ପଟ୍ଟାଙ୍ଗି,୨୬।୪(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ନୂଆଗାଁ ପଞ୍ଚାୟତ କାର୍ଯ୍ୟାଳୟରେ ପାଣି ପାଇଁ ବ୍ୟକ୍ତିଗତ ଜମି ଅଧିଗ୍ରହଣ ନିମନ୍ତେ ପୂର୍ବ ନିର୍ଦ୍ଧାରିତ ଗ୍ରାମସଭା ହୋଇପାରି ନାହିଁ। ଫଳରେ ନିରାଶ ହୋଇ ବ୍ଲକ ଓ ତହସିଲ ପ୍ରଶାସନ ଫେରିଛି। ଏହିପରି ଅଭାବନୀୟ ଘଟଣା ପ୍ରଶାସନ ପାଇଁ ମୁଣ୍ଡବିନ୍ଧାର କାରଣ ପାଲଟିଛି।
ସୂଚନା ଅନୁଯାୟୀ, ଖଣି ବିଭାଗ ଓ ଖଣି ସ୍ବାତାଅଧିକାରୀଙ୍କ ସହ ନାଲକୋର ହୋଇଥିବା ଚୁକ୍ତିନାମା ପ୍ରକାରେ ପଟ୍ଟାଙ୍ଗି ସେରୁବନ୍ଧକୁ କାର୍ଯ୍ୟକ୍ଷମ ପୁର୍ବରୁ ଆବଶ୍ୟକ ପଡୁଛି ପାନୀୟଜଳ। ଏହାର ବ୍ୟବସ୍ଥା ନିମନ୍ତେ ବୋଡାପାଡୁ ଗ୍ରାମ ନିକଟ ନଦୀରୁ ପାଇପ ଯୋଗେ ପାଣି ଉଠାଇ ସେରୁବନ୍ଧ ବକ୍ସାଇଟ ଖଣି ପାହାଡ଼ ଉପରକୁ ନେବା ନିମନ୍ତେ ନାଲ୍କୋ କର୍ତ୍ତୃପକ୍ଷ ସରପଞ୍ଚ ସୁବାଷ ଖରାଙ୍କ ସହ ସାକ୍ଷାତ କରି ଆଲୋଚନା ମାଧ୍ୟମରେ କାର୍ଯ୍ୟ ଆରମ୍ଭ କରିବା ପାଇଁ ଚେଷ୍ଟା କରିଥିଲେ। ହେଲେ ସରପଞ୍ଚ ଖରା ଏହିପରି କାର୍ଯ୍ୟ ଲାଗି ବ୍ୟକ୍ତିଗତ ଭାବେ ନିର୍ଦ୍ଦେଶ ଦେବା କିମ୍ବା ସହଯୋଗ କରିବା ଠିକ ହେବ ନାହିଁ ବୋଲି ମତାମତ ଦେଇଥିଲେ। ଫଳରେ ନାଲ୍କୋ କର୍ତ୍ତୃପକ୍ଷ ପଟ୍ଟାଙ୍ଗି ବ୍ଲକ ପ୍ରଶାସନ ପକ୍ଷରୁ ଗତ ୧୦ ତାରିଖ ତଥା ଚିଠି ନମ୍ବର ୧୩୬୩/୨୫ ପ୍ରକାରେ ଶନିବାର ଉକ୍ତ ପଞ୍ଚାୟତର କାର୍ଯ୍ୟାଳୟରେ ଗ୍ରାମସଭା ବୈଠକ ନିମନ୍ତେ ସ୍ଥିର କରିଥିଲେ। ହେଲେ ଗ୍ରାମସଭା ଆରମ୍ଭ ହେବା ପୁର୍ବରୁ କ୍ଷତିଗ୍ରସ୍ତ ପଟ୍ଟାଧାରି ତଥା ଜମି ମାଲିକଙ୍କ ସମେତ ପଞ୍ଚାୟତର ଅନ୍ୟ ଗ୍ରାମବାସୀ ପହଞ୍ଚି ବିକ୍ଷୋଭ କରିବା ସହ ଗ୍ରାମସଭାକୁ ବର୍ଜନ କରିଥିଲେ । ସେପଟେ ବିକ୍ଷୋଭକାରୀଙ୍କୁ ଉପସ୍ଥିତ ପୋଲିସ ଏବଂ ପ୍ରଶାସନ ଅନେକ ବୁଝାଇଥିଲେ ମଧ୍ୟ କୈଣସି ସୁଫଳ ମିଳି ନ ଥିଲା । ଅପରପକ୍ଷେ ଗ୍ରାମସଭାକୁ ଆସିଥିବା ବିଡିଓ ରାମକୃଷ୍ଣ ନାୟକ ଏବଂ ତହସିଲଦାର ଦେବେନ୍ଦ୍ର ବାହାଦୂର ସିଂ ଧାରୁଆଙ୍କୁ ବିକ୍ଷୋଭକାରୀ ଅଧାବାଟରେ ଅଟକାଇ ବିରୋଧ କରିଥିଲେ। ଫଳରେ ଦୁଇ ଅଧିକାରୀ ନିରାଶ ହୋଇ ଫେରିବାକୁ ବାଧ୍ୟ ହୋଇଥିଲେ । ଏହି ସମୟରେ ବ୍ଲକର ଅଧ୍ୟକ୍ଷା କଳ୍ପନା ପାଙ୍ଗି, ଜୋନ ୦୧ ଜିଲା ପରିଷଦ ସଭ୍ୟ ଟିକାଇ ଗେମେଲ, ମାଳିପୁଟ ସରପଞ୍ଚ ସୋମନାଥ ଗୁଣ୍ଠା , ପଟ୍ଟାଙ୍ଗି ସରପଞ୍ଚ ଆଲମେ ଫୁଲ , କୋଟିଆ ସରପଞ୍ଚ ଲିୟୁ ଗେମେଲ ଏବଂ ନୂଆଗାଁ ସରପଞ୍ଚ ଖରା କ୍ଷତିଗ୍ରସ୍ତ ଜମି ମାଲିକ ଓ ବିକ୍ଷୋଭକାରୀଙ୍କୁ ସମର୍ଥନ ଜଣାଇ ନିଜର ଲୋକଙ୍କ ଦାବି ଏବଂ ହେବାକୁ ଥିବା କ୍ଷତି ସମ୍ପର୍କରେ ଗ୍ରାମସଭାକୁ ଆସିଥିବା ଅଧିକାରୀମାନଙ୍କୁ ଜଣାଇଥିଲେ ।
ସୂଚନାଯୋଗ୍ୟ, ନାଲକୋ ପକ୍ଷରୁ ଉପରୋକ୍ତ ଗ୍ରାମ ନିକଟ ଦେଇ ବୋହି ଯାଉଥିବା ନଦୀରୁ ପାଣି ଉଠାଇବା ନିମନ୍ତେ ପଦକ୍ଷେପ ଗ୍ରହଣ କରାଗଲେ ପଞ୍ଚାୟତ ସମେତ ବୋଡାପାଡୁ , ନୂଆଗାଁ ଏବଂ ମେଡମଗନ୍ଧି ପ୍ରମୁଖ ତିନି ଗ୍ରାମର ୨୯ ଜମି ମାଲିକଙ୍କ ଚାଷ ସମ୍ପୂର୍ଣ୍ଣ କ୍ଷତିଗ୍ରସ୍ତ ହେବା ସମ୍ଭାବନା ରହିଛି।
