ନୂଆପଡ଼ା ଅଫିସ,୨୧।୩: ନୂଆପଡ଼ା ଜିଲା ଖରିଆର ରୋଡ ଏନ୍ଏସିରେ ୩ ଜଣ ଅଧ୍ୟକ୍ଷ ପଦବୀ ପାଇଁ ପ୍ରତିଦ୍ୱନ୍ଦ୍ୱିତା କରୁଛନ୍ତି। ବିଜେଡିରୁ ସୁନିତା ଶେଖର ଜୈନ, ଭାଜପାରୁ ସୋନିଆ ଗୋଲଡି ଅଗ୍ରୱାଲ ଓ କଂଗ୍ରେସରୁ ପୂର୍ଣ୍ଣମାସୀ କଠାର ପ୍ରାର୍ଥୀ ଭାବେ ନିର୍ବାଚନୀ ମଇଦାନରେ ଓହ୍ଲାଇଛନ୍ତି
ଖରିଆର ରୋଡ ଏନ୍ଏସିରେ ମୋଟ ୧୯ ୱାର୍ଡ ରହିଥିବା ବେଳେ ୫୭ଜଣ କାଉନସିଲର ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ୧୪,୩୪୯ ଭୋଟର ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ। ପୂର୍ଣ୍ଣମାସୀ ଏକ ଗରିବ ପରିବାରର ବୋହୁ ହୋଇଥିଲେ ମଧ୍ୟ ତାଙ୍କର ଇଛାଶକ୍ତିକୁ ସବୁ ହାର ମାନୁଛି। ତାଙ୍କ ସ୍ବାମୀ ହୃଷୀକେଶ କଠାର ଖରିଆର ରୋଡ ସହରରେ ଠେଲା ଲଗାଇ ଗୁପଚୁପ ବିକ୍ରି କରି ପରିବାର ଚଳାନ୍ତି।
ପୂର୍ଣ୍ଣମାସୀ ବେସକାରୀ ଶିକ୍ଷାନୁଷ୍ଠାନରେ ଶିକ୍ଷାଦାନ କରି ଅବସର ସମୟରେ ସ୍ବାମୀଙ୍କୁ ଗୁପଚୁପ ବିକ୍ରିରେ ସହଯୋଗ କରନ୍ତି। ନିଶାରେ ଶିକ୍ଷାଦାନ ଓ ପେଶାରେ ଗୁପଚୁପ ବିକାଳି ହୋଇଥିଲେ ମଧ୍ୟ ସେବା ମନବୃତି ଦୃଢ। ଛାତ୍ରୀଛାତ୍ରମାନଙ୍କ ସେବା କରିବା ସହିତ ମାନବ ସେବା କରିବାରେ ତାଙ୍କର ଇଛାଶକ୍ତି ଓ ମନବଳ ଥିବାରୁ କଂଗ୍ରେସ ପୂର୍ଣ୍ଣମାସୀଙ୍କୁ ଖରିଆର ରୋଡ ଏନ୍ଏସି ଅଧ୍ୟକ୍ଷା ପଦବୀ ପାଇଁ ଟିକେଟ ଦେଇଛି। ତାଙ୍କର ସେବା କାର୍ଯ୍ୟକୁ ସହରବାସୀ ପ୍ରଶଂସା କରୁଥିବାରୁ ନିର୍ବାଚନରେ ନିଶ୍ଚୟ ବିଜୟୀ ହୋଇ ଲୋକଙ୍କ ସେବା କରିବି ବୋଲି ସେ ଆଶା ରଖିଛନ୍ତି।
