିକାରୀଙ୍କ ପାଖରେ ମଧ୍ୟ କିଛି ଖବର ନ ଥିଲା। ଏଠାରେ ପ୍ରଶ୍ନ ଉଠୁଛି, ଏସ୍ସିବି ପରିସରରେ ଫାଣ୍ଡି ଖୋଲାଯିବାର ଉଦ୍ଦେଶ୍ୟ କ’ଣ ରହିଲା। ଏସ୍ଟିଏଫ୍ ଡିଆଇଜି ଜୟନାରାୟଣ ପଙ୍କଜଙ୍କୁ ଏନେଇ ପଚାରିବାରେ କହୁଛନ୍ତି, ହାଇଦର ଖସିପଳାଇବା ଘଟଣା ତାଙ୍କ କାର୍ଯ୍ୟକ୍ଷେତ୍ରର ବାହାରେ। ଏଥିପାଇଁ ଜେଲ କର୍ତ୍ତୃପକ୍ଷ ଓ ସ୍ଥାନୀୟ ପୋଲିସ ଦାୟୀ। ଅନ୍ୟ ସଂଗଠିତ ଅପରାଧ ଉପରେ ଏସ୍ଟିଏଫ୍ର ନଜର ରହିଛି ବୋଲି କହିଛନ୍ତି। ହେଲେ ବାସ୍ତବରେ ହାଇଦର ଭଳି କୁଖ୍ୟାତ ଅପରାଧୀଙ୍କ ସମସ୍ତ ଗତିବିଧି ଉପରେ ତୀକ୍ଷ୍ଣ ନଜର ରଖିବା ଏସ୍ଟିଏଫ୍ ଗଠନର ମୂଳ ଲକ୍ଷ୍ୟ। ଏସ୍ଟିଏଫ୍ ଏହାର କାର୍ଯ୍ୟ ଠିକ୍ଭାବେ କରୁ ନ ଥିବାରୁ କେବଳ ହାଇଦର ଫେରାର ଘଟଣା ନୁହେଁ, ରାଜ୍ୟରେ ଡି’ ବ୍ରଦର୍ସ, ମହମ୍ମଦ ସକିଲ, ଟିଟୋଙ୍କ ଭଳି କୁଖ୍ୟାତ ଅପରାଧୀ ଜେଲରେ ଥାଇ ସୁଦ୍ଧା ସେମାନଙ୍କ ଆପରାଧିକ କାର୍ଯ୍ୟକଳାପକୁ ବିନା ବାଧାରେ ଚଳାଇପାରୁଛନ୍ତି। ସେମାନଙ୍କ ଇଙ୍ଗିତରେ ରାଜ୍ୟର ବିଭିନ୍ନ ସ୍ଥାନରେ ହତ୍ୟା, ଦାଦାବଟି, ଟେଣ୍ଡର ଫିକ୍ସିଂ, ଚୋରା ବନ୍ଧୁକ କାରବାର, ନିଶାଦ୍ରବ୍ୟ ଚାଲାଣ ଆଦି ଅପରାଧ ଘଟିଚାଲିଛି। ଓଡ଼ିଶା ପୋଲିସର ସବୁଠୁ ଦକ୍ଷ ତଦନ୍ତକାରୀ ତଥା ଗୋଇନ୍ଦା ସଂସ୍ଥା କ୍ରାଇମବ୍ରାଞ୍ଚର ସ୍ବତନ୍ତ୍ର ୟୁନିଟ୍ ହେଉଛି ଏସ୍ଟିଏଫ୍। ସଂଗଠିତ ଅପରାଧ ରୋକିବା ପାଇଁ ନୋଡାଲ ଏଜେନ୍ସି ଭାବେ କାର୍ଯ୍ୟ କରିବା ଏହାର ମୂଳ ଲକ୍ଷ୍ୟ ଥିଲା। ଏହାର ମୁଖ୍ୟଭାବେ ଅତିରିକ୍ତ ଡିଜି ପାହ୍ୟାର ଜଣେ ଅଧିକାରୀ ଥିବାବେଳେ ତାଙ୍କ ତଳକୁ ଯଥାକ୍ରମେ ଜଣେ ଆଇଜି, ଜଣେ ଏସ୍ପି, ଡେପୁଟି ଏସ୍ପି, ଲ’ ଅଫିସର, ଇନ୍ସପେକ୍ଟର, ସବ୍ ଇନ୍ସପେକ୍ଟର, ଆସିଷ୍ଟାଣ୍ଟ ସବ୍ ଇନ୍ସପେକ୍ଟର, ହାବିଲ୍ଦାର ଏବଂ କନଷ୍ଟେବଳ ପଦବୀର ଅନେକ କର୍ମଚାରୀ ରହିଛନ୍ତି। ଗ୍ୟାଙ୍ଗଷ୍ଟରଙ୍କ ବିରୋଧରେ ଗୋଇନ୍ଦା ତଥ୍ୟ ଯୋଗାଡ କରିବା, ଅନ୍ୟ ରାଜ୍ୟ ଓ ସରକାରୀ ଏଜେନ୍ସିର ସ୍ବତନ୍ତ୍ର ଟାସ୍କଫୋର୍ସ ସହିତ ସମନ୍ବୟ ରକ୍ଷା କରି ଗ୍ୟାଙ୍ଗଗୁଡିକର ଆପରାଧିକ ଗତିବିଧି ଓ କାର୍ଯ୍ୟକଳାପ ଉପରେ ନଜର ରଖିବା। ରାଜ୍ୟରେ ସଂଗଠିତ ଅପରାଧର ସମୀକ୍ଷା ଓ ସ୍ବତନ୍ତ୍ର ରିପୋର୍ଟ ପ୍ରସ୍ତୁତ କରିବା ସହ ଆନ୍ତଃଜିଲା ଅପରାଧୀ ଗୋଷ୍ଠୀକୁ ଧରିବା ଏସ୍ଟିଏଫ୍ର ପ୍ରମୁଖ ଦାୟିତ୍ୱ। ତେବେ ରାଜ୍ୟରେ ବର୍ତ୍ତମାନର ବଡ଼ ଅପରାଧୀ ଗୋଷ୍ଠୀର କାର୍ଯ୍ୟକଳାପ ଓ ଆପରାଧିକ ସ୍ଥିତିକୁ ତର୍ଜମା କଲେ ଏସ୍ଟିଏଫ୍ର ଢିଲାପଣ ବାରି ହୋଇପଡୁଛି। ସଂଗଠିତ ଅପରାଧ ତଥା ଯୋଜନା ସମ୍ପର୍କରେ ଏସ୍ଟିଏଫ୍ ନିକଟରେ କୌଣସି ତଥ୍ୟ ରହୁନାହିଁ, ଯାହାର ସୁଯୋଗ ନେଇ ହାଇଦର ଏସ୍ସିବିରୁ ଖସିଯିବାରେ ସଫଳ ହୋଇପାରିଲେ। ଏପରି କି ହାଇଦର ଫେରାର ହେବାର ୫ ଦିନ ବିତିଯାଇଥିଲେ ମଧ୍ୟ ସେ କେଉଁଆଡ଼େ ଗଲେ, ଏବେ କେଉଁଠି ଅଛନ୍ତି ସେନେଇ ତଦନ୍ତ କରୁଥିବା କଟକ-ଭୁବନେଶ୍ୱର କମିଶନରେଟ୍ ପୋଲିସ ଅନ୍ଧାରରେ ବାଡ଼ି ବୁଲାଉଥିବାବେଳେ ଏସ୍ଟିଏଫ୍ ଅତି ଚତୁରତାର ସହ ନିଜ ଦାୟିତ୍ୱରୁ ଓହରି ଯାଇଛି। ଏଥିରୁ ପ୍ରମାଣିତ ହେଉଛି ଯେ, ଓଡ଼ିଶା ପୋଲିସର ଦୁର୍ବଳତା ଯୋଗୁ ରାଜ୍ୟବ୍ୟାପୀ ଅପରାଧ ବୃଦ୍ଧି ପାଉଛି।
